ވިލާތުގެ އިއްތިހާދުގެ ޤައުމެއް ކަމުގައިވާ ސްލޮވީނިޔާއިން ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަނެފިއެވެ. ފަލަސްޠީނުުގެ މިނިވަން ކަން ބަލައިގަތުމަށް ސްލޮވީނިޔާގެ ސަރުކާރުން ނިންމައި, އެ ޤައުމުގެ ޤާނޫނު ހަދާ މަޖިލީހުގެ ރުހުން ހޯދަން ހުށަހަޅާފައި ވަނީ ހުސްވި ހަފުތާގައެވެ. އަދި, ޤާނޫނު ހަދާ މަޖިލީހުން މި ވަނީ އެ ކަމަށް ރުހުން ދީފައެވެ.
ސްލޮވީނިޔާއިން ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަނެފައި މި ވަނީ, މޭ 28ވަނަ ދުވަހު ވިލާތުގެ އިތުރު ތިން ޤައުމަކުން ފަލަސްޠީނުގެ މިނިވަން ކަން ބަލައިގަނެފައިވާ ދަނޑިވަޅެއްގައެވެ. އެއީ ސްޕެއިނާއި, ނޯވޭގެ އިތުރުން އަޔަލެންޑެވެ. ސްލޮވީނިޔާގެ އިތުރުން އެ ތިން ޤައުމުން ވެސް ފަލަސްޠީނުގެ މިނިވަން ބަލައިގަނެފައި ވަނީ ޣައްޒާގެ މުސްލިމުން ޝަހީދުކޮށް ނައްތައިލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓުވަން ބާރު އެޅުމުގެ ގޮތުންނެވެ.
"މިއަދު ފަލަސްޠީނުގެ ސިޔާދަތާއި މިނިވަން ކަން ބަލައިގަނެ އަޅުގަނޑުމެން މި ވަނީ [ފަލަސްޠީނުގެ] ހުޅަނގު އައްސޭރިއާއި ޣައްޒާގެ ރައްޔިތުންނަށް އުންމީދު އައު ކޮށްދީފައި،" ސްލޮވީނިޔާގެ ބޮޑުވަޒީރު ރޮބަރޓް ގޮލޯބް ވިދާޅުވިއެވެ. މި ކަމާ މެދު ސްލޮވީނިޔާގެ ޤާނޫނު ހަދާ މަޖިލީހުގައި ނެގި ވޯޓު ފާސްވެފައި ވަނީ ބޮޑު އަޣުލަބިއްޔަތަކުންނެވެ.
ނަމަވެސް, އެ ޤައުމުގެ ކުރީގެ ބޮޑުވަޒީރު ޔަނެސް ޔާންޝާގެ ސްލޮވީނިޔަން ޑިމޮކްރެޓިކް ޕާޓީ (އެސްޑީއެސު)ން ވަނީ އެ ކަމަށް ހުރަސް އަޅަން މަސައްކަތް ކޮށްފައެވެ. އެ ޕާޓީން ހުށަހަޅާފައި ވަނީ, މި ކަމާ މެދު ގޮތެއް ނިންމުމަށް ފެންނަ ނުފެންނަ ވޯޓެއް ނެގުމުގެ ފުރުޞަތު އެ ޤައުމުގެ ރައްޔިތުންނަށް ދިނުމަށެވެ. މިއީ, ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމަށް އެންމެ މުނާސަބު ވަގުތު ނޫން ކަމުގައި އެ ޕާޓީން ވަކާލާތު ކުރެއެވެ.
ސްލޮވީނިޔާގެ ނިންމުމާ އެކު ފަލަސްޠީނުގެ މިނިވަން ކަން ބަލައިގަނެފައިވާ އީޔޫގެ މެންބަރު ޤައުމުތަކުގެ ތެރޭގައި ސްވިޑެން, ސައިޕްރަސް, ހަންގެރީ, ޗެކް ރިޕަބްލިކް, ޕޮލެންޑް, ސްލޮވާކިޔާ, ރޮމޭނިޔާ އަދި ބުލްގޭރިޔާ ހިމެނެއެވެ. މޯލްޓާއިން ވެސް ދަނީ ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލަގަތުމާ މެދު މަޝްވަރާ ކުރަމުންނެވެ. މިއާ އެކު, ބައިނަލްއަޤުވާމީ މައިދާނުގައި ޒަޔަނިސްޓު އިސްރާއީލު އިތުރަށް ބާކީވެގެން ދާނެއެވެ.
ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމަށް ވިލާތުގެ ގިނަ ޤައުމުތަކަށް އޮތް އެންމެ ބޮޑު ހުރަހަކީ ޔަހޫދީންގެ މަސްލަޙަތު ހިމާޔަތް ކުރަން ފޫގަޅައިގެން އޮތް އެމެރިކާއެވެ. އަދި, އީޔޫގެ ބާރުގަދަ ޤައުމުތަކުގެ ތެރޭގައި ހިމެނޭ ޖަރުމަނުވިލާތުން ވަނީ އެމެރިކާގެ އަވައިގައި ޖެހި, ފަލަސްޠީނުގެ މިނިވަން ކަން ބަލައިގަތުމަށް ދެކޮޅު ހަދާފައެވެ. އެމެރިކާއާއި ޖަރުމަނުވިލާތަކީ ޔަހޫދީންގެ އެންމެ ބޮޑު މަދަދުގާރުންގެ ގޮތުގައި ބެލެވޭ ޤައުމުތަކުގެ ލިސްޓުގައި އެންމެ ކުރީގައި އޮތް ދެ ޤައުމެވެ.
މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 36,550އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 82,959އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.