ފަލަސްޠީނުގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޣައްޒާގެ މަދަރުސާއަކަށް ޙަމަލާދީ 40 މީހުން ޝަހީދު ކޮށްލަން ދިން ރަޙުމު ކުޑަ ޙަމަލާގައި ބޭނުން ކޮށްފައި ވަނީ އެމެރިކާއިން ފޯރު ކޮށްދީފައިވާ ހަތިޔާރުތަކެއް ކަން ހާމަވެއްޖެއެވެ. ޔަހޫދީ ފައުޖުން ބޮންއަޅާފައި ވަނީ އަލް-ނުޞަޔިރާތު ރެފިއުޖީ ކޭމްޕުގައި ހުންނަ އދއިން ހިންގާ އަލް-ސަރްދީ މަދަރުސާއަށެވެ.
އަމިއްލަ ވަޒަން ގެއްލިފައިވާ ގިނަ ޢަދަދެއްގެ ރެފިއުޖީން ދިރިއުޅެމުން ދިޔަ މަދަރުސާއަށް ޔަހޫދީ ފައުޖުން ބޮން އަޅާފައި ވަނީ އެއްވެސް އިންޒާރަކާ ނުލައެވެ. އެ ޙަމަލާގައި ޝަހީދު ކޮށްލާފައިވާ މީހުންގެ ތެރޭގައި 14 ކުޑަކުދިންނާއި ނުވަ އަންހެނުން ހިމެނެއެވެ. އަދި, 74އަށްވުރެ ގިނަ މީހުން ޒަޚަމު ކޮށްލިއެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.
މަދަރުސާއަށް ބޮންއަޅަން ޔަހޫދީ ފައުޖުން ބޭނުން ކޮށްފައިވާ ހަތިޔާރުތަކުގެ ބައިތައް ފެނިފައިވާއިރު, އޭގެ ތެރެއިން ބައެއް ތަކެއްޗަކީ އެމެރިކާގެ ކުންފުންޏެއް ކަމުގައިވާ ހަނީވެލުން އުފައްދާފައިވާ ހަތިޔާރުތަކެއް ކަން ވަނީ ހާމަވެފައެވެ. ހަނީވެލަކީ އަަސްކަރީ ހަތިޔާރަށް ބޭނުންވާ ސެންސަރތަކާއި ގައިޑެންސް އާލާތްތަކުގެ އިތުރުން ގައިޑެޑް ބޮމާއި މިސައިލް އުފައްދާ ކުންފުންޏެކެވެ.
2014ވަނަ އަހަރު ޣައްޒާގެ ޝަޖާޢައްޔަތުގެ ގެއަކަށް ބޮން އަޅަން ވެސް ޔަހޫދީ ފައުޖުން ހަނީވެލް ކުންފުނިން އުފައްދާފައިވާ ހަތިޔާރު ބޭނުންކޮށްފައިވެއެވެ. ހަތިޔާރާ ބެހޭ މާހިރެއް ކަމުގައިވާ އެލައިޖާ މަގްނިއޭ ވިދާޅުވީ, 2000ވަނަ އަހަރުން ފެށިގެން ހަނީވެލް ކުންފުނިން ޔަހޫދީންނަށް ނުރައްކާތެރި, ފަނާކުރަނިވި ހަތިޔާރު ފޯރުކޮށްދެމުންދާ ކަމުގައެވެ.
ހަނީވެލުން އުފައްދާފައިވާ ހަތިޔާރު ބޭނުންކޮށް, އަލް-ސަރްދީ މަދަރުސާއަށް ބޮން އަޅައި, 40އެއްހާ މީހުން ޝަހީދު ކޮށްލި ހާދިސާއާ ގުޅޭ ގޮތުން އެ ކުންފުނިން ވަކި އެއްޗެއް ހާމަ ކޮށްފައެއް ނުވެއެވެ. އެ ޙަމަލާގައި އެމެރިކާއިން ފޯރުކޮށްދެމުންދާ ހަތިޔާރު ބޭނުން ކުރަމުންދާ ކަން ހާމަވެފައި މި ވަނީ, މި ކަމާ މެދު މުޅި ދުނިޔެއިން ކަންބޮޑުވުން ފާޅު ކުރަމުންދާ ދަނޑިވަޅެއްގައެވެ. އަދި, ފަލަސްޠީނުގެ ކުށެއް ނެތް ޢާންމު ރައްޔިތުން ޝަހީދު ކުރުމުގައި އެމެރިކާގެ ބައިވެރިވުން އޮތް ކަމަށް ބުނެ މުޅި މުސްލިމް އުންމަތުން ކަންބޮޑުވުން ފާޅުކޮށް, އެ ކަން ކުށްވެރި ކުރަމުންދާ ވަގުތެއްގައެވެ.
ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ދަނީ އިންސާނިއްޔަތާ ޚިލާފު އަމަލުތައް ހިންގަމުންނެވެ. ފަލަސްޠީނުގެ މުސްލިމުން ނެތިކޮށްލަން ޔަހޫދީ ފައުޖުން ގަތުލުއާންމެއް ހިންގަމުންދާ މައްސަލަ ދެކުނު އެފްރިކާއިން ވަނީ އދގެ އެންމެ މަތީ ކޯޓު, އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ)އަށް ހުށަހަޅާފައެވެ. އަދި, ބައިނަލްއަޤުވާމީ ޖިނާޢީ ކޯޓު, އިންޓަރނޭޝަނަލް ކްރިމިނަލް ކޯޓް (އައިސީސީ)ން ވަނީ, ޒަޔަނިސްޓު އިސްރާއީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ހައްޔަރު ކުރުމަށް އަމުރެއް ނެރުމުގެ މަސައްކަތް ފަށާފައެވެ.
ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން އިންސާނިއްޔަތާ ޚިލާފު ހަނގުރާމައިގެ ކުށްތައް ހިންގަމުންދާ ކަމުގައި އެމެރިކާއިން ވެސް ގަބޫލު ކުރެއެވެ. އެ ކަން މޭ މަހު ޢާންމުވި އެމެރިކާ ސަރުކާރުގެ ރިޕޯޓަކުން ހާމަވިއެވެ. ނަމަވެސް, ފާޅުގައި އެ ކަމާ އެއްބަސްވެފައެއް ނުވެއެވެ. އަދި, ފަލަސްޠީނުގެ މުސްލިމުންގެ ގެދޮރާއި, ހަސްފަތާލުތަކާއި, މަދަރުސާތަކާއި މިސްކިތްތަކަށް ބޮން އަޅަން ޔަހޫދީ ފައުޖުން ބޭނުން ކުރަމުންދާ ހަތިޔާރު ފޯރުކޮށްދިނުން އެމެރިކާއިން ހުއްޓައިލާފައެއް ނުވެއެވެ.
މީގެ ހަ މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 36,731އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 83,530އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.