ފަލަސްޠީނުގެ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ދަށުން, އެ ސަހަރުގެ މެދުތެރެއާއި ދެކުނުގައި އޮންނަ ރެފިއުޖީ ކޭމްޕުތަކަށް އަމާޒުކޮށް ރަޙުމު ކުޑަ ޙަމަލާތަކެއްދީ 19 މީހުން ޝަހީދު ކޮށްލައިފިއެވެ. އޭގެ ތެރޭގައި ދެ ފުލުހުން ހިމެނޭއިރު, އެ މީހުން ޝަހީދު ކޮށްލާފައި ވަނީ އެހީގެ ސާމާނު ބަހަމުން ދިޔަ ސަރަޙައްދެއްގައި އަމަން ބަލަހައްޓަމުން ދަނިކޮށެވެ.
ޔަހޫދީ ފައުޖުގެ ޙަމަލާތައް އަމާޒު ކޮށްފައި ވަނީ އަލް-ބުރަޔިޖާއި އަލް-މަޣާޛީ ރެފިއުޖީ ކޭމްޕުގެ އިތުރުން ޣައްޒާގެ މެދުތެރޭގައި އޮންނަ ދަޔިރު އަލް-ބަލަޙަށެވެ. މީގެ އިތުރުން, އަލް-ނުޞަޔިރާތު ރެފިއުޖީ ކޭމްޕު ހުންނަ ސަރަޙައްދަށް ވެސް ޔަހޫދީ ފައުޖުގެ އަސްކަރީ ޓޭންކުތަކުން ވަނީ ވަރުގަދަ ޙަމަލާތަކެއް ދީފައެވެ. މި ޙަމަލާގައި 15 މީހުން ޝަހީދު ކޮށްލާފައިވާއިރު, އޭގެ ތެރޭގައި ގިނައީ އަންހެނުންނާއި މައުސޫމު ކުޑަކުދިންނެވެ.
މީގެ ތެރެއިން އަލް-މަޣާޛީއަށް ދީފައިވާ ބައެއް ޙަމަލާތައް އަމާޒު ކޮށްފައި ވަނީ ޞިއްޙީ ފަރުވާދޭ ކްލިނިކަކަށެވެ. އެ ރެފިއުޖީ ކޭމްޕުގައި ދިރިއުޅޭ ރައްޔިތުން ބުނީ, ޔަހޫދީ ފައުޖުގެ ޙަމަލާތަކުގެ ނުރައްކާ އިތުރުވުމާ ގުޅިގެން, ގިނަ ޢަދަދެއްގެ ބަޔަކު ރެފިއުޖީ ކޭމްޕު ދޫކޮށް އެހެން ސަރަޙައްދުތަކަށް ދަތުރު ކުރަމުންދާ ކަމުގައެވެ.
ޣައްޒާގެ އެންމެ ދެކުނުން އޮތް ރަފަޙުގައި ވެސް ޔަހޫދީ ފައުޖުން ދަނީ އަސްކަރީ ޓޭންކުފަހަރާއި ބަރުހަތިޔާރާ އެކު ހަރަކާތްތެރިވަމުންނެވެ. އަދި, އެ ރަށުގައި ތިބި ރެފިއުޖީންނާ ދެކޮޅަށް ގަތުލުއާންމުތައް ހިންގަމުންނެވެ. މި ކަމާ ގުޅިގެން އެ ރަށުގައި ތިބި ރެފިއުޖީންގެ ތެރެއިން މިލިޔަނަކަށް ވުރެ ގިނަ މީހުން އެ ރަށުން ފައިބާފައިވާ ކަމުގައި ފަލަސްޠީނުގެ ރެފިއުޖީންނަށް އެހީތެރިކަން ފޯރުކޮށްދޭ އދގެ އިދާރާ (ޔޫއެންއާރްޑަބްލިޔުއޭ)ން ބުންޏެވެ.
ފަލަސްޠީނުގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓުމަކަށް ގެނައުމަށް އެމެރިކާގެ ރައީސް ޖޯ ބައިޑަން ދާދި ފަހުން ވަނީ ސުލްޙައިގެ މަގުޗާޓެއް ހުށަހަޅުއްވާފައެވެ. ޔަހޫދީންނާއި ޣައްޒާގައި ވެރިކަން ކުރާ ޙަމާސް ޖަމާޢަތާ ދެމެދު ސުލްޙައިގެ ވާހަކަތައް ވިލަރެސް ކުރާ ޤަޠަރުން ބުނީ, ބައިޑަންގެ މަގުޗާޓުގައިވާ ކަންކަން ޙަމާސް ޖަމާޢަތާ ހިއްސާ ކޮށްފައިވާ ކަމުގައެވެ.
"ދެ ފަރާތުގެ ދެމެދުގައި އެކުލަވައިލެވޭ އެއްބަސްވުމެއްގެ ދަށުން ވަގުތުން ޢުދުވާންތައް ހުއްޓައިލައި, ޣައްޒާގެ މުސްލިމުންނަށް ދެމުންދާ އަނިޔާތައް ހުއްޓައިލައި, ހާލުގައި ޖައްސާފައިވާ މީހުންނަށް ކާބޯތަކެއްޗާއި އިންސާނީ އެހީގެ ސާމާނު ފޯރުކޮށްދިނުމުގެ މަސައްކަތް ވަގުތުން ފަށަން ޖެހޭނެ،" ޤަޠަރުގެ ޚާރިޖީ ވުޒާރާގެ ތަރުޖަމާނު މާޖިދު އަލް-އަންޞާރީ ވިދާޅުވިއެވެ.
ބައިޑަންގެ ހުށަހެޅުމަށް ބިނާކުރަނިވި ޖަވާބެއް ދޭނެ ކަމުގައި ޙަމާސުން ބުންޏެވެ. ނަމަވެސް, ޣައްޒާގެ ޢުދުވާން ހުއްޓައިލައި, އެ ސަހަރަށް އަރާފައިވާ ޔަހޫދީ ފައުޖުގެ އިސްތިޢުމާރީ ސިފައިން އެ ސަހަރުން ބޭލުމަކީ ޙަމާސްގެ ޝަރުޠެކެވެ. ޔަހޫދީން ބުނީ, ޙަމާސް ޖަމާޢަތުގެ ހުރިހާ މުޖާހިދުން ޝަހީދުކޮށް, އެ ޖަމާޢަތް ނައްތައިލުމަކީ އެ މީހުންގެ އެންމެ ބޮޑު އަމާޒު ކަމުގައެވެ. އަދި, އެ ކަން ހާސިލުނުވާ އެއްބަސްވުމަކަށް ރުހުން ނުދޭނެ ކަމުގައެވެ.
ޔަހޫދީން އެއްބަސްވެފައިވާ ކަންކަމުގެ މައްޗަށް ބިނާކޮށް ހުށަހަޅާފައިވާ މަގުޗާޓަކީ ތިން މަރުޙަލާއަކަށް ބިނާ ކޮށްފައިވާ މަގުޗާޓެއް ކަމުގައި ބައިޑަން ވިދާޅުވިއެވެ. މިގޮތުން, ފުރަތަމަ މަރުޙަލާގައި ހިމެނެނީ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ދެމުންދާ ރަޙުމު ކުޑަ ޙަމަލާތައް ހަ ހަފުތާގެ މުއްދަތަކަށް މެދުކަނޑައިލުމެވެ. އަދި, ޣައްޒާގެ އާބާދީ ބޮޑު ސަރަޙައްދުތަކަށް އަރައިގަނެފައިވާ ޔަހޫދީ ފައުޖުގެ އިސްތިޢުމާރީ ސިފައިންގެ އެ ސަރަޙައްދުތަކުން ފޭބުމެވެ.
ޣައްޒާގައި ވެރިކަން ކުރާ ޙަމާސް ޖަމާޢަތުން ރަހީނު ކޮށްފައިވާ ޔަހުދީ އަސީރުންގެ ތެރެއިން ބައެއް މީހުން, މަގުޗާޓުގެ ފުރަތަމަ މަރުޙަލާގެ ދަށުން މިނިވަން ކުރެވޭނެއެވެ. އޭގެ ތެރޭގައި ހިމެނެނީ އަންހެނުންނާއި އުމުރުން ދުވަސްވީ މީހުންނެވެ. އަދި, އޭގެ ބަދަލުގައި, ޔަހޫދީ ފައުޖުން ހައްޔަރުކޮށް ޖަލަށްލާފައިވާ ފަލަސްޠީނުގެ މުސްލިމުންގެ ތެރެއިން ގިނަ ޢަދަދެއްގެ ބަޔަކު ދޫކޮށްލަން ޖެހޭނެއެވެ. އަދި, އެއްވެސް ހުރަހަކާ ނުލައި ޣައްޒާއަށް ކާބޯތަކެއްޗާއި އިންސާނީ އެހީގެ ސާމާނު އެތެރެ ކުރުމުގެ ފުރުޞަތު ޔަހޫދީން ފަހިކޮށްދޭން ޖެހޭނެއެވެ.
މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 36,550އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 82,959އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.