ފަލަސްޠީނުގެ ޣައްޒާގެ ދެކުނުގައި އޮންނަ އަލް-މަވާސީގައި އެތަކެއް ސަތޭކަ ރެފިއުޖީން ދިރިއުޅޭ ފޭލިގެ ކޭމްޕަކަށް ޔަހޫދީ ފައުޖުން ނުރައްކާތެރި ޙަމަލާތަކެއް ދީ 25 މީހުން ޝަހީދުކޮށްލައި, ގިނަ ޢަދަދެއްގެ ބަޔަކު ޒަޚަމު ކޮށްލައިފިއެވެ. އޭގެ ތެރޭގައި ގިނައީ އަންހެނުންނާއި މައުސޫމު ކުޑަކުދިންނެވެ. ޔަހޫދީ ފައުޖުން ޙަމަލާ ދީފައި ވަނީ މީގެ ކުރިން ރައްކާތެރި ސަރަޙައްދެއް ކަމަށް ބުނެފައިވާ ފޭލިގެ ކޭމްޕަކަށެވެ.
ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ޣައްޒާއަށް ދީފައިވާ ރަޙުމު ކުޑަ ޙަމަލާތަކުގައި 101 މީހުން ޝަހީދުކޮށްލާފައިވާ ކަމުގައި ޣައްޒާގެ ޞިއްޙީ ވުޒާރާއިން ބުންޏެވެ. އަދި, އިތުރު 169 މީހުން ޒަޚަމުކޮށްލިއެވެ. މިއީ, ޖޫން 8ގައި ދިން ޙަމަލާތަކަށް ފަހު, އެއް ދުވަހުގެ ތެރޭގައި ޔަހޫދީ ފައުޖުން އެންމެ ގިނަ ޢަދަދެއްގެ ބަޔަކު ޝަހީދުކޮށްލި ދުވަހެވެ. ޖޫން 8ގައި އަލް-ނުޞަޔިރާތު ރެފިއުޖީ ކޭމްޕަށް ދިން ޙަމަލާތަކުގައި 274 މީހުން ޝަހީދުކޮށްލާފައިވެއެވެ.
ޣައްޒާގެ ޞިއްޙީ ވުޒާރާއިން ބުނީ, ފާއިތުވި 24 ގަޑިއިރުގެ ތެރޭގައި ޔަހޫދީ ފައުޖުން ދިން ޙަމަލާތަކުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ގިނަ ޢަދަދެއްގެ ބަޔެއްގެ ހަށިތައް އަދިވެސް ތާށިވެފައިވާ ކަމުގައެވެ. އަދި, އެ ސަރަޙައްދުތަކަށް ދަތުރު ކުރުމަށް އެމްބިއުލާންސްތަކަށް ހުރަސް އެޅިފާއިވާ ކަމަށާއި, ޢިމާރާތްތަކުގެ ދަށުގައި ތާށިވެފައިވާ މީހުން ސަލާމަތް ކުރަން ބޮޑެތި ގޮންޖެހުންތަކެއް ކުރިމަތިވެފައިވާ ކަމުގައި ވެސް އެ ވުޒާރާއިން ހާމަކުރިއެވެ.
ޣައްޒާގެ މުސްލިމުންނަށް އިންސާނީ އެހީތެރިކަން ފޯރުކޮށްދޭން މަސައްކަތް ކުރަމުންދާ ރެޑް ކްރޮސުން ބުނީ, އަލް-މަވާސީގައި ހުންނަ އެ ޖަމުޢިއްޔާގެ އޮފީހާ ވަރަށް ކައިރިއަށް ވެސް ޔަހޫދީ ފައުޖުން ނުރައްކާތެރި ހަތިޔާރު ބޭނުން ކޮށްގެން ޙަމަލާ ދީފައިވާ ކަމުގައެވެ. ޔަހޫދީ ފައުޖުން އެ ސަރަޙައްދަށް ދެ ފަހަރެއްގެ މަތިން ޙަމަލާ ދީފައިވާ ކަމުގައި ފަލަސްޠީނުގެ އޮފިޝަލުން ބުންޏެވެ.
"[ފޭލިގެތައް ހުންނަ] އެ ސަރަޙައްދަށް ޔަހޫދީ ފައުޖުން ބޮން އަޅަން ފެށުމުން އަޅުގަނޑުމެން ބިރުން ފޭލިގެތަކުން ބޭރަށް ނިކުތީ. އެ ވަގުތު, ދެވަނަ ފަރަހަށް ޔަހޫދީ ފައުޖުން އެ ސަރަޙައްދުގައި ހުރި ރެޑް ކްރޮސްގެ ފޭލިގެތަކަށް ބޮން އަޅަން ފެށީ. އޭގެ ފަހުން ވެސް ރެޑް ކްރޮސްގެ ފޭލިގެތަކަށް ޔަހޫދީ ފައުޖުން އިތުރު ޙަމަލާތަކެއް ދިން،" އެ ވަގުތު އެ ސަރަޙައްދުގައި ހުރި މުނާ ޢާޝޫރް ބުންޏެވެ. ޔަހޫދީ ފައުޖުގެ ޙަމަލާތަކުގައި ޝަހީދު ކޮށްލާފައިވާ މީހުންގެ ތެރޭގައި އޭނާގެ ފިރިމީހާ ވެސް ހިމެނެއެވެ.
އަލް-މަވާސީގައި ފޭލިގެތައް ހުންނަ ސަރަޙައްދަށް ޔަހޫދީ ފައުޖުން ދީފައިވާ ޙަމަލާތައް ރެޑް ކްރޮސުން ވަނީ ކުށްވެރި ކޮށްފައެވެ. އެ ޙަމަލާތަކުގައި 22 މީހުން ޝަހީދުކޮށްލައި, އިތުރު 45 މީހުން ޒަޚަމު ކޮށްލާފައިވާ ކަން އެ ޖަމުޢިއްޔާއިން ވެސް ވަނީ ކަށަވަރު ކޮށްދީފައެވެ.
"އެއީ, އިންސާނީ ޚިދުމަތްތައް ފޯރުކޮށްދޭ ޖަމުޢިއްޔާގެ އޮފީހެއް ހުންނަ ސަރަޙައްދެއް ކަން އަންގައި ދިނުމުގެ ގޮތުން ރެޑް ކްރޮސްގެ ނިޝާން ޖަހާފައި ހުންނާނެ. މި ފަދަ ތަންތަނަށް ޙަމަލާ ދިނުމުން ޢާންމު ރައްޔިތުންނާއި އިޖުތިމާޢީ ޚިދުމަތްތެރިންގެ ފުރާނައަށް ނުރައްކާވޭ،" ރެޑް ކްރޮސުން ބުންޏެވެ. ޔަހޫދީ ފައުޖުގެ ޙަމަލާތަކުގައި ރެޑް ކްރޮސްގެ އޮފީހަށް ވެސް ވަނީ ބޮޑެތި ގެއްލުންތަކެއް ލިބިފައެވެ.
މީގެ އަށް މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 37,551އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމުކޮށްލާފައިވާ މީހުންގެ ޢަދަދު ވަނީ 85,911އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.