ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ދަށުން ޣައްޒާ ސިޓީގައި ޢާންމުން ދިރިއުޅޭ ޢިމާރާތްތަކާއި މަދަރުސާތަކަށް ބޮންއަޅައި 24 މީހުން ޝަހީދު ކޮށްލައިފިއެވެ. ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ވަނީ ޣައްޒާ ސިޓީގައި ޢާންމުން ދިރިއުޅޭ ތިން ޢިމާރާތަކަށް ރަޙުމު ކުޑަ ޙަމަލާތަކެއް ދީފައެވެ. މީގެ ތެރެއިން އެއް ޙަމަލާގައި, ޣައްޒާގައި ވެރިކަން ކުރާ ޙަމާސް ޖަމާޢަތުގެ ވެރިޔާ އިސްމާޢީލް ހަނިއްޔާގެ ޢާއިލާގެ މެންބަރަކު ޝަހީދު ކޮށްލާފައިވާ ކަމުގައި އެ ޖަމާޢަތުން ބުންޏެވެ.
މި ޙަމަލާތަކުގައި ޔަހޫދީ ފައުޖުން ވަނީ ޣައްޒާ ސިޓީގައި ހުންނަ ދެ މަދަރުސާއަކަށް ބޮޑެތި ގެއްލުންތަކެއް ދީފައެވެ. އެއީ, ގިނަ ޢަދަދެއްގެ ރެފިއުޖީން ދިރިއުޅެމުން ދިޔަ ޢިމާރާތްތަކެކެވެ. އެ ޙަމަލާތަކުގައި 14 މީހުން ޝަހީދު ކޮށްލައި, ގިނަ ޢަދަދެއްގެ ބަޔަކު ޒަޚަމު ކޮށްލިއެވެ. އެއަށް ފަހު ޔަހޫދީ ފައުޖުން ވަނީ ޣައްޒާ ސިޓީގެ އަލް-ޝަޠަޢު ރެފިއުޖީ ކޭމްޕަށް ވެސް ބޮންއަޅައި 10 މީހުން ޝަހީދު ކޮށްލާފައެވެ.
އަލް-ޝަޠަޢު ރެފިއުޖީ ކޭމްޕުގައި ޔަހޫދީ ފައުޖުން ޙަމަލާ ދީފައި ވަނީ ހަނިއްޔާގެ ޢާއިލާގެ މެންބަރުން ދިރިއުޅޭ ގެއަކަށެވެ. އެ ޙަމަލާގައި ހަނިއްޔާގެ އަންހެން ކޮއްކޮއަކާއި ޢާއިލާގެ އެހެން މެންބަރުންތަކެއް ޝަހީދު ކޮށްލާފައިވާ ކަމުގައި އޭނާގެ ޢާއިލާއާއި ޞިއްޙީ ޚިދުމަތްތެރިން ބުންޏެވެ.
ޙަމާސުން ވަނީ ޣައްޒާ ސިޓީގެ މަދަރުސާތަކަށް އަމާޒުކޮށް ޔަހޫދީ ފައުޖުން ދީފައިވާ ޙަމަލާތަކަކީ ގަތުލުއާންމެއްގެ ގޮތުގައި ސިފަކޮށް, އެ ޙަމަލާތައް ކުށްވެރި ކޮށްފައެވެ. "އެ ޙަމަލާތަކުގެ ޒިންމާ އުފުލަން ޖެހޭނީ އެމެރިކާގެ ރައީސް ޖޯ ބައިޑަންގެ ސަރުކާރުން. ޒަޔަނިސްޓު [އިސްރާއީލުގެ] ސަރުކާރުން ހިންގަމުންދާ ގަތުލުއާންމުތަކަށް [ބައިޑަންގެ ސަރުކާރުން] ދަނީ މެދުކެނޑުމެއް ނެތި އެހީތެރިކަން ފޯރުކޮށްދީ, ވާގިވެރިވަމުން،" ޙަމާސުން ބުންޏެވެ.
ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ވަނީ ޣައްޒާގެ އެންމެ ދެކުނުން އޮތް ރަފަޙަށް އަތްގަދަ ކުރަން ހިންގަމުންދާ ޢުދުވާންތައް ވެސް އިތުރަށް ފުޅާ ކޮށްފައެވެ. މި ގޮތުން, ޔަހޫދީ ފައުޖުގެ އަސްކަރީ ޓޭންކުފަހަރުން ވަނީ ރަފަޙުގެ ހުޅަނގުގެ ސަރަޙައްދުތަކަށް އަރައި, ރެފިއުޖީން ދިރިއުޅޭ ފޭލިގެތަކާއި ޢާންމުން ދިރިއުޅޭ ޢިމާރާތްތަކަށް ދެމުންދާ ޙަމަލާތައް އިތުރަށް ވަރުގަދަ ކޮށްފައެވެ. ރަަފަޙާ އިންވެގެން އޮތް ޚާން ޔޫނިސަށް ވެސް ޔަހޫދީ ފައުޖުން ވަނީ އަސްކަރީ ޓޭންކުފަހަރު ބޭނުންކޮށް ވަރުގަދަ ޙަމަލާތަކެއް ދީފައެވެ.
2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހު ޔަހޫދީ ފައުޖުން ފެށި ޢުދުވާން އަށްވަނަ މަހަކަށް ދިގުދަންމައިލާފައިވާއިރު, ޔަހޫދީންގެ ގަތުލުއާންމު ހުއްޓުވަން ކުރަމުންދާ މަސައްކަތްތަކަށް ކުރިއެރުންތަކެއް ލިބިފައެއް ނެތެވެ. މި ކަމަށް ހުރަސް އަޅަމުން ދަނީ ޒަޔަނިސްޓު އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫއެވެ. ޢުދުވާންތައް ހުއްޓުމަކަށް ގެނައުމަށް ބައިޑަން ހުށަހަޅުއްވާފައިވާ މަގުޗާޓަށް ވެސް އޭނާ ދަނީ ހުރަސް އަޅަމުންނެވެ.
މީގެ އަށް މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 37,626އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމުކޮށްލާފައިވާ މީހުންގެ ޢަދަދު ވަނީ 86,098އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.