އީރާނުގެ ރިޔާސީ އިންތިޚާބުގައި ވާދަ ކުރެއްވި ހަތަރު ކެނޑިޑޭޓުންގެ ތެރެއިން އެއްވެސް ކެނޑިޑޭޓަކަށް ކާމިޔާބީ ނުލިބި, ދެވަނަ ބުރަކަށް ހިނގައްޖެއެވެ. ޖޫން 28ގައި ބޭއްވި އިންތިޚާބުގައި ކުރި ހޯއްދަވާފައިވާ ދެ ކެނޑިޑޭޓުންނަކީ އީރާނުގެ އިސް ނިއުކްލިޔަރ ނެގޯޝިއޭޓަރ ކަމުގެ މަޤާމު ފުރުއްވާފައިވާ ސަޢީދު ޖަލީލީއާއި ޤާނޫނު ހަދާ މަޖިލީހުގެ މެންބަރު މަސްޢޫދު ބީޛިޝްކިޔާނެވެ.
އީރާނުުގައި ކުއްލި ރިޔާސީ އިންތިޚާބެއް ބާއްވާފައި މި ވަނީ އެ މަޤާމުގައި ހުންނެވި އިބްރާހީމް ރައީސީ އަވަހާރަވުމާ ގުޅިގެންނެވެ. ރައީސީ އަވަހާރަވެފައި ވަނީ މޭ 19ވަނަ ދުވަހު, އޭނާ ދަތުރު ކުރައްވަމުން ގެންދެވި ހެލިކޮޕްޓަރު ވެއްޓުނު ހިތާމަވެރި ހާދިސާގައެވެ.
އޭނާއާ އެކު ދަތުރު ކުރައްވަމުން ގެންދެވި ޚާރިޖީ ވަޒީރު ޙުސައިން އަމީރު ޢަބްދުއްލުހައްޔާނީއާއި, އީސްޓް އަޒަރްބައިޖާން ޕުރޮވިންސުގެ ގަވަރުނަރު މާލިކު ރަޙްމަތީއާއި, ތަބްރީޛް ސިޓީގެ ހުކުރު ނަމާދާ ބެހޭ އިސްވެރިޔާ މުޙައްމަދު ޢަލީ އަލް-ހާޝިމް ވެސް އެ ހާދިސާގައި އަވަހާރަވިއެވެ.
އައު ރައީސަކު އިންތިޚާބު ކުރުމަށް ބޭއްވި ވޯޓުގައި އެއްވެސް ކެނޑިޑޭޓަކަށް ކުރި ހޯއްދެވިފައި ނުވާއިރު, އެންމެ ގިނަ ވޯޓު ކާމިޔާބު ކުރެއްވި ޖަލީލީއާއި ބީޛިޝްކިޔާން އިންތިޚާބުގެ ދެވަނަ ބުރުގައި ކުރިމަތިލައްވަން ހަމަޖެހިފައި ވަނީ ޖުލައި 5ވަނަ ދުވަހުއެވެ. މިއީ, އީރާނުގެ 1979ވަނަ އަހަރު އިސްލާމީ އިންޤިލާބަށް ފަހު އެންމެ މަދު ޢަދަދެއްގެ ބަޔަކު ވޯޓުލުމުގައި ބައިވެރިވި ރިޔާސީ އިންތިޚާބެވެ. އަދި, އެއަށް ފަހު އީރާނުގައި ބޭއްވި ރިޔާސީ އިންތިޚާބެއް ދެވަނަ ބުރަކަށް ދިޔަ ދެވަނަ ފަހަރެވެ.
ހަފުތާ ބަންދުގައި ބޭއްވި އިންތިޚާބުގެ ފުރަތަމަ ބުރުގައި ވޯޓުލާން ނުކުމެފައި ވަނީ, އެ ކަމުގެ ޙައްޤު ލިބިފައިވާ 61 މިލިޔަން މީހުންގެ ތެރެއިން އެންމެ 40 އިންސައްތަ މީހުންނެވެ. އޭގެ ތެރެއިން އެންމެ ބޮޑު ތާޢީދެއް ހޯއްދަވާފައި ވަނީ ބީޛިޝްކިޔާނެވެ. އޭނާއަށް ލިބިވަޑައިގެންނެވީ 42.5 އިންސައްތައެވެ. އޭނާއާ އެންމެ ގާތުން ވާދަ ކުރައްވާފައިވާ ޖަލީލީ ވަނީ 38.6 އިންސައްތަ މީހުންގެ ތާޢީދު ހޯއްދަވާފައެވެ.
އީރާނުގެ ރިޔާސީ އިންތިޚާބުގައި ވާދަ ކުރައްވަން ހަ ބޭފުޅަކަށް ރުހުން ލިބުނެވެ. ނަމަވެސް, ޖަލީލީއާއި ބީޛިޝްކިޔާންގެ އިތުރުން އިންތިޚާބުގައި ވާދަ ކުރައްވާފައި ވަނީ އީރާނުގެ ޤާނޫނު ހަދާ މަޖިލީހުގެ ރައީސް މުޙައްމަދު ބާޤިރު ޤާލިބާފީއާއި ދާޚިލީ ވުޒާރާއާއި ޝަރުޢީ ދާއިރާގެ ވަޒީރު ކަމުގެ މަޤާމު ފުރުއްވާފައިވާ މުޞްޠަފާ ބޫރޫމުޙައްމަދީއެވެ. ޠަހްރާންގެ މޭޔަރު ޢަލީރިޟާ ޛަކާނީއާއި އީރާނުގެ ޝަހީދުންގެ ފައުންޑޭޝަންގެ ވެރިޔާ އަމީރުޙުސައިނީ ޣާޛީޛާދާ ހާޝިމީ ވަނީ ނަން އަނބުރާ ގެންދަވާފައެވެ.
އީރާނުގެ ރިޔާސީ އިންތިޚާބުގައި ވާދަ ކުރައްވަން ޖުމުލަ 74 ބޭފުޅަކު ގާޑިޔަން ކައުންސިލަށް ނަން ހުށަހަޅުއްވާފައިވެއެވެ. އޭގެ ތެރޭގައި, ކުރީގެ ރައީސް މަޙްމޫދު އަޙްމަދިންޖާދީ އަދި ޤާނޫނު ހަދާ މަޖިލީހުގެ ރައީސް ކަމުގެ މަޤާމު ތިން ދައުރެއްގައި ފުރިހަމަ ކުރައްވާފައިވާ ޢަލީ ލަރީޖާނީ ހިމެނިވަޑައިގަންނަވައެވެ. ނަމަވެސް, ގާޑިޔަން ކައުންސިލުން އެ ބޭފުޅުންނަށް ރުހުން ދީފައެއް ނުވެއެވެ.
ފަހަކަށް އައިސް އީރާނުގައި ބާއްވާ އިންތިޚާބުތަކުގައި ވޯޓުލާ މީހުންގެ ޢަދަދު މަދުވަމުންދާ ކަން ފާހަގަ ކުރެވެއެވެ. މި ގޮތުން, 2024ވަނަ އަހަރު ބޭއްވި ޤާނޫނު ހަދާ މަޖިލީހުގެ އިންތިޚާބުގައި ވޯޓުލާފައި ވަނީ, ވޯޓުލުމުގެ ޙައްޤު ލިބިގެންވާ މީހުންގެ ތެރެއިން އެންމެ 40 އިންސައްތައެވެ. މިއީ, 1979ވަނަ އަހަރު އީރާނަށް ގެނައި އިސްލާމީ އިންޤިލާބަށް ފަހު ބޭއްވި އިންތިޚާބެއްގައި އެންމެ މަދު ޢަދަދެއްގެ ބަޔަކު ބައިވެރިވި ފަހަރެވެ.