ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓުމަކަށް ގެނައުމާ ގުޅޭ ގޮތުން ކުރަމުންދާ މަޝްވަރާތަކުގައި އެއްވެސް ކުރިއެރުމެއް ލިބިފައި ނުވާ ކަމުގައި ޣައްޒާގައި ވެރިކަން ކުރާ ހަމާސް ޖަމާޢަތުން ބުނެފިއެވެ. ޢުދުވާން ހުއްޓައިލަން ޔަހޫދީން ދެކޮޅު ހަދަމުންދާ މި ދަނޑިވަޅުގައި, ޢުދުވާނާ ދެކޮޅަށް އަޑު އުފުލުމުގެ ގޮތުން އިސްރާއީލުގެ ރަށްތަކުގައި އެތަކެއް ސަތޭކަ ހާސް ބަޔަކު ދަނީ މުޒާހަރާ ކުރަމުންނެވެ.
ޙަމާސްގެ އިސް އޮފިޝަލެއް ކަމުގައިވާ އުސާމާ ޙަމްދާން ވިދާޅުވީ, ޔަހޫދީ ފައުޖުގެ ލާއިންސާނީ ޢުދުވާން ހުއްޓުމަކަށް ގެނައުމާ ގުޅޭ ގޮތުން މަޝްވަރާ ކުރުމަށް އެ ޖަމާޢަތުން އަދިވެސް ތައްޔާރަށް އޮތް ކަމުގައެވެ. "އަނެއްކާ ވެސް, ޙަމާސުން މި އޮތީ ބިނާކުރަނިވި މަޝްވަރާތަކެއް ކޮށް, ދެމެހެއްޓެނިވި ގޮތެއްގައި ޢުދުވާންތައް ހުއްޓުމަކަށް ގެނައުމަށް ތައްޔާރަށް. އަދި, ޣައްޒާއިން އިސްރާއީލުގެ [ހައްދުފަހަނަ އެޅި] ސިފައިން ބާލައި, އަސީރުން ބަދަލު ކުރުމަށް ވެސް ތައްޔާރަށް،" ޙަމްދާން ވިދާޅުވިއެވެ.
ޔަހޫދީ ފައުޖުގެ ލާއިންސާނީ ޢުދުވާން ހުއްޓުމަކަށް ގެނައުމަށް ކުރަމުންދާ މަޝްވަރާތައް އިސްވެ ވިލަރެސް ކުރަމުން ދަނީ ޢަރަބި ޤައުމުތަކުންނެވެ. އެ ކަމުގައި އެންމެ އިސްކޮށް ހަރަކާތްތެރިވަމުން ދަނީ މިޞްރާއި ޤަޠަރެވެ. އެމެރިކާއިން ވެސް ދަނީ ނަމެއްގައި މަޝްވަރާތައް ކުރިއަރުވަން މަސައްކަތް ކުރަމުންނެވެ. ނަމަވެސް, މި ކަމުގައި އެެއްވެސް ކުރިއެރުމެއް ލިބިފައެއް ނެތެވެ.
ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ޢުދުވާން ދާއިމަށް ހުއްޓައިލައި, ޣައްޒާއަށް އަރައިގަނެފައިވާ ޔަހޫދީ ފައުޖުގެ އަނިޔާވެރި ސިފައިން އެ ސަހަރުން ފޭބުމަކީ ޙަމާސްގެ އެންމެ ބޮޑު ޝަރުޠެވެ. ނަމަވެސް, ޙަމްދާން ވިދާޅުވީ, އެމެރިކާގެ ރައީސް ޖޯ ބައިޑަން ދާދި ފަހުން ހުށަހަޅުއްވާފައިވާ ސުލްޙައިގެ މަގުޗާޓަށް ޙަމާސް އެއްބަސް ކުރުވަން އެމެރިކާއިން އެ ޖަމާޢަތަށް ބާރު އަޅަމުންދާ ކަމުގައެވެ. އެއީ, ޔަހޫދީންނަށް ފައިދާވާ ގޮތަށް ފަރުމާ ކޮށްފައިވާ އެއްބަސްވުމެއްގެ ގޮތުގައި ޙަމާސުން ދެކެއެވެ.
މި ޢުދުވާންތައް ހުއްޓުމަކަށް ގެނައުމަށް ގޮވައިލާ އަޑުތައް އިސްރާއީލުގެ އެތެރޭގައި ވެސް ދަނީ ގަދަވަމުންނެވެ. މި ގޮތުން, އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫގެ ސަރުކާރާ ދެކޮޅަށް ބާއްވަމުންދާ ސިލްސިލާ މުޒާހަރާގެ ބައިވެރިންގެ ޢަދަދު ދަނީ އިތުރުވަމުންނެވެ. ޖޫން 29ވަނަ ދުވަހު ތެލް އަވީވުގައި ބޭއްވި މުޒާހަރާގައި ވެސް 130,000އަށްވުރެ ގިނަ މީހުން ބައިވެރިވިއެވެ.
މި މުޒާހަރާތައް އިންތިޒާމު ކުރުމުގައި އިސްކޮށް ހަރަކާތްތެރި ވަނީ, ޙަމާސުން ރަހީނު ކޮށްފައިވާ އަސީރުންގެ ޢާއިލާތަކުންނެވެ. އެ މީހުން ގަބޫލު ކުރާ ގޮތުގައި, އަސީރުން މިނިވަން ކުރުމުގެ ބަދަލުގައި ނަތަންޔާހޫ އިސްކޮށްފައި ވަނީ ޣައްޒާގެ މުސްލިމުންގެ ލޭއޮހޮރުވައިލުމެވެ. ވީހާ ވެސް ގިނަ ޢަދަދެއްގެ ބަޔަކު ޝަހީދުކޮށް, ޢާއިލާތައް ނެތިކޮށްލުމެވެ.
"އެއްބަސްވުމެއް އެކުލަވައިލަން ކުރަމުންދާ މަސައްކަތަކަށް ނަތަންޔާހޫ ދަނީ ހުރަސް އަޅަމުން. އެ ކަން ހުއްޓުވަން ޖެހޭ. އޭނާ އުޅެނީ ޢުދުވާން ދިގުދަންމަން. އެއީ, އޭނާގެ އަމިއްލަ ސިޔާސީ ބޭނުމަކަށް ޓަކައި،" ނަތަންޔާހޫއާ ދެކޮޅު މުޒާހަރާތައް ރޭވުމުގައި އިސްކޮށް ހަރަކާތްތެރިވާ އެކަކު ބުންޏެވެ.
ޢުދުވާންތައް ހުއްޓުވުމާ ގުޅޭ ގޮތުން ބައިޑަން ހުށަހަޅުއްވާފައިވާ ސުލްޙައިގެ މަގުޗާޓަށް ބައިޑަންގެ ސަރުކާރުން ވަނީ އިތުރު ބަދަލުތަކެއް ހުށަހަޅާފައެވެ. އަދި, މި ބަދަލުތައް މިޞްރާއި ޤަޠަރުގެ އޮފިޝަލުންނާ ހިއްސާ ކޮށްފައިވާނެ ކަމުގައި ނަން ހާމަކޮށްފައި ނުވާ ބައިޑަންގެ ސަރުކާރުގެ އޮފިޝަލަކު ބުންޏެވެ. އެ ބަދަލުތަކަކީ, ޙަމާސާއި ޔަހޫދީންނާ ދެމެދު ސުލްޙައިގެ މަޝްވަރާތައް ފެށުމާ ގުޅޭ ހުށަހެޅުމެއް ކަމަށް ވެސް އެ އޮފިޝަލް ބުންޏެވެ.
ބައިޑަން ހުށަހަޅުއްވާފައި ވަނީ ތިން މަރުހަލާއެއްގެ މައްޗަށް ބިނާ ކޮށްފައިވާ މަގުޗާޓެކެވެ. ފުރަތަމަ މަރުހަލާގެ ދަށުން ޔަހޫދީ ފައުޖުން ޢުދުވާންތައް ހުއްޓައިލަން ޖެހޭނެއެވެ. އަދި, ޣައްޒާއިން ފައިބައި, ކުށެއް ނެތި ހައްޔަރު ކޮށްފައިވާ ފަލަސްޠީނުގެ ގިނަ ޢަދަދެއްގެ މުސްލިމުން މިނިވަން ކުރަން ޖެހޭނެއެވެ.
މަގުޗާޓުގެ ފުރަތަމަ މަރުހަލާ 42 ދުވަހަށް ދެމިގެންދާއިރު, އެ މުއްދަތުގެ ތެރޭގައި ޙަމާސްގެ މުޖާހިދުންނާއި ޔަހޫދީންނާ ދެމެދު މަޝްވަރާތައް ބޭއްވުމަށް ވެސް ބައިޑަން ވަނީ ހުށަހަޅުއްވާފައެވެ. އެ މަޝްވަރާތަކުގައި މަގުޗާޓުގެ ދެވަނަ މަރުހަލާގެ ދަށުން އަމަލު ކުރާނެ ގޮތްތަކަށް ދެ ފަރާތުން އެއްބަސްވާނެއެވެ. އަދި, ދެ ފަރާތުގެ ދެމެދުގައި އަސީރުން ބަދަލު ކުރެވޭނެއެވެ. ޙަމާސްގެ ޙަމްދާން ވިދާޅުވީ, ބައިޑަންގެ އައު ހުށަހެޅުންތައް އެ ޖަމާޢަތާ އަދި ހިއްސާ ކޮށްފައި ނުވާ ކަމުގައެވެ.
މީގެ އަށް މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 37,834އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމުކޮށްލާފައިވާ މީހުންގެ ޢަދަދު ވަނީ 86,858އަށް އުފުލިފައެވެ. އދއިން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.