ފަލަސްޠީނުގެ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓުވުމަށް އެމެރިކާގެ ރައީސް ޖޯ ބައިޑަން ހުށަހަޅުއްވާފައިވާ މަގުޗާޓަށް އދގެ ސަލާމަތީ މަޖިލީހުގެ ރުހުން ހޯދުމަށް އެމެރިކާއިން މަސައްކަތް ފަށައިފިއެވެ. އެމެރިކާއިން ބުނީ, ބައިޑަންގެ މަގުޗާޓަށް އދގެ ސަލާމަތީ މަޖިލީހުގެ ރުހުން ދިނުމުގެ ގޮތުން ޤަރާރެއް ފާސް ކުރަން އެދޭ ކަމުގައެވެ.
މި ގޮތުން, އެމެރިކާއިން ވަނީ މި ކަމާ ގުޅޭ ޤަރާރެއްގެ ދެލިކޮޕީ އެ މަޖިލީހުގެ މެންބަރު ޤައުމުތަކާ ހިއްސާ ކޮށްފައެވެ. އދގެ ސަލާމަތީ މަޖިލީހަށް ޤަރާރެއް ފާސް ކުރެވޭނީ, އެ މަޖިލީހުގެ 15 މެންބަރުންގެ ތެރެއިން ނުވަ މެންބަރުންގެ ތާޢީދާ އެކުގައެވެ. އަދި, އެ މަޖިލީހުގެ ދާއިމީ ފަސް މެންބަރުންގެ ތެރެއިން ޤައުމަކުން ވީޓޯގެ ބާރު ބޭނުން ނުކޮށްފި ނަމައެވެ. އޭގެ ތެރޭގައި ހިމެނެނީ އެމެރިކާއާއި, އިނގިރޭސިވިލާތާއި, ފަރަންސޭސިވިލާތާއި, ޗައިނާގެ އިތުރުން ރަޝިޔާއެވެ.
ބައިޑަންގެ މަގުޗާޓުގައިވާ ކަންކަން އެއްވެސް ޝަރުޠަކާ ނުލައި ބަލައިގަތުމަށް, ޣައްޒާގައި ވެރިކަން ކުރާ ޙަމާސް ޖަމާޢަތަށް އެމެރިކާގެ ޤަރާރުގައި ގޮވައިލާފައިވެއެވެ. އަދި, މަގުޗާޓުގެ ދަށުން އެކުލަވައިލެވޭ އެއްބަސްވުމަކަށް ޙަމާސާއި ޔަހޫދީން ފުރިހަމައަށް އިޙުތިރާމު ކުރަން ޖެހޭނެ ކަމުގައި ވެސް ޤަރާރުގައި ބުނެފައިވެއެވެ. ބައިޑަންގެ މަގުޗާޓުގެ މަޤުޞަދެއްގެ ގޮތުގައި ބުނެފައި ވަނީ, ޣައްޒާގައި ޔަހޫދީ ފައުޖުން ހިންގަމުންދާ ޢުދުވާނާއި, ޔަހޫދީންނާއި ޙަމާސްގެ މުޖާހިދުންނާ ދެމެދު ބަދަލު ކުރަމުންދާ ޙަމަލާތައް ދެމެހެއްޓެނިވި ގޮތެއްގައި ހުއްޓުވުމެވެ.
އެމެރިކާއިން ސަލާމަތީ މަޖިލީހަށް ޤަރާރެއް ހުށަހަޅާފައި މި ވަނީ, އަލްޖީރިޔާއިން އިސްވެ, ޔަހޫދީންގެ ލާއިންސާނީ ޢުދުވާން ހުއްޓައިލުމަށް ގޮވައިލާ އެ މަޖިލީހަށް ޤަރާރެއް ހުށަހަޅާފައިވާ ދަނޑިވަޅެއްގައެވެ. އަދި, ރަފަޙުގައި ހިންގަމުންދާ ޢުދުވާން ވަގުތުން ހުއްޓައިލުމަށް އަލްޖީރިޔާގެ ޤަރާރުގައި ގޮވައިލާފައިވެއެވެ. އދގެ އެންމެ މަތީ ކޯޓު, އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ)ން ވެސް ވަނީ, ރަފަޙުގައި ޔަހޫދީ ފައުޖުން ހިންގަމުންދާ ޢުދުވާން ވަގުތުން ހުއްޓައިލުމަށް ޔަހޫދީންގެ މައްޗަށް އަމުރު ކޮށްފައެވެ.
ބައިޑަން ވިދާޅުވީ އޭނާގެ މަގުޗާޓުގައިވާ ކަންކަން ބަލައިގަންނާނެ ކަމުގައި ޔަހޫދީން ބުނެފައިވާ ކަމުގައެވެ. އަދި, ޙަމާސަށް މަގުޗާޓުގައިވާ ކަންކަން ހުށަހަޅާފައިވާ ކަމަށާއި, މަގުޗާޓުގެ ދަށުން އެކުލަވައިލެވޭ އެއްބަސްވުމެއް ފުރިހަމައަށް ތަންފީޒު ކުރަން އެމެރިކާއާއި ޤަޘަރުގެ އިތުރުން މިޞްރުން ގުޅިގެން މަސައްކަތް ކުރާނެ ކަމުގައެވެ. ޔަހޫދީންނާއި ޙަމާސްގެ މުޖާހިދުންނާ ދެމެދު ސުލްހައިގެ މަޝްވަރާތައް ވިލަރެސް ކުރަނީ ޤަޠަރާއި މިޞްރު ގުޅިގެންނެވެ.
ޔަހޫދީން އެއްބަސްވެފައިވާ ކަންކަމުގެ މައްޗަށް ބިނާކޮށް ހުށަހަޅާފައިވާ މަގުޗާޓަކީ ތިން މަރުޙަލާއަކަށް ބިނާ ކޮށްފައިވާ މަގުޗާޓެއް ކަމުގައި ބައިޑަން ވިދާޅުވިއެވެ. މިގޮތުން, ފުރަތަމަ މަރުޙަލާގައި ހިމެނެނީ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ދެމުންދާ ރަޙުމު ކުޑަ ޙަމަލާތައް ހަ ހަފުތާގެ މުއްދަތަކަށް މެދުކަނޑައިލުމެވެ. އަދި, ޣައްޒާގެ އާބާދީ ބޮޑު ސަރަޙައްދުތަކަށް އަރައިގަނެފައިވާ ޔަހޫދީ ފައުޖުގެ އިސްތިޢުމާރީ ސިފައިންގެ އެ ސަރަޙައްދުތަކުން ފޭބުމެވެ.
ޣައްޒާގައި ވެރިކަން ކުރާ ޙަމާސް ޖަމާޢަތުން ރަހީނު ކޮށްފައިވާ ޔަހުދީ އަސީރުންގެ ތެރެއިން ބައެއް މީހުން, މަގުޗާޓުގެ ފުރަތަމަ މަރުޙަލާގެ ދަށުން މިނިވަން ކުރެވޭނެއެވެ. އޭގެ ތެރޭގައި ހިމެނެނީ އަންހެނުންނާއި އުމުރުން ދުވަސްވީ މީހުންނެވެ. އަދި, އޭގެ ބަދަލުގައި, ޔަހޫދީ ފައުޖުން ހައްޔަރުކޮށް ޖަލަށްލާފައިވާ ފަލަސްޠީނުގެ މުސްލިމުންގެ ތެރެއިން ގިނަ ޢަދަދެއްގެ ބަޔަކު ދޫކޮށްލަން ޖެހޭނެއެވެ. އަދި, އެއްވެސް ހުރަހަކާ ނުލައި ޣައްޒާއަށް ކާބޯތަކެއްޗާއި އިންސާނީ އެހީގެ ސާމާނު އެތެރެ ކުރުމުގެ ފުރުޞަތު ޔަހޫދީން ފަހިކޮށްދޭން ޖެހޭނެއެވެ.
ޙަމާސުން ބުނީ ޔަހޫދީންގެ ލާއިންސާނީ ޢުދުވާން ހުއްޓުވައި, ޣައްޒާގެ ރައްޔިތުންނަށް އެ މީހުންގެ ވަޒަނަށް އެނބުރި ދިޔުމުގެ ފުރުޞަތުދީ, އެ ސަހަރަށް އަރާފައިވާ ޔަހޫދީ ފައުޖުގެ އިސްތިޢުމާރީ ސިފައިން ބޭލުމަށް އެ ޖަމާޢަތުން ތާޢީދުކޮށް އެއްބާރުލުން ދޭނެ ކަމުގައެވެ. އަދި, އެ މަގުޗާޓުގެ ދަށުން އެ ޖަމާޢަތުން ރަހީނު ކޮށްފައިވާ ޔަހޫދީ އަސީރުން މިނިވަން ކުރާނެ ކަމުގައި ވެސް އެ ޖަމާޢަތުން ބުންޏެވެ.
ބައިޑަންގެ ހުށަހެޅުން ބަލައިގަތުމަށް އޭނާގެ އިތުރުން އޭނާގެ ޚާރިޖީ ވަޒީރު އެންތަނީ ބްލިންކަން ވެސް ވަނީ ޔަހޫދީންނަށް ގޮވައިލައްވާފައެވެ. އެމެރިކާގެ ޚާރިޖީ ވުޒާރާއިން ބުނީ, ޒަޔަނިސްޓު އިސްރާއީލުގެ ހަނގުރާމައިގެ ކެބިނެޓުގެ މެންބަރު ބެނީ ގަންޓްޒާއި, ޖައްބާރު ދިފާޢީ ވަޒީރު ޔޮއަވް ގަލަންޓަށް ބްލިންކަން ފޯނުން ގުޅުއްވައި ބައިޑަންގެ ހުށަހެޅުން ބަލައިގަތުމަށް ބާރު އަޅުއްވާފައިވާ ކަމުގައެވެ. ބައިޑަންގެ ހުށަހެޅުން ބަލައިގަތުމަށް ގޮވައިލައި ބައިނަލްއަޤުވާމީ މުޖުތަމަޢުން ވެސް ދަނީ ޔަހޫދީންނަށް ބާރު އަޅަމުންނެވެ.
މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 36,479އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 82,777އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.