ސަރުކާރުން ދަނީ މަސްވެރިންގެ އަޑު ވަރަށް ގާތުން އަހަމުން: ޝިޔާމު

އައްޑޫ ފިޝަރީޒް ކޮމްޕްލެކްސް ސަރަހައްދުގައި ކުރިއަށްދާ އިހުތިޖާޖު ފެށުމުގެ ކުރިންވެސް އަދި މިހާރުވެސް ސަރުކާރުން ދަނީ މަސްވެރިންގެ އަޑު ވަރަށް ގާތުން އަހަމުން ކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙުމަދު ޝިޔާމު ވިދާޅުވެއްޖެއެވެ.

ވަޒީރު ޝިޔާމު މިހެން ވިދާޅުވީ މިހާރު އައްޑޫގައި މަސްވެރިން ކުރަމުންދާ އިހުތިޖާޖާއި ގުޅިގެން ޕީއެސްއެމް ނިއުސްއާ ވާހަކަދައްކަވަމުންނެވެ.

މިފްކޯއިން މަސްވެރިންނަށް ދޭންޖެހޭ ފައިސާ ނުދޭތީ އައްޑޫ ފިޝަރީޒް ކޮމްޕްލެކްސް ބަނދަރުގައި މަސްވެރިންދަނީ މުޒާހަރާކުރަމުންނެވެ. މިކަމާއި ގުޅިގެން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙުމަދު ޝިޔާމު ވިދާޅުވީ އައްޑޫ ފިޝަރީޒް ކޮމްޕްލެކްސް ސަރަހައްދުގައި ކުރިއަށްދާ އިހުތިޖާޖު ފެށުމުގެ ކުރިންވެސް އަދި މިހާރުވެސް ސަރުކާރުން ދަނީ މަސްވެރިންގެ ހުރި ޝަކުވާތައް ވަރަށް ގާތުން ބަލަމުން އަޑުއަހަމުން ކަމަށެވެ. އަދި އެކަމުގައި މިފްކޯ އަދި ސަރުކާރުން ކުރަމުންދާ މަސައްކަތުގެ ތަފްސީލުވެސް ހިއްސާ ކުރަމުންދާ ކަމަށެވެ.

ވަޒީރު ވިދާޅުވީ އިހްތިޖާޖުގައި އިސްކޮށް ހަރަކާތްތެރިވާ ފަރާތްތަކާއި ފޯނުން ގުޅައިގެން މުއާމަލާތްތައް ކުރެވެމުންދާ ކަމަށެވެ. އަދި ސަރުކާރުން މަސައްކަތްކުރަމުންދަނީ މަސްވެރިކަމުގެ ދާއިރާއިން ވެފައިވާ ވައުދުތައް ފުއްދުމަށްޓަކައި ކަމަށެވެ.

"އިސްކޮށް އުޅޭ ބައެއް ކެޔޮޅުންނާއި އަދި އިސްކޮށް ހަރަކާތްތެރިވާ ފަރާތްތަކާއިވެސް މުއާމަލާތް ކުރެވެމުންދަނީ، މުޒާހަރާކުރަމުންދަނީ ނުދެވި ހުރި ފައިސާ ދިނުމަށާއި، މަސް ކިރާތާ 15 ދުވަސްތެރޭ ފައިސާ ދިނުމަށް، މިކަމަކީ ސަރުކާރުންވެސް ކުރުމަށް މަސައްކަތްކުރަމުންދާ ކަންތައްތައް." ވަޒީރު ޝިޔާމު ވިދާޅުވިއެވެ.

އައްޑޫ ފިޝަރީޒް ކޮމްޕްލެކްސް ސަރަހައްދުގައި ކުރިޔަށްދާ އިހުތިޖާޖު ފެށުމުގެ ކުރިންވެސް އަދި މިހާރުވެސް ސަރުކާރުން ދަނީ ވަރަށް ގާތުން ބަލަމުން އަޑުއަހަމުން އަދި އެކަމުގައި މިފްކޯ އަދި ސަރުކާރުން ކުރަމުންދާ މަސައްކަތުގެ ތަފްސީލުވެސް މިދަނީ ހިއްސާ ކުރަމުން.

— Ahmed Shiyam (@Shiyamaldives) June 22, 2024

ވަޒީރު ޝިޔާމު ވިދާޅުވީ ޢީދު ބަންދަށްފަހު މާދަމާ އަލުން ބޭންކުތައް ހުޅުވުމާއި އެކު މިކަމާއި ގުޅޭ އިތުރު ތަފްސީލްތައް މަސްވެރިންނާއި ހިއްސާކުރެވޭނެ ކަމަށެވެ.

ވަޒީރުވަނީ އިހްތިޖާޖުގެ ތެރެއިން ދައުލަތުގެ އެއްވެސް މުދަލަކަށް ގެއްލުން ނުދިނުމަށާއި، ސުލްހަވެރިކަމާއި އެކު އިހްތިޖާޖު ކުރުމަށް އެދިވަޑައިގެންފައެވެ.

"މީގެކުރިންވެސް މުޒާހަރާތައް ވަރަށް ސުލްހަވެރި، ދައުލަތުގެ އެއްވެސް މުދަލަކަށް ގެއްލުން ދީގެން މަސްވެރިއަކާއި މެދު ފިޔަވަޅު އެޅުމަކީ ފަސޭހަކަމަކަށް ނުވާނެ، އެފަދަ ވާހަކަތައް އަންނާނީ މިހެން މި ދެންނެވީ” ވަޒީރު ޝިޔާމު ވިދާޅުވިއެވެ.

މަސްވެރިން މީގެކުރިން ކުރިއަށްގެންގޮސްފައިވާ އިހުތިޖާޖުތަކަށް ވަޑައިގެން، ވަޒީރު ޝިޔާމުވަނީ މަސްވެރިންގެ ކަންބޮޑުވުންތައް އަޑުއައްސަވާފައެވެ.

މަސްވެރިންނަށް ފައިސާ ދިނުމުގައި ގޮންޖެހުންތަކެއް ކުރިމަތިވީ މި ސަރުކާރުން ވެރިކަމާއި ހަވާލުވީއިރު، މަސްވެރިންނަށް 250 މިލިއަން ރުފިޔާ ނުދީ ހުރުމުންނެވެ. އަދި ރިޔާސީ އިންތިހާބުގެ ކެމްޕެއިން ދުވަސްވަރު މިފްކޯއަށް ގެއްލުންވާގޮތަށް މަސް ގަންނަ އަގުވަނީ 25 ރުފިޔާއަށް ބޮޑުކޮށްފައެވެ.

މި ސަރުކާރުން ވެރިކަމާއި ހަވާލުވުމަށްފަހު މަސްވެރިންނަށް ނުދެވި ހުރި ފައިސާތައް ދިނުމަށްދަނީ ގިނަ މަސައްކަތްތަކެއް ކުރަމުންނެވެ. އެގޮތުން މިދިޔަ ހަފްތާތެރޭގައިވެސް މަސްވެރިންނަށް 46 މިލިއަން ރުފިޔާ ދޫކޮށްފައިވާއިރު، ބާކީ އަދި ނުދެވި ގާތްގަނޑަކަށް 45 މިލިއަން ރުފިޔާ އެބަހުރިކަމަށް މަސްވެރިކަމާއި ބެހޭ ވުޒާރާއިން ވިދާޅުވެއެވެ.

މި ސަރުކާރުން ވެރިކަމާއި ހަވާލުވީފަހުން، މިވީ މުއްދަތުގެ ތެރޭގައި މަސްވެރިންނަށް މިހާތަނަށް 881 މިލިއަނަށްވުރެ ގިނަ ރުފިޔާވަނީ ދޫކޮށްފައެވެ.