ޗައިނާގެ ޖައްވީ އުޅަނދު, ޗަންގ-އީ-6 ހަނދުގެ ދުރު ފަޅިއަށް ދަތުރު ކޮށް, ކާމިޔާބުކަމާ އެކު ޖައްސައިފިއެވެ. ހަނދުގެ "އަނދިރި" ފަޅީގެ ނަން ދީފައިވާ, ދުނިޔެއާ ދުރަށް އޮތް ފަޅިއަށް ޗަންގ-އީ-6 ކުރި ދަތުރުގެ އަމާޒަކީ, އެ ފަޅީގެ ފަސްގަނޑުން ވެލީގެ ސާމްޕަލްތަކެއް ނެގުމެވެ. ޗަންގ-އީ-6 ހަނދުގެ ދުރު ފަޅިއަށް ދަތުރު ކޮށްފައި މި ވަނީ, ދުނިޔޭގެ ބޮޑެތި ޤައުމުތަކުގެ ޖައްވީ އިދާރާތަކުން އެ ސަރަޙައްދަށް އުޅަނދުތައް ފޮނުވަން މަސައްކަތް ކުރަމުންދާ ދަނޑިވަޅެއްގައެވެ. ނަމަވެސް, އިތުރު ޤައުމަކަށް އެ ކަން ކާމިޔާބު ކުރެވިފައެއް ނުވެއެވެ.
ހަނދަށް ދަތުރުކޮށް, ހަނދުގެ ފަސްގަނޑުގައިވާ މައުދަންތަކުގެ ދިރާކުރުމާއި, ހަނދަށް ސައިންޓިސްޓުން ފޮނުވަން އެމެރިކާއިން ވެސް ދަނީ މަސައްކަތް ކުރަމުންނެވެ. ކުރިއަށް އޮތް ދަހަރުގެ ތެރޭގައި އެސްޓްރޮނޯޓުންނަށް ހަނދުގައި ދިރިއުޅެވޭނެ އިންތިޒާމުތައް ހަމަޖައްސަން ވެސް އެމެރިކާއިން ދަނީ މަސައްކަތް ކުރަމުންނެވެ.
ޗައިނާގެ އުޅަނދު, ޗަންގ-އީ-6 ތިރިކޮށްފައި ވަނީ ހަނދުގެ ސައުތް ޕޯލް-އައިޓްކެން ބޭސިން ކިޔާ ސަރަޙައްދަކަށެވެ. އެއީ, ހަނދަށް އެސްޓެރޮއިޑެއް ނުވަތަ ބޮޑު ހިލަގަނޑެއް ވެއްޓި, ހެދިފައިވާ ބޮޑު ވަޅުގަނޑެކެވެ. ޗައިނާގެ ޖައްވީ އިދާރާ, ޗައިނާ ނޭޝަނަލް ސްޕޭސް އެޑްމިނިސްޓްރޭޝަން (ސީއެންއެސްއޭ)ން ބުނީ, ޗަންގ-އީ-6 ހަނދަށް ދަތުރު ކޮށްފައި ވަނީ, ސައިންޓިފިކް ދިރާސާތައް ހެދުމަށް ބޭނުންވާ ގިނަ ސާމާނާ އެކުގައި ކަމުގައެވެ.
މިއީ, ޗައިނާގެ ޖައްވީ އުޅަނދެއް ހަނދުގެ ދުރު ފަޅިއަށް ޖައްސާފައިވާ ދެވަނަ ފަހަރެވެ. ޗައިނާގެ ޖައްވީ އުޅަނދު, ޗަންގ-އީ-4, ހަނދުގެ ދުރު ފަޅިއަށް ފުރަތަމަ ދަތުރު ކޮށްފައި ވަނީ 2019ވަނަ އަހަރުއެވެ. ޖައްވީ ދިރާސާ ކުރާ ސައިންޓިސްޓުން ބުނީ, ހަނދުގެ ދުރު ފަޅިއަކީ ގިނަ ޢަދަދެއްގެ ހިލަގަނޑުތައް ވެއްޓި, ބޮޑެތި ވަޅުގަނޑުތަކެއް ހެދިފައި އޮންނަ ހިސާބެއް ކަމުގައެވެ. އަދި, އެ ފަރާތަށް ދަތުުރު ކުރުމަކީ މުވާސަލާތީ ގޮތުން ބޮޑެތި ގޮންޖެހުންތަކެއް ހުރި ނުރައްކާތެރި ކަމެއް ކަމުގައެވެ.
ޗަންގ-އީ-6އާ އެކު ޗައިނާގެ ލޮންގ މާޗް 5 މަރުކާގެ ރޮކެޓު އުދުއްސައިލާފައި ވަނީ މޭ 3ވަނަ ދުވަހުއެވެ. ޗައިނާގެ ޖައްވީ އުޅަނދަށް ހަނދާ ހަމައަށް ދަތުރު ކުރަން ހަފުތާއެއްހާ ދުވަސް ހޭދަވިއެވެ. މި ދަތުރުގައި އެ އުޅަނދުގެ ރޮބޮޓް މެދުވެރިކޮށް ހަނދުގެ ފަސްގަނޑުން 2 ކިލޯގެ ފަހާއި ހިލަ ފަދަ މައުދަންތައް އަނބުރާ ދުނިޔެއަށް ގެންނާނެއެވެ. އެ ތަކެއްޗާއެކު ޖައްވީ އުޅަނދު ދުނިޔެއަށް އެނބުރި އައުމަށް ހަމަޖެހިފައި ވަނީ ޖޫން 25ވަނަ ދުވަހުއެވެ.
މި ދަތުރުގައި އެއްކުރާ މައުދަންގެ އެހީތެރިކަމާ އެކު 4.5 މިލިޔަން އަހަރުވެފައިވާ ކަމަށް ބެލެވޭ ހަނދުގެ ތާރީޚާ ގުޅޭ ގިނަ މަޢުލޫމާތުތަކެއް ދިރާސާ ކުރެވޭނެ ކަމަށް ޗައިނާއިން ގަބޫލު ކުރެއެވެ. އަދި, ދުނިޔެ ހިމެނޭ ސޯލާ ސިސްޓަމް ނުވަތަ ސޫރުދަ ނިޒާމާ ގުޅޭ އައު މަޢުލޫމާތުތަކެއް ދެނެގަނެވޭނެ ކަމަށް ސައިންސްވެރިން ދެކެއެވެ.
ޗައިނާގެ ޖައްވީ ޕުރޮގުރާމުގެ އަމާޒަކީ 2030ވަނަ އަހަރުގެ ކުރިން ހަނދަށް އިންސާނުން ފޮނުވުމެވެ. އެ ޕުރޮގުރާމު ކުރިއަށް ގެންދަނީ ރަޝިޔާގެ އެހީތެރިކަމާ އެކުގައެވެ. މީގެ ކުރިން އިންސާނުން ހަނދަށް ދަތުރު ކޮށްފައި ވަނީ އެންމެ ފަހަރަކުއެވެ. 1969ވަނަ އަހަރު އިންސާނުން ހަނދަށް ފޮނުވާފައި ވަނީ އެމެރިކާއިންނެވެ. އެމެރިކާއިން މިހާރު ހިންގަމުންދާ ޔޫއެސް އާޓެމިސް ޕުރޮގުރާމުގެ އަމާޒަކީ ވެސް އިންސާނުން ހަނދަށް ފޮނުވުމެވެ. އެ ޕުރޮގުރާމުގެ ދަށުން ހަނދަށް ދަތުރު ކުރަން ހަމަޖެހިފައި އޮތީ 2026ވަނަ އަހަރުގެ ފަހުކޮޅެވެ.
ޗަންގ-އީ-6އަކީ މި އަހަރުގެ ތެރޭގައި ހަނދަށް ދަތުރު ކޮށްފައިވާ ތިންވަނަ ޖައްވީ އުޅަނދެވެ. ޖަނަވަރީ މަހުގެ ތެރޭގައި ޖަޕާނުން ވެސް ވަނީ ހަނދަށް އުޅަނދެއް ފޮނުވާފައެެވެ. އަދި, އެއަށްފަހު އެމެރިކާގެ އަމިއްލަ ކުންފުނި, އިންޓުއިޓިވް މެޝީންސުން ވެސް ހަނދަށް އުޅަނދެއް ފޮނުވިއެވެ. އޭގެ ކުރިން, ރަޝިޔާއާއި އިންޑިޔާއިން ވެސް ވަނީ ހަނދަށް ޖައްވީ އުޅަނދުތައް ފޮނުވާފައެވެ.