ލުބްނާނުގައި ހަރަކާތްތެރިވާ ހަތިޔާރު އެޅި ޖަމާޢަތް, ޙިޒްބުاللهގެ ހަނގުރާމަވެރިން ޔަހޫދީ ފައުޖުގެ އަސްކަރީ މަރުކަޒަކަށް އަމާޒުކޮށް ވަރުގަދަ ރޮކެޓް ޙަމަލާތަކެއް ދީފިއެވެ. މި ޙަމަލާތައް އަމާޒު ކޮށްފައި ވަނީ ޒަޔަނިސްޓު އިސްރާއީލުގެ އުތުރުގައި އޮންނަ އަސްކަރީ މަރުކަޒަކަށެވެ. މި ޙަމަލާގައި ޔަހޫދީ ފައުޖުގެ ސިފައިންގެ ފުރާނައަށް ނުރައްކާވި ކަން ސާފެއް ނޫނެވެ.
ޙިޒްބުاللهން ޔަހޫދީ ފައުޖާ ދެކޮޅަށް ވަރުގަދަ ރޮކެޓް ޙަމަލާތަކެއް ދީފައި މި ވަނީ, ޔަހޫދީ ފައުޖުން ލުބްނާނަށް ބޮން އެޅުމާ ގުޅިގެން އެ ކަމުގެ ރައްދުގައެވެ. ޔަހޫދީ ފައުޖުގެ ޙަމަލާތަކުގައި ޙިޒްބުاللهގެ ހަތަރު ހަނގުރާމަވެރިން ޝަހީދުވި ކަމުގައި އެ ޖަމާޢަތުން ބުންޏެވެ. ޔަހޫދީންގެ އަސްކަރީ މަރުކަޒަށް ރޮކެޓް ޙަމަލާތައް ދީފައި ވަނީ, އެ ކަމުގެ ބަދަލު ހިފުމުގެ ގޮތުންނެވެ.
ޔަހޫދީ ފައުޖުން ވައިގެ ޙަމަލާތައް އަމާޒު ކޮށްފައި ވަނީ ލުބްނާނުގައި އިރުމަތީގައި އޮންނަ އަލް-ނަބަޠިއްޔާއަށާއި އެ ސަރަޙައްދުގައި އޮންނަ އަވަށެއް ކަމުގައިވާ ސަޙަމަރަށެވެ. ނަބަޠިއްޔަތަށް ދިން ޙަމަލާތަކުގައި ޢާންމުންގެ 20 މީހުން ޒަޚަމު ކޮށްލިއެވެ. އަދި, ޢާންމުން ދިރިއުޅޭ ޢިމާރާތެއް ސުންނާފަތި ކޮށްލިއެވެ.
އެ ޙަމަލާތަކުގެ ބަދަލު ހިފުމުގެ ގޮތުން ޙިޒްބުاللهން ޙަމަލާ ދީފައި ވަނީ އިސްރާއީލުގެ އުތުރުގައި އޮންނަ އަސްކަރިއްޔާގެ މައި މަރުކަޒަށެވެ. މި ޙަމަލާތަކުގައި ކަތްޔޫޝާ މަރުކާގެ ޑަޒަނަކަށް ވުރެ ގިނަ ރޮކެޓް ބޭނުން ކޮށްފައިވެއެވެ. ޙިޒްބުاللهގެ ޙަމަލާތަކުގައި 35އަށްވުރެ ގިނަ ރޮކެޓް ބޭނުން ކޮށްފައިވާ ކަމުގައި ޔަހޫދީ ފައުޖުން ވެސް ބުންޏެވެ.
2023ވަނަ އަހަރުގެ އޮކްޓޫބަރު 7ން ފެށިގެން ޙިޒްބުاللهއާއި ޔަހޫދީ ފައުޖާ ދެމެދު ދަނީ ޙަމަލާތައް ބަދަލު ކުރަމުންނެވެ. މިއީ, ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ލާއިންސާނީ ޢުދުވާނެއް ފެށުމާ ގުޅިގެން ބަދަލު ކުރަމުންދާ ޙަމަލާތަކެކެވެ. މަސްރަޙު އިތުރަށް ހޫނެވެ, ލުބްނާނާއި އިސްރާއީލާ ދެމެދު ނުރައްކާތެރި ހަނގުރާމައަށް ފެށިދާނެ ކަމުގެ ބިރު ވަނީ ހީވެފައެވެ.
ހުސްވި އަހަރުގެ އޮކްޓޫބަރުގައި ޙިޒްބުاللهއާއި ޔަހޫދީ ފައުޖާ ދެމެދު ބަދަލު ކުރަން ފެށި ޙަމަލާތަކުގައި ޝަހީދު ކޮށްލާފައިވާ ލުބްނާންގެ ރައްޔިތުންގެ ޢަދަދު ވަނީ 485އަށް އުފުލިފައެވެ. އޭގެ ތެރޭގައި 94އަށްވުރެ ގިނަ ޢާންމުން ހިމެނެއެވެ. އަދި, ގިނައީ ޞިއްޙީ ޚިދުމަތްތެރިންނެވެ. ޙިޒްބުاللهން ވެސް ވަނީ ޔަހޫދީ ފައުޖުގެ 15 ސިފައިންގެ އިތުރުން ޔަހޫދީ ޢާންމުންގެ 11 މީހުން މަރައިލާފައެވެ.