ޔޫރޯ ފުޓްބޯޅަ މުބާރާތުގެ ގަދަ 16 ގެ ބުރުގައި ރޭ ސްލޮވާކިއާ އާ ދެކޮޅަށް ކުޅުނު މެޗަށްފަހު ދެއްކި ވާހަކައިގައި އިންގްލެންޑްގެ ކޯޗު، ގަރެތު ސައުތުގޭޓް ބުނީ، ސްވިޓްޒަލޭންޑާ ދެކޮޅަށް މިހާރަށް ވުރެ ރަނގަޅަށް އިންގްލެންޑް ކުޅެން ޖެހޭނެ ކަމަށާއި، ޓީމުތެރޭގައި އެކުވެރިކަމާއި އެއް ރޫޚެއްގައި މަސައްކަތްކުރުމުގެ ޝައުގުވެރިކަން އޮތުމުން ހުރިހާ ކަމެއް ފަސޭހަވެގެންދާނެ ކަމަށެވެ.
މެޗަށްފަހު ބޭއްވި ނޫސްވެރިންގެ ބައްދަލުވުމުގައި ސައުތުގޭޓް ވަނީ، ޓީމެއްގައި ތިބި ތަރިންގެ އެހީއާއެކު މެޗެއް ކާމިޔާބުކުރުމާއި، އެހެން ކުޅުންތެރިންގެ މަސައްކަތުން މެޗެއްގެ ނަތީޖާ އަނބުރާލައި، އެ މެޗު ކާމިޔާބުކުރެވުމުގައި މުހިއްމު ދައުރެއް އަދާކުރެވޭގޮތްވުމުން އެމީހުންނަށް އިތުބާރު އޮތް ކަމަށް އެ ކުޅުންތެރިންނަށް ދޭހަވެގެންދިއުމަކީ މުޅި ޓީމަށް ވެސް ލިބުނު ވަރަށް ބޮޑު ހިތްހަމަޖެހުމެއް ކަމަށް ބުނެފައެވެ.
މިހާތަނަށް ހެދިފައިވާ ގޯސްތައް ރަނގަޅުކުރަމުން އައިސްފައިވާ ކަމަށާއި، ޒުވާން ކުޅުންތެރިންނަށް ކުޅުމުގެ ފުރުޞަތުދެމުން މެޗުތަކުގައި ރަނގަޅު ނަތީޖާ ނެރެމުންދާ ކަމަށް ބުނެފައެވެ.
މެޗުގައި ސްލޮވާކިއާގެ ފަރާތުން ފެނުނު ކުޅުމާ މެދު ހައިރާންނުވާ ކަމަށާއި، ފެނިގެންދިޔައީ އެ ޓީމުގެ ކޯޗު ކުރަމުންދިޔަ ރަނގަޅު މަސައްކަތް ކަމަށް ސައުތުގޭޓް ބުންޏެވެ. އޭނާގެ ޓީމަށް ދިމާވި މައްސަލައަކީ ޑިފެންސްކުރަންޖެހުނު ބައެއް ހާލަތްތަކުގައި އެންމެ ރަނގަޅަށް މަސައްކަތްނުކުރެވުން ކަމަށާއި، ސްލޮވާކިއާ އިން ވަރަށް ބުރަކޮށް މަސައްކަތްކުރިކަމަށާއި، އެހެންނަމަވެސް އެންމެ ގޯލަކުން ހުރިހާ ކަމެއް ބަދަލުވެގެންދާނެ ކަމަށާއި، އޭނާގެ ޓީމަށް އެކަން ކުރެވިދާނެ ކަމަށް އުއްމީދުކުރިކަމަށް ވެސް ސައުތުގޭޓް ވަނީ ބުނެފައެވެ.
މެޗަށްފަހު ވާހަކަދައްކަމުން ސްލޮވާކިއާގެ ކޯޗު، ފްރާންޗެސްކޯ ކަލްޒޯނާ ބުނީ، އޭނާގެ ޓީމުން ދެއްކި ކުޅުމާ މެދު ފަޚުރުވެރިވާ ކަމަށާއި، ދުނިޔޭގެ އެންމެ ވަރުގަދަ އެއް ޓީމުގެ އިތުރުން މުބާރާތުގެ ފޭވަރިޓަކާ ދެކޮޅަށް ދެއްކީ ތައުރީފު ހައްގު ކުޅުމެއް ކަމަށެވެ.
ސްލޮވާކިއާގެ ކުޅުންތެރިންނަށް އިރުޝާދުދީ ތަމްރީންކުރުމަކީ ލިބުނު ޝަރަފެއް ކަމަށާއި، ދަނޑުމަތީގައި އެމީހުންގެ ފަރާތުން ރަނގަޅު ކުޅުމެއް ކުޅެ، ތަފާތު ދެއްކި ކަމަށާއި، އެކަމާ އޭނާ ވަރަށް ބޮޑަށް ހިތްހަމަޖެހޭ ކަމަށް ވެސް ކަލްޒޯނާ ބުންޏެވެ.
މުބާރާތުގެ ކުއާޓާ ފައިނަލްގައި އިންގްލެންޑް ނިކުންނަންޖެހޭނީ ސްވިޓްޒަލޭންޑާ ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މި މަހުގެ 6 ވާ ހޮނިހިރު ދުވަހުގެ ރޭގަނޑު 9 ޖަހާއިރު އެވެ.