ޒަޔަނިސްޓު އިސްރާއީލުގެ ޔަހޫދީ ފައުޖާ ދެކޮޅަށް ހަނގުރާމަ ކުރަން ލުބްނާނުގެ ހަތިޔާރު އެޅި ޖަމާޢަތް, ޙިޒްބުالله ތައްޔާރަށް އޮތް ކަމުގައި އެ ޖަމާޢަތުގެ އިސްވެރިޔަކު ވިދާޅުވެއްޖެއެވެ. ނަމަވެސް, ޙިޒްބުاللهގެ ނައިބު ލީޑަރު ޝައިޚް ނަޢީމް ޤާސިމް ވިދާޅުވީ, ބޮޑު ހަނގުރާމައެއް ފަށައި, ސަރަޙައްދީ ހަމަޖެހުން ނަގައިލުމަކީ އެ ޖަމާޢަތުގެ އަމާޒު ނޫން ކަމުގައެވެ.
2023 އޮކްޓޫބަރު 7ވަނަ ދުވަހު ފަލަސްޠީނުގެ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ލާއިންސާނީ ޢުދުވާނެއް ފެށުމާ އެކު, ޙިޒްބުاللهން ވެސް ވަނީ ޔަހޫދީންނާ ދެކޮޅަށް ހަތިޔާރު އުފުލާފައެވެ. އަދި, އެ ޖަމާޢަތުގެ ހަނގުރާމަވެރިން ކޮންމެ ދުވަހަކު ވެސް ދަނީ, އިސްރާއީލުގެ އުތުރުގެ ރަށްތަކާއި, ޔަހޫދީ ފައުޖުގެ އަމާޒުތަކަށް ވަރުގަދަ ޙަމަލާތަކެއް އަމާޒު ކުރަމުންނެވެ. މި ޙަމަލާތަކުގެ ރައްދުގައި ޔަހޫދީ ފައުޖުން ވެސް ދަނީ ލުބްނާނަށް ޙަމަލާ ދެމުންނެވެ.
"[ޒަަޔަނިސްޓު] އިސްރާއީލުން ލުބްނާނަށް ހަނގުރާމަ ފުޅާކޮށްފި ނަމަ, އެ މީހުންނަށް ކުރިމަތިލާން ޖެހޭނީ ފަނާކުރަނިވި, އަދި ހަލާކު ގެނުވާނެ ހަނގުރާމައަކާ. އިސްރާއީލުގެ ރައްޔިތުން އެ މީހުންގެ ވަޒަނުން ބޭރު ކުރުވާނެ ވަރުގަދަ ހަނގުރާމައަކާ. އިސްރާއީލާ ދެކޮޅަށް ހަނގުރާމަ ކުރަން އަޅުގަނޑުމެން ތައްޔާރު،" ޤާސިމް ވިދާޅުވިއެވެ.
އޭނާ ވިދާޅުވީ, ޣައްޒާއާއި ލުބްނާނަކީ ގުޅިފައިވާ އެކަތިގަނޑެއް ކަމުގައެވެ. ޙިޒްބުاللهގެ އިސްވެރިޔާ ޙަސަން ނަޞްރުالله ވެސް ވަނީ, ޣައްޒާގެ މުސްލިމުންނަށް ތާޢީދު ކުރުމުގައި އެ ޖަމާޢަތުން ދެ ގޮތެއް ނުވެ ދެމި އޮންނާނެ ކަމުގައެވެ. ޙިޒްބުاللهން ދާދި ފަހުން ވަނީ އިސްރާއީލުގެ ރަށްތަކުގެ އިތުރުން, ލުބްނާނާ ގުޅޭ ސަރަޙައްދީ ރޮނގު ކައިރީގައި ހަރަކާތްތެރިވާ ޔަހޫދީ ފައުޖުގެ އަނިޔާވެރި ސިފައިންގެ އަމާޒުތަކަށް ދެމުންދާ ޙަމަލާތައް ވަރުގަދަކޮށް, ފުޅާ ކޮށްފައެވެ.
މި ޙަމަލާތަކުގައި ޙިޒްބުاللهން ވަނީ ނުރައްކާތެރި އަދި ފަނާކުރަނިވި ޑްރޯންތަކެއް ވެސް ބޭނުން ކުރަން ފަށާފައެވެ. މިއީ, ޔަހޫދީ ފައުޖުން ލުބްނާނަށް ދެމުންދާ ވައިގެ ޙަމަލާތަކުގެ ރައްދުގައި ދެމުންދާ ޙަމަލާތަކެއް ކަމުގައި އެ ޖަމާޢަތުން ބުންޏެވެ. ޙިޒްބުاللهގެ ޙަމަލާތައް އިތުރު ކުރުމާ އެކު, އިސްރާއީލުގެ އުތުރުގައި އޮންނަ ރަށްތަކުގައި ވަނީ އިންޒާރުގެ ރަނގަބީލު ޖަހަން ފަށާފައެވެ.
ޔަހޫދީ ފައުޖާއި ޙިޒްބުاللهއާ ދެެމެދު އެންމެ ފަހުން ހަނގުރާމައެއް ކޮށްފައި ވަނީ 2006ވަނަ އަހަރުއެވެ. އެ ފަހަރު, ދެ ޤައުމު ގުޅޭ ސަރަޙައްދީ ރޮނގު ކައިރީގައި ދިރިއުޅޭ އެތަކެއް ހާސް ބަޔަކަށް އަމިއްލަ ވަޒަން ދޫކޮށް ރައްކާތެރި ހިސާބުތަކަށް ބަދަލުވާން މަޖުބޫރުވިއެވެ. 2006ވަނަ އަހަރުގެ ހާލަތާ އަޅައިބަލާއިރު މި ވަގުތު މަސްރަޙު އިތުރަށް ހޫނުވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.
އޮކްޓޫބަރު 7ން ފެށިގެން ޔަހޫދީ ފައުޖާއި ޙިޒްބުاللهއާ ދެމެދު ބަދަލު ކުރަމުންދާ ޙަމަލާތަކުގައި ޙިޒްބުاللهގެ 300އަށްވުރެ ގިނަ މެންބަރުން ވަނީ ޝަހީދު ކޮށްލާފައެވެ. އަދި, ލުބްނާންގެ ޢާންމުންގެ 80އަށްވުރެ ގިނަ މީހުން ޝަހީދު ކޮށްލާފައެވެ. އޭގެ ތެރޭގައި ގިނަ ޢަދަދެއްގެ ޞިއްޙީ ޚިދުމަތްތެރިން ހިމެނެއެވެ. މި ޙަމަލާތަކުގެ ރައްދުގައި ޙިޒްބުاللهން ވެސް ވަނީ ޔަހޫދީ ފައުޖުގެ 18 ސިފައިން މަރައިލައި, ޢާންމުންގެ 10 ވަރަކަށް މީހުން މަރައިލާފައެވެ.