އިންޑިޔާގެ ބައެއް ސަރަޙައްދުތަކުގައި އާދަޔާ ޚިލާފަށް ފިނިހޫނުމިން އުފުލުމާ ގުޅިގެން މަރުވި މީހުންގެ ޢަދަދު 100އިން މައްޗަށް އުފުލިއްޖެއެވެ. އިންޑިޔާއަށް ކުރިމަތިވެފައިވާ ހޫނުގެ ތޫފާނުގެ އަސަރު ކުރަމުންދާ ސަރަޙައްދުތަކުގެ ތެރޭގައި ވެރިރަށް ނިއު ދެއްލީގެ އިތުރުން ރާޖަސްތާނާއި, އޮޅިއްސާއާއި, އުތާރް ޕްރަދޭޝްގެ އިތުރުން ބިހާރް ސްޓޭޓް ހިމެނެއެވެ.
އިންޑިޔާގެ މޫސުމާ ބެހޭ އިދާރާއިން ބުނީ ނިއު ދެއްލީގައި ފިނިހޫނުމިން 50 ޑިގްރީ ސެލްސިއެސަށް އުފުލިފައިވާ ކަމުގައެވެ. ސައިންސްވެރިން ބުނީ, އާދަޔާ ޚިލާފަށް ފިނިހޫނުމިން އުފުލިފައި މި ވަނީ, އިންސާނުންގެ ނޭދެވޭ އަމަލުތަކުގެ ސަބަބުން މޫސުމަށް އަންނަ ބަދަލުތަކާ ގުޅިގެން ކަމުގައެވެ. އަދި, މޫސުމީ ހާލަތު އިތުރަށް ގޯސްވަމުންދާ ކަމުގައި ސައިންސްވެރިން އިންޒާރު ކުރެއެވެ.
އާދަޔާ ޚިލާފަށް ފިނިހޫނުމިން އުފުލުމާ ގުޅިގެން 25,000އަށްވުރެ ގިނަ މީހުންނަށް ހީޓްސްޓްރޯކް ޖެހުނު ކަމަށް ރިޕޯޓުތައް ބުނާއިރު, މި ކަމާ ގުޅިގެން އެތަކެއް ހާސް މީހުންނަށް ޞިއްޙީ މައްސަލަަތައް ކުރިމަތިވި ކަމުގައި އިންޑިޔާގެ އިދާރާތަކުން އަންދާޒާ ކުރެއެވެ. އޮޅިއްސާ ސްޓޭޓްގެ ކާރިސާތަކާ ބެހޭ އިދާރާއިން ބުނީ ހީޓްސްޓްރޯކްގެ ސަބަބުން އެ ސްޓޭޓުން 30 މީހުން މަރުވި ކަމުގައެވެ. ނަމަވެސް, މި ޢަދަދު އުފުލޭނެ ކަމަށް ބެލެވެއެވެ. އިތުރު 97 މީހަކު މަރުވެފައި ވަނީ ހީޓްސްޓްރޯކްގެ ސަބަބުން ކަން ކަށަވަރު ކުރުމަށް އެ އިދާރާއިން ދަނީ މަސައްކަތް ކުރަމުންނެވެ.
މާރިޗު މަހުން ފެށިގެން އިންޑިޔާގެ ބައެއް ސަރަޙައްދުތަކުގައި ފިނިހޫނުމިން އުފުލެން ފަށާފައިވާ ކަމުގައި އެ ޤައުމުގެ މޫސުމާ ބެހޭ އިދާރާއިން ބުންޏެވެ. އޭގެ ތެރޭގައި އެ ޤައުމުގެ އިރާއި އިރުއުތުރުގެ ސަރަޙައްދުތައް ހިމެނޭއިރު, އެ ޤައުމުގެ އުތުރާއި ހުޅަނގުގެ ސަރަޙައްދުތަކުގައި ވެސް ފިނިހޫނުމިން އުފުލި މީހުންގެ ފުރާނަ ގެއްލިފައިވެއެވެ. ހޫނުގެ ތޫފާނުގެ އަސަރު ކުރިއަށް އޮތް ހަފުތާގައި ވެސް އިންޑިޔާގެ ސަރަޙައްދުތަކަށް ކުރާނެ ކަމުގައި މޫސުމާ ބެހޭ އިދާރާއިން އިންޒާރު ކުރިއެވެ.
ނަމަވެސް, އިންޑިޔާގެ އިރުމައްޗާއި ދެކުނުގެ އައްސޭރިފަށުގެ ސަރަޙައްދަށް ވަނީ ވިއްސާރަ މޫސުން ފެށިފައެވެ. އިންޑިޔާގެ އިރުމަތީގައިވާ ސަރަޙައްދުތަކަށް ދާދިފަހުން އެރި ނުރައްކާތެރި ތޫފާން ރިމާލާ ގުޅިގެން މިޒޫރަމް ސްޓޭޓުން 27 މީހުން މަރުވިއެވެ. އަދި, އިރުއުތުރުގައި އޮންނަ އަސަމް ސްޓޭޓުން 14 މީހުން މަރުވިއެވެ.
ދެކުނުގައި އޮތް ކަރްނާޓަކާއި ކެރަލް ސްޓޭޓަށް ބޯކޮށް ވާރޭވެހި, ބައެއް ސަރަޙައްދުތަކުގައި ވަނީ ފެންބޮޑުވެފައެވެ. އިންޑިޔާގެ ޓެކްނޮލޮޖީގެ މައި މަރުކަޒުގެ ގޮތުގައި ބެލެވޭ ކަރްނާޓަކްގެ ބެންގަލޫރޫއަށް 24 ގަޑިއިރުގެ ތެރޭގައި 111.1 މިލިމީޓަރުގެ ވާރޭ ވެހިފައިވާ ކަމުގައި މޫސުމާ ބެހޭ އިދާރާއިން ބުންޏެވެ. މިއީ, 1891ވަނަ އަހަރުގެ ޖޫން މަހަށް ފަހު އެއް ދުވަހުގެ ތެރޭގައި އެ ރަށަށް އެންމެ ގިނައިން ވާރޭވެހިފައިވާ ރެކޯޑެވެ.
އިންޑިޔާގެ އަވައްޓެރި ސްރީލަންކާއަށް ވެސް ދަނީ ވިއްސާރައިގެ އަސަރު ކުރަމުންނެވެ. ސްރީލަންކާގެ ކާރިސާތަކާ ބެހޭ އިދާރާއިން ބުނީ ބޯކޮށް ވާރޭވެހި ފެންބޮޑުވުމާއި, ބިންގަނޑު ކެނޑި ކިސަޑު ފޭބުމާ ގުޅިގެން ހިނގި އެކި ހާދިސާތަކުގައި 15 މީހުން މަރުވެ, އިތުރު ބަޔަކު ޒަޚަމުވެފައިވާ ކަމުގައެވެ.