އިސްރާއިލްގެ އުތުރުގައި ހަރަކާތްތެރިވަމުން ދިޔަ ޔަހޫދީ ސިފައިންތަކެއް މަރާލާފައިވާކަމަށް ހިޒްބުﷲ އިން ބުނެފިއެވެ.
ޓެލެގްރާމް ގްރޫޕެއްގައި އާންމުކުރި ބަޔާނެއްގައި ހިޒްބުﷲއިން ބުނީ އެޖަމާޢަތުން އިސްރާއީލު އަސްކަރިއްޔާގެ 91 ވަނަ ޑިވިޝަންގެ މައި އިދާރާއަށް އަމާޒުކޮށް ޑްރޯން ހަމަލާއެއް ދީފައިވާކަމަށެެވެ. އަދި މިހަމަލާގައި އެ ޑިވިޝަންގެ އޮފިސަރުންގެ ތެރެއިން ގިނަ ބަޔަކަށް އަނިޔާވެ، ގިނަ އަދަދެއްގެ ބަޔަކު މަރުވެފައިވާކަމަށްވެސް ހިޒްބުﷲއިން ބުނެއެވެ.
ހިޒްބުﷲއިން ބުނީ މިހަމަލާއަކީ ލުބްނާނުގެ އިރުމަތީ ސަރަހައްދެއް ކަމަށްވާ ބެކާގެ އަލް-ޚަޔާރާ ސަހަރުގައި އިސްރާއިލްގެ ސިފައިން ހިންގި ގަތުލުއާމުގެ ރައްދެއްގެ ގޮތުން ދިން ހަމަލާއެއް ކަމަށެވެ. އެގޮތުން ބެކާގެ ހުޅަނގު ސަރަހައްދަކަށް އިސްރާއިލްގެ ސިފައިން ހޮނިހިރު ދުވަހު އަރައި، ލުބްނާންގެ މީހަކު މަރާލާފައިވާކަމަށް ހިޒްބުﷲއިން ބުނެއެވެ.
އިސްރާއިލްގެ ސިފައިންވެސް ވަނީ ހަމާސް އަދި އަލް-ޖަމާ އަލް-އިސްލާމިއްޔާ ޖަމާއަތަށް ހަތިޔާރު ފޯރުކޮށްދޭކަމުގެ ތުހުމަތުގައި ލުބްނާންގެ މީހަކު ޑްރޯން ހަމަލާއެއްގައި މަރާލާފައިވާކަމަށް ބުނެފައެވެ.
އިސްރާއިލްގެ އަސްކަރިއްޔާއަށް އަމާޒުކޮށް ހިޒްބުﷲގެ ހަމަލާތައް ދެމުންދާތީ އެކަމަށް ބަދަލު ނުހިފައި މަޑުން ނޯންނާނެކަމަށް އިސްރާއިލުން ވަނީ ބުނެފައެވެ. ނަމަވެސް ހިޒްބުﷲއާ ދެކޮޅަށް ޔަހޫދީން ހަނގުރާމަ އިއުލާނުކޮށްފިނަމަ އެހަނގުރާމަ އިސްރާއިލަށް ކާމިޔާބު ނުކުރެވޭނެ ކަމަށް އިރާނުން ވަނީ ބުނެފައެވެ.
އިސްރާއިލުން ވަނީ އިރާނާއި ހަނގުރާމަވެރި އިސްލާމީ ޖަމާއަތްތަކާ ދެކޮޅަށް އެގައުމުން މަސައްކަތް ކުރާނެ ކަމަށް ބުނެ، އެކަމަށް އެގައުމަށް އެއްބާރުލުން ދިނުމަށް ދުނިޔެއަށް ގޮވާލާފައެވެ.
އިސްރާއިލާ ހިޒްބުﷲއާ ދެމެދު ދެމުންދާ ހަމަލާތައް އިތުރުވެފައިވާއިރު، އިސްރާއިލުން ފަލަސްތީންގެ ޣައްޒާއަށް ދެމުންދާ ހަމަލާތައް ހުއްޓާނުލަނީސް އެޖަމާއަތުން އިސްރާއިލާ ދެކޮޅަށް ދެމުންދާ ހަމަލާތައް ހުއްޓާނުލާނެކަމަށް ހިޒްބުﷲއިން ބުނެއެވެ.
މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ހުއްޓުމެއްނެތި އިސްރާއިލުން ޣައްޒާއަށް ދެމުންދާ ހަމަލާތަކުގައި މަރުވި މީހުންގެ އަދަދު 37،598 އަށް އަރާފައިވާކަމަށް ޣައްޒާގެ ހެލްތު މިނިސްޓްރީން ވަނީ ހާމަކޮށްފައެވެ. އަދި މިހަމަލާތަކުގައި އެކިވަރުގެ އަނިޔާތައް ލިބިފައިވާ މީހުންގެ އަދަދުވެސް 86،000 އަށް ވުރެ މައްޗަށް އަރާފައިވާކަމަށް އެ މިނިސްޓްރީން ބުނެއެވެ.
ޣައްޒާއަށް ދެމުންދާ ހަމަލާތައް ހުއްޓާލުމުގެ ވިސްނުން އިސްރާއިލުން ނުގެންގުޅޭއިރު، އެގައުމުގެ އަސްކަރިއްޔާއިން ދަނީ ފަލަސްތީންގެ ހުޅަނގު އައްސޭރީގެ ސަރަހައްދުތަކަށް އަރައި ހަމަލާތައްދީ، އާންމުންގެ ގެތަކަށް ވަދެ އެތައް ބަޔަކު ހައްޔަރުކުރަމުންނެވެ.