ޔޫކްރެއިންގެ ވެރިރަށް ކީވާއި ދެވަނައަށް އެންމެ ބޮޑު ރަށް, ހަރްކިވަށް ރަޝިޔާއިން ވަރުގަދަ ޙަމަލާތަކެއް ދީފިއެވެ. މި ޙަމަލާތަކުގައި ރަޝިޔާއިން ވަނީ މިސައިލާއި ގައިޑެޑް ބޮން ބޭނުން ކޮށްފައެވެ. ގައިޑެޑް ބޮން ބޭނުންކޮށް ހަރްކިވަށް ދިން ޙަމަލާތަކުގައި އެކަކު މަރުވި ކަމުގައި ޔޫކްރެއިނުން ބުންޏެވެ.
ކީވަށް ދިން ޙަމަލާތަކުގައި ޢާންމުން ދިރިއުޅޭ ޢިމާރާތަކަށް ވެސް ވަނީ ބޮޑެތި ގެއްލުންތަކެއް ލިބި, އަލިފާން ރޯވެފައެވެ. ރަޝިޔާ-ޔޫކްރެއިން ހަނގުރާމަ 28 މަހަށް ދެމިގެން ގޮސްފައިވާއިރު, ރަޝިޔާއިން ދަނީ ކީވްގެ އިތުރުން އެ ޤައުމުގެ ބޮޑެތި ރަށްތަކަށް މި ފަދަ ނުރައްކާތެރި ޙަމަލާތަކެއް އަމާޒު ކުރަމުންނެވެ. ގިނަ ޙަމަލާތައް އަމާޒު ކުރަމުން ދަނީ, ކަރަންޓުގެ ޚިދުމަތް ދިނުމަށް ބޭނުން ކުރާ އިންޖީނުގެތަކާއި ވަސީލަތްތަކަށެވެ.
މާރިޗު މަހުގެ ތެރޭގައި ރަޝިޔާގެ ފައުޖުތަކުން ވަނީ ވެރިރަށް ކީވަށް ދީފައިވާ ޙަމަލާތައް އިތުރުކޮށް, ވަރުގަދަ ކޮށްފައެެވެ. ނަމަވެސް, ފަހަކަށް އައިސް ރަޝިޔާގެ ޙަމަލާތައް އަމާޒު ކުރަމުން ދަނީ ޔޫކްރެއިންގެ އާބާދީ ބޮޑެތި އެހެން ރަށްތަކަށެވެ. ކީވަށް ދެމުންދާ ޙަމަލާތަކުގެ ޢަދަދު މަދުކޮށްފައި ވަނީ, އެމެރިކާއިން ޔޫކްރެއިނަށް ފޯރުކޮށްދޭ ހަތިޔާރު ބޭނުން ކޮށްގެން ރަޝިޔާގެ ރަށްތަކަށް ޙަމަލާ ދިނުމުގެ ހުއްދަ އެމެރިކާއިން ދިން ފަހުން ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
ކީވަށް އެންމެ ފަހުން ދިން ޙަމަލާތަކުގައި 14 ފަންގިފިލާގެ ޢިމާރާތަކަށް ގެއްލުންވެފައި ވަނީ, ރަޝިޔާއިން ބޭނުން ކުރި މިސައިލް ދިފާޢު ކުރުމާ ގުޅިގެން މިސައިލްގެ ބައިތަކެއް ވެއްޓުމުގެ ސަބަބުންނެވެ. މި ހާދިސާ ހިނގާފައި ވަނީ ކީވްގެ އޮބޮލޯން ސަރަޙައްދުގައެވެ. މިސައިލްގެ ބައިތައް ވެއްޓި, އެ ޢިމާރާތުގައި އަލިފާން ރޯވި ކަމުގައި ކީވުން ބުނެއެވެ. އަދި, ފަސް މީހަކަށް ފަރުވާ ދޭން ޖެހުނު ކަމުގައި ވެސް ޔޫކްރެއިންގެ އޮފިޝަލުން ބުންޏެވެ.
ކީވްގެ މޭޔަރު ވިތާލީ ކްލިޗްކޯ ވިދާޅުވީ, ގެއްލުންވި ޢިމާރާތުގައި ދިރިއުޅުނު މީހުންގެ ތެރެއިން 10 ވަރަކަށް މީހުން އެހެން ޢިމާރާތަކަށް ބަދަލު ކުރަން ޖެހުނު ކަމުގައެވެ. މީގެ އިތުރުން, ރަޝިޔާއިން ބޭނުން ކުރި ބައެއް މިސައިލްގެ ބައިތަށް ކީވްގެ ރަށް ބޭރަށް ވެސް ވެއްޓުނެވެ. ނަމަވެސް, އެ ހާދިސާތަކުގައި އެއްވެސް މީހެއްގެ ފުރާނައަށް ނުރައްކާވި ކަން ސާފެއް ނޫނެވެ.
ހަރްކިވަށް ރަޝިޔާގެ ފައުޖުތަކުން ދީފައިވާ ޙަމަލާތަކުގައި މަރުވެފައި ވަނީ ޑެލިވަރީ ޚިދުމަތްދޭ ކުންފުންޏެއްގައި މަސައްކަތް ކުރާ ޑްރައިވަރެކެވެ. ގައިޑެޑް ބޮމެއް ބޭނުން ކޮށްގެން ރަޝިޔާއިން ދިން ޙަމަލާގައި ބޮޑެތި ގެއްލުންތަކެއް ލިބި, ނުވަ މީހުން ޒަޚަމުވި ކަމުގައި ހަރްކިވްގެ ސަރަޙައްދީ ގަވަރުނަރު އޮހެލް ސިންޔެހުބޮވް ވިދާޅުވިއެވެ. އޭގެ ތެރޭގައި އަށް މަހުގެ ތުއްތު ކުއްޖަކު ހިމެނޭ ކަމުގައި ވެސް އޭނާ ވިދާޅުވިއެވެ.
މި ޙަމަލާތަކާ ގުޅޭ ގޮތުން ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވީ, ފާއިތުވި ހަފުތާއެއްހާ ދުވަހުގެ ތެރޭގައި އެ ޤައުމުގެ ރަށްތަކަށް ޙަމަލާ ދޭން ރަޝިޔާއިން 800އަށްވުރެ ގިނަ ގައިޑެޑް ބޮން ބޭނުން ކޮށްފައިވާ ކަމުގައެވެ. އަދި, މި ފަދަ ނުރައްކާތެރި ޙަމަލާތަކުން ސަލާމަތް ވެވޭނީ, ދުނިޔެއިން ޔޫކްރެއިނަށް އެހީތެރިކަން ފޯރުކޮށްދިނުން އިތުރު ކޮށްގެން ކަމުގައެވެ. އަދި, ރަޝިޔާގެ އަސްކަރީ އަމާޒުތަކަށް ޙަމަލާ ދިނުމުގެ ގާބިލުކަން އިތުރު ކުރަން ޖެހޭ ކަމުގައި ވެސް އޭނާ ވިދާާޅުވިއެވެ.
2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ފެށި ރަޝިޔާ-ޔޫކްރެއިން ހަނގުރާމައިގައި ރަޝިޔާއިން ދާދި ފަހުން ވަނީ ޔޫކްރެއިންގެ އިތުރު ދެ އަވަށަކަށް އަތްގަދަ ކޮށްފައެވެ. އެއީ, ޔޫކްރެއިންގެ އިރުމަތީ ދޮންޏެސްކުގެ ދެ އަވަށް ކަމުގައިވާ ސްޕިރްނޭއާއި ނޮވޯއެލެކްސާންދްރިވްސްކާއެވެ.
ރަޝިޔާގެ ދިފާޢީ ވުޒާރާއިން ބުނީ, ޔޫކްރެއިންގައި ހަނގުރާމަ ކުރަމުންދާ އެ ޤައުމުގެ ފައުޖުތަކުން ދެމުންދާ ޙަމަލާ އިތުރަށް ވަރުގަދަ ކޮށްފައިވާނެ ކަމުގައެވެ. ސްޕިރްނާއަކީ ލުހާންސްކްގެ ރަށް ބޭރުގައި އޮންނަ އަވަށެކެވެ. އަދި, ނޮވޯއެލެކްސާންދްރިވްސްކާއަކީ ސްޕިރްނާގެ 130 ކިލޯމީޓަރު ހުޅަނގުން އޮންނަ އަވަށެކެވެ. އެ ދެ އަވަށަށް ރަޝިޔާގެ ފައުޖުތަކުން އަތްގަދަ ކޮށްފައިވާ ކަން ޔޫކްރެއިނުން ކަށަވަރު ކޮށްދީފައެއް ނުވެއެވެ.
ނަމަވެސް, މި ޙަމަލާތަކުގެ ރައްދުގައި ޔޫކްރެއިނުން ވަނީ ރަޝިޔާގެ ރަށްތަކަށް އަމާޒުކޮށް ވަރުގަދަ ޙަމަލާތަކެއް ދީފައެވެ. ރަޝިޔާގެ ދިފާޢީ ވުޒާރާއިން ބުނީ, ޔޫކްރެއިންގެ ސަރަޙައްދީ ރޮނގު ކައިރީގައި އޮންނަ ރަޝިޔާގެ ތިން ސަރަޙައްދަކަށް ޔޫކްރެއިނުން ވަރުގަދަ ޑްރޯން ޙަމަލާތަކެއް ދީފައިވާ ކަމުގައެވެ. މި ޙަމަލާތައް ދިނުމަށް ޔޫކްރެއިނުން 36 ޑްރޯން ބޭނުން ކޮށްފައިވެއެވެ.
ރަޝިޔާގެ ދިފާޢީ ވުޒާރާއިން ބުނީ, އެ ޤައުމުގެ ހުޅަނގުގައި އޮންނަ ބްރިޔަންސްކަށް ޙަމަލާ ދޭން ޔޫކްރެއިނުން ބޭނުން ކުރި 18 ޑްރޯނެއް ދިފާޢުކޮށް ވައްޓައިލާފައިވާނެ ކަމުގައެވެ. އަދި, ބްރިޔަންސްކްގެ ދެކުނުން އޮތް ކޫރްސްކަށް ޙަމަލާ ދޭން ބޭނުން ކުރި ނުވަ ޑްރޯން ދިފާޢުކޮށް ވައްޓައިލާފައިވާނެ ކަމަށާއި, ބިޔެލްގޮރޮދަށް ޙަމަލާ ދޭން ވެސް ޔޫކްރެއިނުން ނުވަ ޑްރޯން ބޭނުން ކޮށްފައިވާ ކަމުގައެވެ. އެ ޑްރޯންތައް ވެސް ދިފާޢުކޮށްފައިވާނެ ކަމުގައި އެ ވުޒާރާއިން ބުންޏެވެ. މި ޙަމަލާތަކުގައި އެއްވެސް މީހެއްގެ ފުރާނައަށް ނުރައްކާވެފައެއް ނުވެއެވެ.
ރަޝިޔާ-ޔޫކްރެއިން ހަނގުރާމައިގެ ތެރެއިން ރަޝިޔާއިން އަތްގަދަ ކޮށްފައިވާ ސަރަޙައްދުތަކުގެ ތެރޭގައި ޔޫކްރެއިންގެ އިރުމަތީ ދޮންބާސްގައި އޮންނަ ލުހާންސްކާއި ދޮންޏެސްކުގެ އިތުރުން ދެކުނުގައި އޮތް ޒަޕޮރީޜިޔާގެ ބައެއް ސަރަޙައްދުތައް ވެސް ހިމެނެއެވެ. ރަޝިޔާގެ ފައުޖުތަކާ ދެކޮޅަށް ޔޫކްރެއިނުން ރައްދު ޙަމަލާގެ ކެމްޕޭނެއް ފެށި ނަމަވެސް, އެ ކެމްޕޭނުގެ ދަށުން ބޮޑެތި ކުރިއެރުންތަކެއް ހޯދިފައި ނުވާ ކަން ފާހަގަ ކޮށްލަން ޖެހެއެވެ.