ލުބްނާނުގެ ދެކުނުގައި އޮތް ޞަދީޤީނަށް ޔަހޫދީ ފައުޖުން ވަރުގަދަ ވައިގެ ޙަމަލާތަކެއްދީ, 16 ކުޑަކުދިން ޒަޚަމުކޮށްލައިފިއެވެ. ލުބްނާންގައި ހަރަކާތްތެރިވާ ޞިއްޙީ ޚިދުމަތްތެރިންގެ ޖަމުޢިއްޔާ, އިސްލާމިކް ހެލްތް ކޮމިޓީން ބުނީ ޔަހޫދީ ފައުޖުން ދީފައިވާ ރަޙުމު ކުޑަ ޙަމަލާތަކުގައި ޒަޚަމުކޮށްލާފައި ވަނީ އުމުރުން ހަތަރު އަހަރާއި 14 އަހަރާ ދެމެދުގެ އުމުރުފުރައިގެ ކުދިންތަކެއް ކަމުގައެވެ.
ޞަދީޤީނުގެ އިތުރުން ލުބްނާންގެ އައްސޭރިފަށުގައި އޮންނަ އިޠާރަށްވެސް ޔަހޫދީ ފައުޖުން ވަނީ ވަރުގަދަ ވައިގެ ޙަމަލާތަކެއް ދީފައެވެ. އެ ޙަމަލާތަކުގައި ހަތް މީހުން ޒަޚަމު ކޮށްލާފައިވާ ކަމުގައި ލުބްނާނުގެ ދަޢުލަތުގެ މީޑިޔާއިން ރިޕޯޓުކުރެއެވެ. ނަމަވެސް, ޢާންމުންނާއި ކުޑަކުދިން ތިބި ސަރަޙައްދުތަކަށް ޙަމަލާ ދީފައިވާ ކަމަށް ކުރެވޭ ތުހުމަތު ދޮގުކޮށް ޔަހޫދީ ފައުޖުން ބުނީ ޙަމަލާތައް އަމާޒު ކޮށްފައި ވަނީ ލުބްނާންގައި ހަރަކާތްތެރިވާ ހަތިޔާރު އެޅި ޖަމާޢަތް, ޙިޒްބުاللهގެ އަމާޒުތަކަށް ކަމުގައެވެ.
ޔަހޫދީ ފައުޖުން ވަނީ ލުބްނާންގެ މަޖްދަލް ސަލަމަށް ވެސް ޑްރޯން ޙަމަލާއެއް ދީފައެވެ. ސައިކަލަކަށް އަމާޒުކޮށް ދީފައިވާ އެ ޙަމަލާގައި ދެ މީހަކު ޒަޚަމުވި ކަމުގައި އިސްލާމިކް ހެލްތް ކޮމިޓީން ބުންޏެވެ. އެއީ ވެސް ޙިޒްބުاللهގެ ހަނގުރާމަވެރިންނަށް އަމާޒު ކޮށް ދީފައިވާ ޙަމަލާއެއް ކަމުގައި ޔަހޫދީ ފައުޖުން ބުންޏެވެ.
މި ޙަމަލާތަކުގެ ރައްދުގައި ޙިޒްބުاللهން ވެސް ވަނީ ޒަޔަނިސްޓު އިސްރާއީލުގެ ރަށްތަކަށް އަމާޒުކޮށް ވަރުގަދަ ޙަމަލާތަކެއް ދީފައެވެ. އެ ޖަމާޢަތުގެ ގިނަ ޙަމަލާތައް އަމާޒު ކޮށްފައި ވަނީ އިފްތާޚުގައި އޮންނަ ޔަހޫދީ ފައުޖުގެ އަސްކަރީ މަރުކަޒަކަށެވެ. މި ޙަމަލާތައް ދިނުމަށް ޙިޒްބުالله ބޭނުން ކޮށްފައި ވަނީ އަސްކަރީ ޑްރޯންތަކެކެވެ.
ޙިޒްބުاللهން ވަނީ, ލުބްނާންގެ ޢާންމު ރައްޔިތުން ދިރިއުޅެމުންދާ ސަރަޙައްދުތަކަށް މިސައިލް ޙަމަލާތައް ދެމުން ދިޔަ ޔަހޫދީ ފައުޖުގެ އަސްކަރީ ޑްރޯނެއް ވެސް ވައްޓައިލާފައެވެ. އެއީ, ހަރމީސް 900 މަރުކާގެ އަސްކަރީ ޑްރޯނެކެވެ. ލުބްނާންގެ ސަރަޙައްދީ ރޮނގު ކައިރީގައި އޮންނަ ޔަހޫދީންގެ ރަށްތަކަށް ޙިޒްބުاللهން ދީފައިވާ ޑްރޯން ޙަމަލާތަކުގައި ގިނަ ޢަދަދެއްގެ މީހުންގެ ފުރާނައަށް ނުރައްކާވި ކަމުގައި ރިޕޯޓުތައް ބުނެއެވެ. ނަމަވެސް, ޔަހޫދީން އެ ކަން ކަށަވަރު ކޮށްދީފައެއް ނުވެއެވެ.
ފަލަސްޠީނުގެ ޣައްޒާގެ މުސްލިމުން ނެތިކޮށްލަން 2023 އޮކްޓޫބަރު 7ގައި ޔަހޫދީ ފައުޖުން ފެށި ލާއިންސާނީ ޢުދުވާނާ ގުޅިގެން ޙިޒްބުاللهން ވަނީ ޔަހޫދީންގެ ރަށްތަކާއި ޔަހޫދީ ފައުޖުގެ އަނިޔާވެރި ސިފައިންނަށް އަމާޒުކޮށް ޙަމަލާ ދޭން ފަށާފައެވެ. ކޮންމެ ދުވަހަކު ވެސް ދެމުންދާ މި ޙަމަލާތަކުގެ ބޭނުމަކީ ޣައްޒާ ޢުދުވާން ހުއްޓައިލަން ބާރު އެޅުމެވެ. މި ޙަމަލާތަކުގައި ޔަހޫދީ ސިފައިންގެ 14 މީހުންނާއި, ޢާންމުންގެ 11 މީހުން ވަނީ މަރައިލާފައެވެ.
ޙިޒްބުاللهއާ ދެކޮޅަށް ކަމަށް ބުނެ, ޔަހޫދީ ފައުޖުން ލުބްނާނަށް ދެމުންދާ ޙަމަލާތަކުގައި 450އެއްހާ މީހުން ވަނީ ޝަހީދު ކޮށްލާފައެވެ. އޭގެ ތެރޭގައި ޢާންމުންގެ 80 މީހުން ހިމެނޭއިރު, ގިނަ ޢަދަދެއްގެ ޞިއްޙީ ޚިދުމަތްތެރިން ވެސް ހިމެނެއެވެ. ޔަހޫދީ ފައުޖުން ދާދި ފަހުން ދިން ޙަމަލާއެއްގައި އިސްލާމިކް ހެލްތް ކޮމިޓީއަށް ނިސްބަތްވާ 20 ޚިދުމަތްތެރިން ޝަހީދު ކޮށްލާފައިވެއެވެ.