ވީއައިއޭގެ އައު ޓާރމިނަލްގެ ހުރިހާ މަސައްކަތެއް އަންނަ އަހަރު މެދުތެރޭގައި ނިމޭނެ: ރައީސް

ވެލާނާ އިންޓަރނޭޝަނަލް އެއަރޕޯޓުގެ އައު ޓާރމިނަލް އަދި ޓާރމިނަލާއި ގުޅިފައިވާ މަސައްކަތްތައް އަންނަ އަހަރުގެ މެދުތެރޭގައި އެއްކޮށް ނިމޭނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ޕީއެންސީގެ މައި ޖަގަހަ "ޕީއެންސީ ހައުސް" ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

ވެލާނާ އިންޓަރނޭޝަނަލް އެއަރޕޯޓު، ވީއައިއޭގެ އައު ޕަސެންޖަރ ޓަރމިނަލަކީ، އެއަރޕޯޓް ޒަމާނީ ފެންވަރަށް ތަރައްޤީކުރުމަށް ހިންގާ ބިޔަ މަޝްރޫޢުގެ ތެރޭގައި ހިމެނޭ އެންމެ މުހިންމު އެއް ކޮމްޕޯނެންޓެވެ.

ރައިސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުން ވެރިކަމާއި ހަވާލުވުމަށްފަހު ވެލާނާ އިންޓަރނޭޝަނަލް އެއަރޕޯޓުގެ މަސައްކަތްތައް ހަލުވި ކުރުމަށް ހާއްސަ އިސްކަމެއް ވަނީ ދެއްވާފައެވެ. އަދި މިހާރު އެއަރޕޯޓުގެ މަސައްކަތްތައް ބާރު ދުވެލީގައި ކުރިއަށްދާއިރު، އެއަރޕޯޓުގެ އައު ޓަރމިނަލްގެ ބައެއް އެއިރޯ ބްރިޖުތައް މިއަހަރު ފަހުކޮޅު ބޭނުންކުރަން ފަށާނެ ކަމަށްވެސް ރައިސުލްޖުމްހޫރިއްޔާ ވިދާޅުވިއެެވެ.

"އަޅުގަނޑުމެންގެ އެއަރޕޯޓު ފިނިހަކަ ދުވެލީގައި ހަދަމުން ދިޔައީ، އެކަން އަޅުގަނޑުމެން އެންމެންނަށް އެނގޭ، އެހެންނަމަވެސް މިހާރު ވަރަށް ބާރު މިނުގައި އެމަސައްކަތް އެދަނީ ހިނގަމުން، 8 އެރޯ ބްރިޖު ހުންނަ އިރު، މަސައްކަތްކުރަނީ އެތަނުން މަދުވެގެން 3 އެރޯ ބްރިޖު ގެނެވޭނެ ކަމަށް އެމްއޭސީއެލުން ވިދާޅުވެފައިވޭ،" ރައީސް ވިދާޅުވިއެވެ.

އެއިރޯ ބްރިޖުތަކާއެކު ފަސިންޖަރުންނަށް ޓާމިނަލުން ސީދާ ބޯޓަށް އެރޭނެއެވެ. މިއާއެކު ދަތުރުވެރިންނަށް ވަރަށް ބޮޑު ލުއި ފަސޭހައެއް ލިބޭނެކަމަށް އެމްއޭސީއެލްއިން ބުނެއެވެ.

ސަރުކާރުން ފުރަތަމަ އަމާޒު ހިފީ މިއަހަރު ނިމުމުގެ ކުރިން އައު ޓާމިނަލްގެ މަސައްކަތް ނިންމާ އޮޕަރޭޝަނަށް ގެނައުމަށެވެ. އެހެންނަމަވެސް މިހާރު މަސައްކަތްތައް ގޮސްފައިވާ ހިސާބަށް ބަލާއިރު އައު ޓާމިނަލްގެ މަސައްކަތްތަކާއި އެ މަސައްކަތްތަކާއި ގުޅިފައިވާ މަސައްކަތްތައް އަންނަ އަހަރުގެ މެދުތެރޭގައި އެއްކޮށް ނިމޭނެކަމަށްވެސް ރައީސް ވިދާޅުވިއެވެ.

"އަޅުގަނޑުމެން ކުރިން ޓާގެޓުކުރިން މިއަހަރު ނިމެންވާއިރަށް މަސައްކަތް ނިންމޭތޯ، މިއަންނަ އަހަރުގެ މެދަކާއި ހަމައަށް ދާއިރު، ޖުލައިމަހާ ހަމައަށްދާންވާއިރަށް އެ ޓަރމިނަލްގެ މަސައްކަތްތަކާއި ގުޅިފައިވާ މަސައްކަތްތައް ނިންމާނަން،" ރައީސް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ އައު ޓަރމިނަލަކީ އިޤްތިސާދުގެ ވަރަށް ބޮޑު ދޮރާއްޓެއް ކަމަށާއި އެ ޓަރމިނަލް ބޭނުން ކުރަން ފެށުމުން، ރާއްޖެއަށް އިޤްތިސާދީގޮތުން ގިނަ ކުރިއެރުންތަކެއް ލިބިގެންދާނެ ކަމަށެވެ.

ސަރުކާރުން ވަނީ ވީއައިއޭ ތަރައްޤީކުރުމުގެ ދެވަނަ ފިޔަވަހިވެސް އިއުލާންކޮށްފައެވެ. ރައީސް ވިދާޅުވީ އެކަމުގެ ފުރަތަމަ މަރުހަލާގެ މަސައްކަތްތައް ބާރު ދުވެލީގައި ކުރިއަށްދާ ކަމަށެވެ.

ވީ.އައި.އޭގައި މިހާރު ބޭނުންކުރާ އިންޓަރނޭޝަނަލް ޓަރމިނަލަކީ އަހަރަކު 1.5 މިލިއަން ފަސިންޖަރުންނަށް ޚިދުމަތް ދެވޭވަރުގެ ޓާރމިނަލެކެވެ. އެހެންނަމަވެސް އެންމެފަހުގެ ޒަމާނީ ވަސީލަތްތަކާއެކު އަލަށް ތަރައްޤީކުރާ 78 ހާސް އަކަ މީޓަރުގެ ޓަރމިނަލަކީ އަހަރަކު 7 މިލިއަން ފަސިންޖަރުންނަށް ޚިދުމަތްދެވޭ ފެންވަރަށް ތަރައްޤީކުރާ ޓަރމިނަލެކެވެ.

އައު ފަސިންޖަރ ޓާރމިނަލް ތަރައްޤީ ކުރެވިގެންދާނީ އެންމެފަހުގެ ޒަމާނީ ވަޞީލަތްތަކާއެކުއެވެ. އެގޮތުން އެއިރޯ ބޯޑިން ބްރިޖްތަކާއި، އެންމެ ފަހުގެ ޒަމާނީ ބެގޭޖް ހޭންޑްލިން ސިސްޓަމްތައް ޓާރމިނަލްގައި ހުންނާނެއެވެ. އައު ޓާރމިނަލް އިމާރާތުގެ ސަބަބުން މިހާރު ހުރި ޓަރމިނަލަށް ދިމާވެފައިވާ ޖާގައިގެ ދަތިކަން ފިލުވައިދީ، އެފް އެންޑް ބީގެ ގިނަ އައުޓްލެޓްތަކާއި، ރީޓެއިލް ސްޕޭސްތަކާއި، ލައުންޖްތަކާއި އެހެނިހެން ޚިދުމަތްތައް މިތަނުގައި ޤާއިމުކުރެވިގެންދާނެއެވެ.