ފަލަސްޠީނުގެ ޣައްޒާގެ މުސްލިމުން ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ވަޔާއި, ކަނޑާއި އެއްގަމު މަގުން އިތުރަށް ފުޅާކޮށް, ގިނަ ޢަދަދެއްގެ ބަޔަކު ޝަހީދު ކޮށްލައިފިއެވެ. ޣައްޒާގެ ޞިއްޙީ ވުޒާރާއިން ބުނީ, ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ދީފައިވާ ރަޙުމު ކުޑަ ޙަމަލާތަކުގައި ޝަހީދު ކޮށްލާފައިވާ މީހުންގެ ޢަދަދު 94އަށް އުފުލިފައިވާ ކަމުގައެވެ.
ޔަހޫދީ ފައުޖުގެ ގިނަ ޙަމަލާތައް އަމާޒު ކޮށްފައި ވަނީ ޣައްޒާގެ މެދުތެރޭގައި އޮންނަ ދަޔިރް އަލް-ބަލަޙާއި އަލް-ނުޞަޔިރާތު ރެފިއުޖީ ކޭމްޕުގައި ގެދޮރު ނެތް ރެފިއުޖީން ދިރިއުޅެމުންދާ ސަރަޙައްދުތަކަށެވެ. ފޭލިގެ ކޭމްޕުތަކާއި ވަގުތީ ހިޔާތަކަށެވެ. މީގެ އިތުރުން ޣައްޒާގެ އުތުރާއި ދެކުނުގައިވާ ރަށްތަކަށް ވެސް ޔަހޫދީ ފައުޖުން ދަނީ ވަރުގަދަ ޙަމަލާތަކެއް އަމާޒު ކުރަމުންނެވެ.
ޣައްޒާގެ ޞިއްޙީ ވުޒާރާއިން ބުނީ ޝަހީދު ކޮށްލާފައިވާ "ވަރަށް ގިނަ ޢަދަދެއްގެ" މީހުންގެ ހަށިތަކާއި, ޒަޚަމު ކޮށްލާފައިވާ ގިނަ ޢަދަދެއްގެ ބަޔަކު ހަސްފަތާލުތަކަށް ގެންދަމުންދާ ކަމުގައެވެ. އޭގެ ތެރެއިން ގިނަ ޢަދަދެއްގެ ބަޔަކު ގެންގޮސްފައި ވަނީ އަލް-އަޤްޞާ މާޓިޔަރސް ހަސްފަތާލަށެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.
"ޒަޚަމު ކޮށްލާފައިވާ ގިނަ ޢަދަދެއްގެ ބަޔަކު އެބަތިބި ހަސްފަތާލުގެ ތަޅުމުގައި. އެ މީހުންގެ ފުރާނަ ސަލާމަތް ކުރަން ޞިއްޙީ ޚިދުމަތްތެރިން ދަނީ މަސައްކަތް ކުރަމުން. އެ ތަނުގައި އެންމެ އާދައިގެ ކަންކަމަށް ފަރުވާ ދެވޭނެ ގޮތެއް ވެސް ނެތް،" އެ ވުޒާރާއިން ބުންޏެވެ. މީގެ އިތުރުން, އެކަށީގެންވާ ޞިއްޙީ ފަރުވާ ފޯރުކޮށްދޭން ބޭނުންވާ ވަސީލަތްތަކާއި ކާބޯތަކެތި ވެސް ނެތް ކަމުގައި އެ ވުޒާރާއިން ބުންޏެވެ. އަލް-އަޤްޞާ ހަސްފަތާލުގެ ޖަނަރޭޓަރު ވެސް މި ވަގުތު ހުރީ ހުއްޓިފައެވެ.
ޣައްޒާގެ ޞިއްޙީ ވުޒާރާގެ އޮފިޝަލަކު ވިދާޅުވީ, ޔަހޫދީ ފައުޖުން ދެމުންދާ ރަޙުމު ކުޑަ ޙަމަލާތަކުގައި ޝަހީދު ކޮށްލާފައިވާ ގިނަ ޢަދަދެއްގެ މީހުންގެ ހަށިތައް މަގުމަތީގައި ވާ ކަމުގައެވެ. އަދި, އެ ހަށިތައް ހަސްފަތާލުތަކަށް ގެންގޮސް, ކަށުނަމާދުގެ ކަންކަން އިންތިޒާމު ކުރަން މަސައްކަތް ކުރަމުންދާ ކަމުގައެވެ. މަގުތަކުގައި ޒަޚަމުވެފައިވާ ގިނަ ޢަދަދެއްގެ ބަޔަކު ތިބި ކަމުގައި ވެސް އެ ވުޒާރާއިން ބުންޏެވެ.
ޞިއްޙީ ފަރުވާ ފޯރުކޮށްދޭ ބައިނަލްއަޤުވާމީ ޖަމުޢިއްޔާ, ޑޮކްޓަރސް ވިތްއައުޓް ބޯޑަރސް (އެމްއެސްއެފް)ގެ ކުޑަކުދިންގެ ޚާއްޞަ ޑޮކްޓަރު ތާނިޔާ ޙާއްޖު-ޙަސަން ސިފަކުރެއްވި ގޮތުގައި އަލް-އަޤްޞާ ހަސްފަތާލު އޮތީ ލެއިން ތަތްތެޅިފައެވެ. "އަޅުގަނޑަށް ލިބުުނު ފޮޓޯތަކާއި ވީޑިޔޯތަކުން ފެންނަނީ މުޅި ހަސްފަތާލުގެ ހުރިހާ ތަނެއް ލެއިން ތަތްތެޅިފައިވާ މަންޒަރު. އަތްފައި މަދު މީހުންގެ ހަށިތައް ވެސް ފެނުނު،" ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާއި ގަތުލުއާންމާ މެދު ކަންބޮޑުވުން ފާޅުކުރައްވައި އޭނާ ވިދާޅުވިއެވެ.
އަލް-ބުރަޔިޖު ރެފިއުޖީ ކޭމްޕަށް ވެސް ޔަހޫދީ ފައުޖުން ވަނީ ރަޙުމު ކުޑަ ޙަމަލާތަކެއް ދީފައެވެ. އޭގެ ތެރެއިން އެއް ޙަމަލާ އަމާޒު ކޮށްފައި ވަނީ ޢާންމުން ދިރިއުޅޭ ގެއަކަށެވެ. އެ ޙަމަލާގައި, އެއް ޢާއިލާއެއްގެ ހަ މެންބަރުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޙީ ވުޒާރާއިން ހާމަކުރިއެވެ.
ޖޫން 6ވަނަ ދުވަހު ޔަހޫދީ ފައުޖުން ވަނީ ނުޞަޔިރާތު ރެފިއުޖީ ކޭމްޕުގައި ހުންނަ އދއިން ހިންގާ މަދަރުސާއަކަށް ވެސް ރަޙުމު ކުޑަ ޙަމަލާއެއްދީ, 40 މީހުން ޝަހީދު ކޮށްލާފައެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި މައުސޫމު ކުޑަކުދިންނެވެ. އެ ޙަމަލާއާ އެކު, ޔަހޫދީ ފައުޖަށް އަމާޒުވެފައިވާ ބައިނަލްއަޤުވާމީ މުޖުތަމަޢުގެ ނުރުހުމާއި ފާޑުކިޔުން އެތަކެއް ގުނައަކަށް އިތުރުވެގެން ދިޔައެވެ.
މީގެ ހަތް މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 36,801އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި
އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 83,680އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.