ފަލަސްޠީނުގެ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓައިލަން އިސްރާއީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ދެކޮޅު ހަދަމުން ދަނީ ސިޔާސީ މަޤުޞަދުތަކެއް ހާސިލު ކުރުމުގެ ބޭނުމުގައި ކަމަށް ބެލެވޭ ކަމުގައި އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ. އެމެރިކާ ނޫސް, ޓައިމް މެގެޒިނަށް ދެއްވި ބަސްދީގަތުމެއްގައި ބައިޑަން ވަނީ ޔަހޫދީންގެ ލާއިންސާނީ ޢުދުވާނާ ގުޅޭ ގޮތުން ފުޅާ ދާއިރާއެއްގައި ވާހަކަފުޅު ދައްކަވާފައެވެ.
ޔަހޫދީންގެ ޢުދުވާނާއި ގަތުލުއާންމުތައް ހުއްޓުމަކަށް ގެނައުމަށް ބައިޑަން ވަނީ މަގުޗާޓެއް ހުށަހަޅުއްވާފައެވެ. މި މަގުޗާޓަށް ބިނާކުރިނިވި ރައްދެއް ދޭނެ ކަމުގައި ޣައްޒާގައި ވެރިކަން ކުރާ ޙަމާސް ޖަމާޢަތުން ބުނެފައިވީ ނަމަވެސް, ބައިޑަންގެ ހުށަހެޅުމަށް ޖައްބާރު ނަތަންޔާހޫގެ ސަރުކާރުން ވަނީ ފާޑު ކިޔާފައެވެ. ނަމަވެސް, ބައިޑަންގެ ހުށަހެޅުމާ ދެކޮޅު ހަދާނެ ކަމުގައި ޔަހޫދީން ބުނެފައެއް ނުވެއެވެ.
ޔަހޫދީންގެ ލާއިންސާނީ ޢުދުވާން ހުއްޓައިލަން ޖައްބާރު ނަތަންޔާހޫ ދެކޮޅު ހަދަމުން ދަނީ ސިޔާސީ މަޤުޞަދުތަކެއް ހާސިލު ކުރުމުގެ ބޭނުމުގައި ކަމަށް ޤަބޫލު ކުރެވޭތޯ ސުވާލު ކުރުމުން ބައިޑަން ވިދާޅުވީ "އެ ގޮތަށް ކަން ހިނދަމުންދާ ކަމަށް ބެލުމުގެ ފުރުޞަތު އެންމެންނަށް ވެސް އެބައޮތް" ކަމުގައެވެ. ނަމަވެސް, ބައިޑަން މި ކަމާ ގުޅޭ އިތުރު ތަފުސީލު ދެއްވާފައެއް ނުވެއެވެ.
ޔަހޫދީންގެ ލާއިންސާނީ ޢުދުވާނުގައި އިންސާނިއްޔަތާ ބެހޭ ބައިނަލްއަޤުވާމީ ޤާނޫނުތަކާ ޚިލާފު އެތަކެއް އަމަލެއް, އަދި ހަނގުރާމައިގެ ކުށްތަކެއް ޔަހޫދީ ފައުޖުގެ އަނިިޔާވެރި ސިފައިން ދަނީ ހިންގަމުންނެވެ. ބައިޑަން ވިދާޅުވީ, ޔަހޫދީ ފައުޖުން އެ ފަދަ އަމަލުތަކެއް ހިންގާފައިވާ ކަން ކަށަވަރުކޮށް ބުނެދެއްވަން އެނގިވަޑައިނުގަންނަވާ ކަމުގައެވެ. "ނަމަވެސް, ސުވާލު އުފެދޭ ކަންކަން ހިނގާފައިވާ ކަން ގަބޫލު ކުރަން،" ބައިޑަން ވިދާޅުވިއެވެ.
އޭނާ ވިދާޅުވީ, 2001ވަނަ އަހަރުގެ ސެޕްޓެންބަރު 11އަށް ފަހު އެމެރިކާއިން މެދުއިރުމައްޗާއި އޭޝިޔާގައި ފެށި ހަނގުރާމަތަކުގައި ހެދި ގޯސްތައް ތަކުރާރު ނުކުރަން އެނާ ޖައްބާރު ނަތަންޔާހޫއަށް ނަސޭހަތްތެރިވެފައިވާނެ ކަމުގައެވެ. އެމެރިކާގެ ނިންމުންތަކާ އެކު "ނިމުމެއް ނެތް ހަނގުރާމަތަކެއް" ފެށިގެން ދިޔަކަން ފާހަގަކުރައްވައި ބައިޑަން ވިދާޅުވީ "އެ މީހުން [ޔަހޫދީން] އެ ދަނީ އެ ގޯސްތައް ތަކުރާރު ކުރަމުން" ކަމުގައެވެ.
ޓައިމްސްއަށް ދެއްވި ބަސްދީގަތުމުގައި ޖައްބާރު ނަތަންޔާހޫއާ ދެކޮޅަށް ބައިޑަން ދެއްކެވި ވާހަކަފުޅުތަކާ މެދު ޒަޔަނިސްޓު އިސްރާއީލުން ވަނީ ނުރުހުން ފާޅުކޮށްފައެވެ. އިސްރާއީލުގެ ސަރުކާރުގެ ތަރުޖަމާނެއް ބުނީ, ބައިޑަން ދައްކަވާފައިވާ ވާހަކަފުޅުތަކަކީ, ހަމަ ބުއްދިން ވިސްނާ އެއްވެސް ޤައުމެއްގެ ވެރިއަކު ދައްކަވާނެ ފަދަ ވާހަކަފުޅުތަކެއް ނޫން ކަމުގައެވެ. އަދި, ޚާރިޖީ ސިޔާސަތުތަކާ ފުށުއަރާ ވާހަކަފުޅުތަކެއް ކަމުގައެވެ.
މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 36,550އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 82,959އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.