އިންޑިޔާގެ ހުޅަނގު ބަންގާލް ސްޓޭޓްގައި ދަތުރު ކުރަމުން ދިޔަ ދެ ރޭލު ޖެހިގެން ހިނގި އެކްސިޑެންޓެއްގައި ފަސް މީހުން މަރުވެއްޖެއެވެ. މި ހާދިސާގައި ހިނގާފައި ވަނީ ފަސިންޖަރުން އުފުލާ ރޭލަކާއި މުދާ އުފުލާ ރޭލެއް ޖެހިގެންނެވެ. ހުޅަނގު ބަންގާލް ސްޓޭޓްގެ ޗީފް މިނިސްޓަރު މަމްތާ ބޭނަރްޖީ ވަނީ މިއީ ވަރަށް ހިތާމަވެރި ހާދިސާއެއްގެ ގޮތުގައި ސިފަ ކުރައްވާފައެވެ. ނަމަވެސް, މަރުވި މީހުންގެ ޢަދަދު ކަށަވަރު ކޮށްދެއްވާފައެއް ނުވެއެވެ.
"ޑޮކްޓަރުންނާއި, އެމްބިޔުލާންސްތަކާއި ކާރިސާ ހިރާސްކުރާ އިދާރާގެ ޓީމުތަކުން ދަނީ އެ ސަރަޙައްދުގައި ހަރަކާތްތެރިވަމުން. ތާށިވެފައިވާ މީހުން ސަލާމަތްކޮށް, ޞިއްޙީ ފަރުވާ ދޭން މަސައްކަތް ކުރަމުން،" ބޭޖަރްޖީ ވިދާޅުވިއެވެ. ދެ ރޭލު އެކްސިޑެންޓުވެފައި ވަނީ ދާޖިލިންގ ޑިސްޓްރިކްޓުގެ ފާންސިދޭވާ ސަރަޙައްދުގައެވެ.
އެކްސިޑެންޓުވެފައި ވަނީ ކަންޗަންޖަންގާ އެކްސްޕްރެސްގެ ފަސިންޖަރުން އުފުލާ ރޭލަކާއި މުދާ އުފުލާ ރޭލެކެވެ. މި ހާދިސާގައި, ފަސިންޖަރުން އުފުލާ ރޭލުގެ ގިނަ ޢަދަދެއްގެ ކާރުތައް ފުރޮޅައިލައި, ރޭލު ދަގަނޑުމަތިން ބޭރަށް ވެއްޓުނެވެ.
ރޭލު ދަތުރުފަތުރުގެ އެންމެ ބޮޑު ވިއުގަ އޮންނަ އެއް ޤައުމަކީ އިންޑިޔާއެވެ. އިންޑިޔާގެ ރޭލު ދަތުރުފަތުރުގެ ނިޒާމުގައި މީގެ ކުރިން ވެސް މި ފަދަ ހާދިސާތައް ހިނގާފައިވެއެވެ. މި ގޮތުން, މި ފަދަ އެންމެ ހިތާމަވެރި އެއް ހާދިސާ ހިނގާފައި ވަނީ 1981ވަނަ އަހަރުއެވެ. އެ އަހަރު ބިހާރް ސްޓޭޓްގައި ހިނގި ރޭލު އެކްސިޑެންޓުގައި 800އެއްހާ މީހުން މަރުވިއެވެ.
ހުސްވި އަހަރުގެ ޖޫން މަހު އިންޑިޔާގެ އޮޅިއްސާ ސްޓޭޓްގައި ހިނގި ރޭލި އެކްސިޑެންޓެއްގައި ވެސް 300އެއްހާ މީހުން މަރުވިއެވެ. މި ފަދަ ހިތާމަވެރި ހާދިސާތައް ހިނގުން މަދު ކުރުމަށް އިންޑިޔާގެ ސަރުކާރުން ދަނީ ފިޔަވަޅުތަކެއް އަޅަމުންނެވެ. މި ގޮތުން, ދުވަސްވީ ރޭލު ދަތުރުފަތުރުގެ ނިޒާމު ޒަމާނީކޮށް, ތަރައްޤީ ކުރަން އެ ޤައުމުން ދަނީ ބޮޑު ހޭދައެއް ކުރަމުންނެވެ.