ފަލަސްޠީނުގެ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓުމަކަށް ގެނައުމާ ގުޅޭ ގޮތުން އެމެރިކާއިން ހުށަހަޅާފައިވާ މަގުޗާޓު ބަލައިގަތުމަށް, ޔަހޫދީންނާއި ޣައްޒާގައި ވެރިކަން ކުރާ ޙަމާސް ޖަމާޢަތަށް ބާރުއަޅަން ފަށައިފިއެވެ. މިކަމަށް ބާރުއަޅަމުންދާ ޤައުމުތަކުގެ ތެރޭގައި އެމެރިކާގެ އިތުރުން މިޞްރާއި ޤަޠަރު ހިމެނެއެވެ. މިޞްރާއި ޤަޠަރަކީ ޙަމާސްގެ މުޖާހިދުންނާއި ޔަހޫދީންނާ ދެމެދު ސުލްޙައިގެ މަޝްވަރާތައް ވިލަރެސް ކުރުމުގައި އިސްކޮށް ހަރަކާތްތެރިވާ ދެ ޤައުމެވެ.
މޭ 31ވަނަ ދުވަހު އެމެރިކާގެ ރައީސް ޖޯ ބައިޑަން އިޢުލާނު ކުރެއްވި މަގުޗާޓަށް ޙަމާސުން ވަނީ ބިނާކުރަނިވި ރައްދެއް ދީފައެވެ. އެ ޖަމާޢަތުން ބުނީ ޔަހޫދީންގެ ލާއިންސާނީ ޢުދުވާން ހުއްޓުވައި, ޣައްޒާގެ ރައްޔިތުންނަށް އެ މީހުންގެ ވަޒަނަށް އެނބުރި ދިޔުމުގެ ފުރުޞަތުދީ, އެ ސަހަރަށް އަރާފައިވާ ޔަހޫދީ ފައުޖުގެ އިސްތިޢުމާރީ ސިފައިން ބޭލުމަށް އެ ޖަމާޢަތުން ތާޢީދުކޮށް އެއްބާރުލުން ދޭނެ ކަމުގައެވެ. އަދި, އެ މަގުޗާޓުގެ ދަށުން އެ ޖަމާޢަތުން ރަހީނު ކޮށްފައިވާ ޔަހޫދީ އަސީރުން މިނިވަން ކުރާނެ ކަމުގައި ވެސް ޙަމާސުން ބުންޏެވެ.
ނަމަވެސް, ބައިޑަންގެ ހުށަހެޅުމަށް ޔަހޫދީންގެ ފަރާތުން އުންމީދީ ޖަވާބެއް ލިބިފައެއް ނެތެއެވެ. ޔަހޫދީން ބުނީ, ޣައްޒާގެ ވެރިކަމުގައި ޙަމާސުން ދެމިއޮތްހާ ދުވަހަކު, ހަނގުރާމަ ނިމުމަކަށް ނުގެންނާނެ ކަމުގައެވެ. އަދި, ޙަމާސް ނައްތައިލުމުގެ ނަމުގައި ޣައްޒާގެ މުސްލިމުން ޝަހީދު ކުރުމަށް ހިންގަމުންދާ ލާއިންސާނީ ޢުދުވާން ހުއްޓައިނުލާނެ ކަމުގައެވެ.
ބައިޑަން ވިދާޅުވީ އޭނާ ހުށަހަޅުއްވާފައިވާ މަގުޗާޓު ބިނާކޮށްފައި ވަނީ ޔަހޫދީންގެ ހުށަހެޅުންތަކެއްގެ މައްޗަށް ކަމުގައެވެ. އަދި, ހަ ހަފުތާގެ މުއްދަތަކަށް ޢުދުވާން މެދުކަނޑައިލައި, ޣައްޒާއަށް އަރާފައިވާ އިސްތިޢުމާރީ ސިފައިން ބާލައި, ޙަމާސުން ރަހީނު ކޮށްފައިވާ އަސީރުން މިނިވަން ކުރުމުގެ ފުރުޞަތު ދޭން ޔަހޫދީން އެއްބަސްވެފައިވާ ކަމުގައި ވެސް ބައިޑަން ވިދާޅުވިއެވެ.
މި ފަދަ ހުށަހެޅުމަކަށް އިސްރާއީލުން އެއްބަސްވެއްޖެ ނަމަ, އެ ޤައުމުގެ ޖައްބާރު ބޮޑުވަޒީރު ބެންޖަމިން ނަތަންޔާހޫގެ ސަރުކާރު ވައްޓައިލާނެ ކަމުގެ އިންޒާރު, އޭނާގެ ކެބިނެޓުގައި ހިމެނޭ ދެ މެންބަރުން ވަނީ ދީފައެވެ. އަަސީރުން މިނިވަންކޮށް ނިމެންދެން ޢުދުވާން މެދުކަނޑައިލި ނަމަވެސް, ޙަމާސްގެ ހުރިހާ މުޖާހިދުން ޝަހީދުކޮށް, އެ ޖަމާޢަތް ނައްތައިލަން ފަހުުން ޢުދުވާންތައް ފަށާނެ ކަމުގައި ވެސް ޔަހޫދީން ބުންޏެވެ.
ޙަމާސްގެ އިސް އޮފިޝަލެއް ކަމުގައިވާ މަޙްމޫދު މަރްދާވީ ވިދާޅުވީ, ބައިޑަންގެ މަގުޗާޓާ ގުޅޭ ފުރިހަމަ މަޢުލޫމާތު އަދި މިހާތަނަށް އެ ޖަމާޢަތާ ހިއްސާ ކޮށްފައި ނުވާ ކަމުގައެވެ. "ޢުދުވާން ހުއްޓައިލައި, ޣައްޒާއަށް އަރާފައިވާ ޔަހޫދީ ފައުޖުގެ އިސްތިޢުމާރީ ސިފައިން އެ ސަހަރުން ފޭބުމުން ނޫނީ އެއްވެސް އެއްބަސްވުމެއްގައި ހަމާސުން ސޮއެއް ނުކުރާނެ،" އޭނާ ވިދާޅުވިއެވެ. ނަމަވެސް, ޙަމާސުން ވަނީ މި ކަމާ މެދު ބިނާކުރަނިވި މަޝްވަރާތަކެއް ކުރަން ތައްޔާރަށް އޮތް ކަމުގައެވެ.
މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 36,379އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 82,407އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.