ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ދަށުން, އެ ސަހަރުގެ އެންމެ ދެކުނުން އޮންނަ ރަފަޙާއި މެދުތެރޭގެ ސަރަޙައްދުތަކަށް ވަރުގަދަ ޙަމަލާތަކެއްދީ 25 މީހުން ޝަހީދު ކޮށްލައިފިއެވެ. މޭ 6ވަނަ ދުވަހު ޔަހޫދީ ފައުޖުން ވަނީ ރަފަަޙަށް އެއްގަމު މަގުން އަރައި, އެ ރަށުގައި ތިބި 1.5 މިލިޔަނަށްވުރެ ގިނަ ރެފިއުޖީން އެ ރަށުން ބާލަން ފަށާފައެވެ.
އޭގެ ތެރެއިން ގިނަ މީހުން ދަތުރު ކޮށްފައި ވަނީ އަލް-ނުޞަޔިރާތު ރެފިއުޖީ ކޭމްޕާއި ދަޔިރް އަލް-ބަލަޙްގެ އިތުރުން އެ ސަހަރުގެ މެދުތެރޭގައި އޮންނަ ސަރަޙައްދުތަކަށެވެ. ނަމަވެސް ޔަހޫދީ ފައުޖުން މިހާރު ދަނީ އެ ސަރަޙައްދުތަކުގައި ރެފިއުޖީން ދިރިއުޅޭ ފޭލިގެ ކޭމްޕުތަކަށް ވެސް ރަޙުމު ކުޑަ ޙަމަލާތައް އަމާޒު ކުރަމުންނެވެ. ޣައްޒާގައި ރައްކާތެރި އެންމެ ތަންކޮޅެއް ވެސް މި ވަގުތު ނެތެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ, ޔަހޫދީ ފައުޖުން އެންމެ ފަހުން ދީފައިވާ ޙަމަލާތަކުގައި 25 މީހުން ޝަހީދު ކޮށްލާފައިވާ ކަމުގައެވެ. އޭގެ ތެރެއިން 17 މީހުން ޝަހީދު ކޮށްލާފައި ވަނީ ޣައްޒާގެ މެދުތެރޭގައި ރެފިއުޖީން ދިރިއުޅޭ ސަރަޙައްދުތަކަށް ދިން ރަޙުމު ކުޑަ ޙަމަލާތަކުގައެވެ. އެ ޙަމަލާތަކުގައި ޒަޚަމު ކޮށްލާފައިވާ ގިނަ ޢަދަދެއްގެ ބަޔަކު އަލް-އަހްލީ ހަސްފަތާލަށް ގެންގޮސް ފަރުވާ ދޭން ދަނީ މަސައްކަތް ކުރަމުންނެވެ.
ނަމަވެސް, އެހާ ގިނަ ޢަދަދެއްގެ ބަލި މީހުންނަށް ފަރުވާދެވޭނެ އިންތިޒާމުތަކާއި, ބޭހާއި ޞިއްޙީ ފަރުވާއަށް ބޭނުންވާ ސާމާނު ނެތް ކަމުގައި އެ ހަސްފަތާލުން ބުނެއެވެ. މި ވަގުތު އެ ހަސްފަތާލަށް ކަރަންޓުގެ ޚިދުމަތް ދިނުމަށް ބޭނުން ކުރަމުން ދަނީ އެންމެ ޖަނަރޭޓަރެކެވެ. އެ ތަނަށް ކަރަންޓުގެ ޚިދުމަތް ދިނުމަށް ދުވާލެއްގެ މައްޗަށް 4,000 ލީޓަރުގެ ތެޔޮ ބޭނުންވާއިރު, ކޮންމެ ދުވަހު ތެޔޮ ނުލިބޭ ކަމުގައި އެ ހަސްފަތާލުން ބުނެއެވެ.
"ދުނިޔެއިން އަޅައިނުލުމުގެ ސަބަބުން [ޔަހޫދީ ފައުޖުން ދަނީ] ރަފަޙަށް މެދުކެނޑުމެއް ނެތި ބޮން އަޅަމުން. އެ މީހުންނަށް [ޔަހޫދީންގެ އިސްތިޢުމާރީ ފައުޖަށް] އެއްވެސް ހުރަހެއް ނެތް. ޔަހޫދީ ފައުޖުގެ ސިފައިން ހަރަކާތްތެރިވަމުން ނުދާ އެއްވެސް ހިސާބެއް ނެތް. އެ މީހުން ދަނީ ރެފިއުޖީ ކޭމްޕުތައް ސުންނާފަތި ކުރަމުން،" ރަފަޙުގެ ރައްޔިތެއް ބުންޏެވެ.
ބަރުހަތިޔާރާއި އަސްކަރީ ޓޭންކުފަހަރާ އެކު ޔަހޫދީ ފައުޖުގެ ހައްދުފަހަނަ އެޅި ސިފައިން ރަފަޙުގެ ތަލް އަލް-ސުލްޠާނާއި, އަލް-ޢިޛްބާގެ އިތުރުން ޒަޢްރަބާއި ޝާބޫރާގައި ހަރަކާތްތެރިވަމުންދާ ކަމުގައި އެ ރަށުގެ ރައްޔިތުން ބުންޏެވެ. އަދި, ރަފަޙުގެ އިރުމަތީގައި އޮތް ސަރަޙައްދުތަކަށް އަތްގަދަ ކުރުމަށް ފަހު, ޔަހޫދީ ފައުޖުން ދަނީ އެ ސަހަރުގައި ރެފިއުޖީން ދިރިއުޅޭ ފޭލިގެތަކާއި, ވަގުތީ ހިޔާތަކާއި, ހަސްފަތާލުތަކުގެ އިތުރުން މަދަރުސާތަކާއި މިސްކިތްތަކަށް ޙަމަލާ ދެމުންނެވެ. ރަފަޙާ މިޞްރު ގުޅޭ ސަރަޙައްދީ ރޮނގު ވެސް އޮތީ ޔަހޫދީ ފައުޖުގެ ބާރުގެ ދަށަށް ގެންގޮސްފައެވެ.
އެ ސަރަޙައްދުތަކަށް އަރައިގަނެފައިވާ ޔަހޫދީ ފައުޖުގެ އަނިޔާވެރި ސިފައިންނާ ދެކޮޅަށް ޣައްޒާގައި ވެރިކަން ކުރާ ޙަމާސް ޖަމާޢަތާއި, އެ ޖަމާޢަތާ ގުޅިފައިވާ އިސްލާމިކް ޖިހާދުގެ މުޖާހިދުން ދަނީ ޖިހާދު ކުރަމުންނެވެ. ދާދި ފަހުން ޙަމާސުން ދިން ވަރުގަދަ ޙަމަލާތަކެއްގައި ޔަހޫދީ ފައުޖުގެ އަނިޔާވެރި ސިފައިންގެ 11 މީހުން މަރައިލާފައިވެއެވެ.
މީގެ އަށް މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 37,347އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 85,372އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.