އީރާންގެ އިރުމަތީގައި އޮންނަ ރީޝަތުގައި ހުންނަ ހަސްފަތާލެއްގައި ނުރައްކާތެރި އަލިފާނުގެ ހާދިސާއެއް ހިނގައި, އެ ތަނުގައި ތިބި ބަލި މީހުންގެ ތެރެއިން ނުވަ މީހުން މަރުވެއްޖެއެވެ. މި ހާދިސާ ހިނގާފައި ވަނީ ޤާއިމީ ހަސްފަތާލުގެ އައިސީޔޫ ހުންނަ ފަންގިފިލާގައެވެ.
ރީޝަަތުގެ އޮފިޝަލުން ބުނީ, މި ހާދިސާ މަރުވެފައިވާ ހަ އަންހެނުންނާއި ތިން ފިރިހެނުންނަކީ އައިސީޔޫގައި ފަރުވާ ދެމުން ދިޔަ ބަލި މީހުން ކަމުގައެވެ. އައިސީޔޫގައި އަލިފާން ރޯވުމާ އެކު, އެ ތަނުގައި ތިބި އެހެން ބަލި މީހުން ނެރެ, ސަލާމަތް ކޮށްފައިވާ ކަމުގައި ވެސް އޮފިޝަލުން ބުންޏެވެ.
ޖީލާނީ ޔުނިވަރސިޓީ އޮފް މެޑިކަލް ސައިންސަސްގެ ވެރިޔާ މުޙައްމަދު ތަޤި އަލް-ޝޫބާ ވިދާޅުވީ, އައިސީޔޫގައި ތިބި ބަލިމީހުންގެ ތެރެއިން އަށް މީހަކު މަރުވި ސަބަބު ކަށަވަރު ކުރުމަށް ތަޙުޤީޤު ކުރަމުންދާ ކަމުގައެވެ. ނުވަ ވަނަ މީހަކު މަރުވެފައި ވަނީ އަލިފާނުގެ ހާދިސާ ހިނގުމުގެ ކުޑަ ވަގުތުކޮޅެއް ކުރިން ކަމަށް ބެލެވޭ ކަމުގައި އޭނާ ވިދާޅުވިއެވެ.
އަލިފާނުގެ ހާދިސާ ހިނގި ވަގުތު 250 އެނދުގެ އެ ހަސްފަތާލުގައި 142 ބަލިމީހުން ތިއްބެވެ. އޭގެ ތެރެއިން 33 މީހުން ތިބީ އައިސީޔޫގައެެވެ. އަދި, އެ ތަނުގައި ފަރުވާ ދެމުން ދިޔަ ފަސް ތުއްތު ކުދިން ސަލާމަތްކޮށް, އެ ސަރަޙައްދުގައި ހުންނަ ޝަހްރީފާރޫ ކުޑަކުދިންގެ ހަސްފަތާލަށް ގެންދިޔަ ކަމަށާއި, އެ ކުދިންގެ ހާލު ރަނގަޅު ކަމުގައި އޮފިޝަލުން ބުންޏެވެ.
ހަސްފަތާލުގައި ފުރަތަމަ އަލިފާން ރޯވެފައި ވަނީ, ބިމު އަޑީގައި ހުންނަ ފަންގިފިލާއެއްގައި އެ ތަނަށް ކަރަންޓުގެ ޚިދުމަތް ދިނުމަށް ބޭނުން ކުރާ ޖަނަރޭޓަރުތައް ހުންނަ ކޮޓަރީގައި ކަމަށް ބެލެވެއެވެ. ނަމަވެސް, ހަސްފަތާލުގެ އޮފިޝަލުން މި ކަން ކަށަވަރު ކޮށްދީފައެއް ނުވެއެވެ. އެ ތަނުގައި އަލިފާން ރޯވީ ދަންވަރުގެ ވަގުތުގައެވެ. އަދި, އެ ތަނުގައި ރޯވާން މެދުވެރިވި ސަބަބު ދެނެގަތުމަށް ކަމާ ބެހޭ އިދާރާތަކުން ވަނީ ތަޙުޤީޤު ކުރަން ފަށާފައެވެ.
އީރާނުގެ ދާޚިލީ ވަޒީރު އަޙްމަދު ވަޙީދީ ވިދާޅުވީ, މި ހާދިސާގައި އަނިޔާވި މީހުންނަށް އެހީތެރިކަން ފޯރުކޮށްދޭން މަސައްކަތް ކުރަމުންދާ ކަމުގައެވެ. އަދި, އަލިފާނުގެ ހާދިސާއާ ގުޅިގެން ހުއްޓިފައިވާ ޞިއްޙީ ފަރުވާގެ ޚިދުމަތްތައް އަލުން ފެށުމަށް މަސައްކަތް ކުރަމުންދާ ކަމުގައެވެ.
ޖަނަވަރީ މަހު ވެސް އީރާނުގެ ވެރިރަށް ޠަހްރާންގައި ހުންނަ ގާންދީ ހަސްފަތާލުގައި ނުރައްކާތެރި އަލިފާނުގެ ހާދިސާއެއް ހިނގިއެވެ. ނަމަވެސް, އެ ހާދިސާގައި އެއްވެސް މީހެއްގެ ފުރާނައަށް ނުރައްކާވެފައެއް ނުވެއެވެ. 2020ވަނަ އަހަރުގެ ޖޫން މަހު ޠަހްރާންގެ އުތުރުގެ ސަރަޙައްދެއްގައި ހުންނަ ހަސްފަތާލެއްގެ ތެރޭގައި ގޭސް ސިލިންޑަރެއް ގޮވުމާ ގުޅިގެން 19 މީހުން މަރުވިއެވެ.