ދައުލަތުގެ ކުންފުނިތަކުގެ ހިންގުން ހަރުދަނާ ކުރުމަށް 5 ދާއިރާއަކުން އެވޯޑުދެނީ

ކޯޕަރޭޓު ގަވަރނަންސް އެވޯޑު 5 ދާއިރާއަކުން ދިނުމަށް ނިންމާ އެވޯޑު ދިނުމުގައި އަމަލުކުރާނެގޮތުގެ އުސޫލު އާއްމުކޮށްފިއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު، ޕީސީބީން ދޭ މި އެވޯޑަކީ ދައުލަތުގެ ކުންފުނިތަކުގެ ހިންގުން ހަރުދަނާކުރުމަށް ބާރުއެޅުމުގެ ގޮތުން ދޭ އެވޯޑެކެވެ. މިއެވޯޑު ދިނުމުގެ ބޭނުމަކީ ދައުލަތުގެ ހުރިހާ ކުންފުނިތަކަކީ ކޯޑް އޮފް ކޯޕަރޭޓް ގަވަރނަންސްގެ އުސޫލުތަކަށް ފުރިހަމައަށް އަމަލުކުރާ ކުންފުނިތަކަކަށްވުމަށް ބާރުއަޅައި، ހިތްވަރު ދިނުމާއި، ކޯޑް އޮފް ކޯޕަރޭޓް ގަވަނަންސަށް އަމަލުކުރާ ކުންފުނިތަކާއި، ކުންފުނިތަކާ ގުޅުންހުރި ފަރާތްތަކުގެ އަގުވަޒަންކުރުން ކަމަށް ޕީސީބީން ބުނެއެވެ.

އެވޯޑުދިނުމަށް ހަމަޖެހިފައިވާ ދާއިރާތައް :

* އެކްސެލެންސް އިން ގަވަރނަންސް
* އައުޓް ސްޓޭންޑިންގ ޕްރޮގްރެސް
* އައުޓްސްޓޭންޑިންގ ބޯޑް ޗެއަރމަން
* އައުޓްސްޓޭންޑިންގ މެނޭޖިންގ ޑިރެކްޓަރ
* އައުޓްސްޓޭންޑިންގ ކޮމްޕެނީ ސެކްރެޓަރީ

ޕީސީބީން ބުނީ މީގެތެރެއިން އައުޓްސްޓޭންޑިންގ ބޯޑު ޗެއަރމަން، އައުޓްސްޓޭންޑިންގ މެނޭޖިންގ ޑިރެކްޓަރ އަދި އައުޓްސްޓޭންޑިންގ ކޮމްޕެނީ ސެކްރެޓަރީ އެވޯޑު ދޭން ފެށުމަށް ހަމަޖެހިފައިވަނީ އުސޫލަށް އަމަލުކުރަން ފަށާތާ 1 އަހަރުދުވަސްފަހުންކަމަށެވެ.

މިއެވޯޑްތަކަށް ނޮމިނޭޓްވާނީ ދައުލަތުގެ ކުންފުނިތަކުގެ ތެރެއިން "ކޯޑް އޮފް ކޯޕަރޭޓް ގަވަރނަންސް ފޮރ ސްޓޭޓް އޯންޑް އެންޓަރޕްރައިސަސް" އަށް ޢަމަލުކުރަންޖެހޭ ސީއެމްޑީއޭގައި ލިސްޓްކޮށްފައި ނުވާ، ދައުލަތް ހިއްސާވާ ކުންފުނިތަކެވެ.

ޕީސީބީން ބުނީ ކުންފުނީގެ އަހަރީ ރިޕޯޓު އާންމުކޮށްފައިނުވާ އަދި ކުންފުނީގެ އަހަރީ އާންމު ޖަލްސާ ބާއްވާފައި ނުވާ ކުންފުނިތަކާއި ޕީސީބީން އިސްލާހީ ފިޔަވަޅެއް އަޅާފައިވާ ފަރާތްތައް މި އެވޯޑުތަކަށް ނޮމިނޭޓުނުކުރެވޭނެކަމަށެވެ.

އެވޯޑުތައް ދޭނެ މިންގަނޑުވެސް އުސޫލުގައި ބަޔާންކޮށްފައިވާއިރު، އެވޯޑް ދޭނެ ފަރާތްތައް ކަނޑައެޅުމުގެ ކަންކަން ކުރާނީ ކޯޕަރޭޓް ގަވަރނަންސް އެވޯޑު ކޮމޓީންނެވެ.