ޔޫކްރެއިންގެ ފަސް ސަރަޙައްދެއްގައި ހުންނަ ހަކަތަ އުފައްދާ ކާރުޚާނާތަކާއި, ކަރަންޓުގެ ޚިދުމަތް ދިނުމަށް ބޭނުންކުރާ ވަސީލަތްތަކާއި ވިއުގައަށް ރަޝިޔާއިން މިސައިލާއި ޑްރޯން ޙަމަލާތަކެއް ދީފިއެވެ. އެ ޙަމަލާތައް އަމާޒު ކޮށްފައި ވަނީ އިރުމަތީ ދޮންޏެސްކާއި, އިރުދެކުނުގައި އޮންނަ ޒަޕޮރީޜިޔާއާއި ދްނީޕްރޯޕެތްރޯވްސްކާއަށެވެ. ޔޫކްރެއިންގައި ކަރަންޓުގެ ޚިދުމަތް ފޯރުކޮށްދޭ ދަޢުލަތުގެ ކުންފުނި އެކްރެނެރްހޯނުން ބުނީ ރަޝިޔާގެ ޙަމަލާތަކުގައި އެ ކުންފުނީގެ އިންޖީނުގެތަކާއި ވަސީލަތްތަކަށް ބޮޑެތި ގެއްލުންތަކެއް ލިބުނު ކަމުގައެވެ.
މިއީ, މާރިޗު މަހަށް ފަހު ޔޫކްރެއިންގެ ހަކަތަ އުފައްދާ ވިއުގައަށް އަމާޒުކޮށް ރަޝިޔާއިން މިސައިލާއި ޑްރޯން ބޭނުން ކޮށްގެން ވަރުގަދަ ޙަމަލާތަކެއް ދީފައިވާ ހަވަނަ ފަހަރެވެ. ޔޫކްރެއިންގެ އަސްކަރިއްޔާއިން ބުނީ, އެންމެ ފަހުގެ ޙަމަލާތަކުގައި ރަޝިޔާއިން ބޭނުން ކުރި 53 މިސައިލްގެ ތެރެއިން 35 މިސައިލް ދިފާޢު ކުރެވުނު ކަމުގައެވެ. އަދި, 47 ޑްރޯންގެ ތެރެއިން 46 ޑްރޯން ދިފާޢުކޮށް ވައްޓައިލާފައިވާނެ ކަމުގައެވެ.
ޔޫކްރެއިންގެ ހަކަތަ އުފައްދާ ވިއުގައަށް އަމާޒުކޮށް ވަރުގަދަ ޙަމަލާތަކެއް ދީފައިވާނެ ކަން ރަޝިޔާގެ ދިފާޢީ ވުޒާރާއިން ވެސް ވަނީ ކަށަވަރު ކޮށްދީފައެވެ. މީގެ އިތުރުން, ޔޫކްރެއިންގެ އަސްކަރީ މަރުކަޒުތަކާއި ހަތިޔާރު ގުދަންތަކަށް ވެސް ޙަމަލާތައް އަމާޒު ކޮށްފައިވާނެ ކަމުގައި އެ ވުޒާރާއިން ބުންޏެވެ. އެ ޙަމަލާތައް އަމާޒު ކޮށްފައި ވަނީ, ހުޅަނގުން ޔޫކްރެއިނަށް ފޯރުކޮށްދީފައިވާ ހަތިޔާރު ރައްކާކޮށްފައި ހުރި ގުދަންތަކަށް ކަމުގައި ވެސް އެ ވުޒާރާއިން ބުންޏެވެ.
މީގެ ކުރިން ވެސް ރަޝިޔާއިން ވަނީ ޔޫކްރެއިންގެ ހަކަތަ އުފައްދާ ވިއުގައަށް ބޮޑެތި ގެއްލުންތަކެއް ދީފައެވެ. އޭގެ ތެރޭގައި, ޔޫކްރެއިންގައި ކަރަންޓުގެ ޚިދުމަތް ފޯރުކޮށްދޭ އެންމެ ބޮޑު އަމިއްލަ ކުންފުނި, ޑީޓެކުން ހިންގާ ދެ ތަރމަލް ޕްލާންޓާއި ހައިޑްރޯޕަވަރ ޕްލާންޓެއް ހިމެނެއެވެ. އެ ޙަމަލާތަކާ ގުޅިގެން ޔޫކްރެއިންގެ ބޮޑު ސަރަޙައްދަކުން ކަރަންޓުގެ ޚިދުމަތް ކެނޑި, ކަރަންޓު އިމްޕޯޓު ކުރާ މިންވަރު އިތުރުވެގެން ދިޔައެވެ.
ރަޝިޔާގެ އެންމެ ފަހުގެ ޙަމަލާތައް ދީފައި މި ވަނީ, ސަރަޙައްދީ ރޮނގު ހުރަސްކޮށް ރަޝިޔާގެ ރަށްތަކަށް ޙަމަލާ ދިނުމަށް އެމެރިކާއިން ޔޫކްރެއިންގެ އަސްކަރިއްޔާއަށް ފޯރުކޮށްދެމުންދާ ހަތިޔާރު ބޭނުން ކުރުމުގެ ހުއްދަ އެމެރިކާއިން ދީފައިވާ ދަނޑިވަޅެއްގައެވެ. ވިލާތުގެ އެހެން ޤައުމުތަކުން ވެސް ވަނީ މި ފަދަ ނިންމުންތަކެއް ނިންމާނެ ކަމުގެ އިޝާރާތެއް ކޮށްފައެވެ. އޭގެ ތެރޭގައި ފަރަންސޭސިވިލާތާއި ޖަރުމަނުވިލާތް ހިމެނެއެވެ.
ނަމަވެސް, ރަޝިޔާއިން ވަނީ އެ ޤައުމުގެ ރަށްތަކަށް ޙަމަލާ ދިނުމުގައި ހުޅަނގުން ފޯރުކޮށްދޭ ހަތިޔާރު ބޭނުން ކުރުމާ ދެކޮޅަށް އިންޒާރު ދީފައެވެ. މި ކަމާ މެދު ނުރުހުން ފާޅު ކުރައްވައި ރަޝިޔާގެ ރައީސް ވްލަޑިމިޔަރ ޕުޓިން ވިދާޅުވީ, ޔޫކްރެއިނުން އެ ފަދަ އަމަލެއް ހިންގައިފި ނަމަ, ބޮޑު ހަނގުރާމައެއް ފެށުމުގެ ބިރު އެތަކެއް ގުނައަކަށް އިތުރުވެގެން ދާނެ ކަމުގައެވެ.
2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ފެށި ރަޝިޔާ-ޔޫކްރެއިން ހަނގުރާމައިގައި ރަޝިޔާގެ ފައުޖުތަކުން ވަނީ ޔޫކްރެއިންގެ ބައެއް ސަރަޙައްދުތަކަށް އަތްގަދަ ކޮށްފައެެވެ. އޭގެ ތެރޭގައި އިރުމަތީ ދޮންބާސްގެ ދެ ސަރަޙައްދު ކަމުގައިވާ ލުހާންސްކާއި ދޮންޏެސްކުގެ އިތުރުން ދެކުނުގައި އޮންނަ ޒަޕޮރީޜިޔާގެ ބައެއް ސަރަޙައްދުތައް ހިމެނެއެވެ. ރަޝިޔާގެ ފައުޖުތަކާ ދެކޮޅަށް ޔޫކްރެއިނުން ރައްދު ޙަމަލާގެ އަސްކަރީ ކެމްޕޭނެއް ފެށި ނަމަވެސް އެ ކެމްޕޭން ވަނީ ފޭލުވެފައެވެ.