އިންޑިއާގެ ޤާނޫނު ހަދާ މަޖިލީހުގެ ރިޔާސަތަށް ބޮޑުވަޒީރު ނަރެންދްރަ މޯދީގެ ބާރްތިޔަ ޖަންތާ ޕާޓީ (ބީޖޭޕީ)ގެ މެންބަރެއް އިންތިޚާބު ކޮށްފިއެވެ. މިއީ, މޯދީއާއި ބީޖޭޕީއާ ގުޅިފައިވާ ނޭޝަނަލް ޑިމޮކްރެޓިކް އެލަޔަންސް (އެންޑީއޭ) ކޯލިޝަނަށް ލިބުނު ބޮޑު ކުރިއެރުމެކެވެ. ޤާނޫނު ހަދާ މަޖިލީހުގެ ރައީސް ކަމުގެ މަޤާމަށް އިންތިޚާބު ކޮށްފައި ވަނީ ބީޖޭޕީގެ އޯމް ބިރްލާއެވެ. ނިމިދިޔަ ދައުރުގައި ވެސް އެ މަޤާމު ފުރުއްވާފައި ވަނީ އޭނާއެވެ.
ހުސްވި މަހު އިންޑިއާގައި ބޭއްވި ޢާންމު އިންތިޚާބުގައި ބީޖޭޕީއަށް އޮތް ތާޢީދު ފަނޑުވި މަންޒަރު ފެނުނު ނަމަވެސް, އެންޑީއޭ ކޯލިޝަންގައި ހިމެނޭ ޕާޓީތަކުގެ ތާޢީދާ އެކު މޯދީ ވަނީ ބޮޑުވަޒީރު ކަމުގެ މަޤާމަށް ތިންވަނަ ދައުރަކަށް އިންތިޚާބުވެ ވަޑައިގަންނަވާފައެވެ. ބޮޑުވަޒީރު ކަމުގައި ދެމިހުންނެވުމަށް އެންޑީއޯ ކޯލިޝަންގައި ހިމެނޭ 14 ޕާޓީއަކުން މޯދީއަށް ރުހުން ދިނެވެ.
ތާރީޚީ ތިންވަނަ ދައުރުގައި މޯދީއަށް އެކުލަވައިލައްވަން ޖެހިވަޑައިގަތީ ގުޅިފައިވާ ކޯލިޝަން ސަރުކާރެކެވެ. ނަމަވެސް, ޤާނޫނު ހަދާ މަޖިލީހުގެ ރިޔާސަތު ބީޖޭޕީއަށް ލިބުމަކީ, އޭނާގެ ސަރުކާރަށް ލިބުނު ކާމިޔާބީއެއްގެ ގޮތުގައި ސިފަ ކުރެވެއެވެ. އެ މަޤާމަށް އިންތިޚާބުވެ ވަޑައިގެންނެވި ބިރްލާއާ ވާދަ ކުރައްވާފައި ވަނީ އިދިކޮޅު އިންޑިއަން ނޭޝަނަލް ކޮންގްރެސްގެ މެންބަރު ކޭ. ސުރޭޝެވެ. އެއީ, ފާއިތުވި އަށް ދައުރުގައި ވެސް މަޖިލީހުގެ މެންބަރު ކަން ފުރުއްވާފައިވާ ބޭފުޅެކެވެ.
އިންޑިޔާގެ ޤާނޫނު ހަދާ މަޖިލީހުގެ ތިރިގެ, ލޮކް ސަބާގައި އެންޑީއޭ ތަމްސީލު ކުރައްވާ މެންބަރުންގެ ޢަދަދު 293އަށް އަރައެވެ. އެއީ, މަޖިލީހުގެ އަޣުލަބިއްޔަތު ހޯދަން ބޭނުންވާ 272 ގޮނޑިއަށްވުރެ 21 މެންބަރުން އިތުރު ޢަދަދެކެވެ. ލޮކް ސަބާގެ ރައީސް ކަމުގެ މަޤާމަށް ބިރްލާ އިންތިޚާބު ކޮށްފައި ވަނީ އަނގަބަހުން ނެގި ވޯޓަކުންނެވެ. މި ގޮތަށް އަމަލު ކޮށްފައި ވަނީ އިދިކޮޅު ކޮންގްރެސް ޕާޓީގެ ރުހުމާ އެކުގައެވެ.
މަޖިލީހުގެ ރައީސް ކަމުގެ މަޤާމަށް ބިރްލާ އިންތިޚާބުވެ ވަޑައިގެންނެވުމާ އެކު މޯދީގެ އިތުރުން ކޮންގްރެސް ޕާޓީގެ ވެރިޔާ ރާހުލް ގާންދީ ވެސް ވަނީ އޭނާއަށް މަރުޙަބާ ދަންނަވާފައެވެ. ޢާންމު އިންތިޚާބުގައި ކޮންގްރެސުން ހޯދި ކާމިޔާބީއާ އެކު, ގާންދީއަކީ އިދިކޮޅު ލީޑަރުގެ ގޮތުގައި ކޮންގްރެސް ޕާޓީން ވަނީ ކަނޑައަޅާފައެވެ. މިއާ އެކު, 54 އަހަރުގެ ގާންދީއަށް ކެބިނެޓު މިނިސްޓަރުން ފެންވަރުގައި މަޖިލީހުގައި ރަމްޒީ ދައުރެއް އަދާ ކުރެވޭނެއެވެ.
އުމުރުން 73 އަހަރުގެ މޯދީއަކީ, އިންޑިއާގެ ކުރީގެ ބޮޑުވަޒީރު އަދި ބާނީއެއްގެ ގޮތުގައި ބެލެވޭ ޖަވާހަރްލާލް ނެހްރޫއަށްފަހު, އެ ޤައުމުގެ ބޮޑުވަޒީރު ކަމުގެ މަޤާމަށް ތިންވަނަ ދައުރަކަށް އިންތިޚާބުވެ ވަޑައިގެންނެވި ފުރަތަމަ ވެރިޔާއެވެ. ފާއިތުވި ދަހަރު މޯދީ ވަނީ އިންޑިއާއަށް ބޮޑެތި ކުރިއެރުންތަކެއް ހޯއްދަވައިދެއްވާފައެވެ. އިޤުތިޞާދީ ގޮތުން އިންޑިއާ މިއަދު ދެކެމުންދާ ކުރިއެރުމުގެ ބާނީއަކީ މޯދީ ކަމުގައި ބެލެވެއެވެ. މި ގޮތުން, މި ވަގުތު އެންމެ ހަލުވިކަމާ އެކު ކުރިއަރަމުންދާ އިޤުތިޞާދު އޮތީ އިންޑިއާގައެވެ. އަދި, އެއީ ދުނިޔޭގެ ފަސްވަނައަށް އެންމެ ބޮޑު އިޤުތިޞާދެވެ.
ތިންވަނަ ދައުރަކަށް އިންތިޚާބުވެ ވަޑައިގެންނެވި ނަމަވެސް, ކުރިއަށް އޮތް ދައުރަކީ މޯދީއަށް ގިނަ ހުރަސްތަކާއި ގޮންޖެހުންތައް އަމާޒުވާނެ ފަސް އަހަރު ކަމުގައި މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ. އެއް ސަބަބަކީ, ގިނަ ޢަދަދަކަށް ކުދި ޕާޓީތައް އެކުލެވިގެންވާ ކޯލިޝަން ސަރުކާރެއް އެކުލަވައިލަން ޖެހިވަޑައިގަތުމެވެ. އަދި, އިންޑިއާގެ މައި އިދިކޮޅު ޕާޓީ, ކޮންގްރެސުން އިންތިޚާބުގައި ކުރިއެރުންތަކެއް ހޯދައި, ބާރާއި ނުފޫޒު ގަދަ ކުރަމުން ދިޔުމެވެ.