ޣައްޒާ ޝަހީދުންގެ ޢަދަދު 38,000އާ ގާތަށް, ދެކުނުން އެތަކެއް ހާސް ބަޔެއްގެ ގެދޮރު ގެއްލުވައިލައިފި
ފަލަސްޠީނުގެ ޣައްޒާގެ ދެކުނުގައި ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި އަށް މީހުން ޝަހީދު ކޮށްލައި, ދޮޅަހަކަށް ވުރެ ގިނަ މީހުން ޒަޚަމު ކޮށްލައިފިއެވެ. ޣައްޒާގެ އެންމެ ދެކުނުން އޮތް ރަފަޙާއި, އެ ރަށާ އިންވެގެންވާ ސަރަޙައްދުތަކުގައި ޔަހޫދީ ފައުޖުން ހިންގަމުންދާ ޢުދުވާނާ ގުޅިގެން އެތަކެއް ހާސް ބަޔަކަށް ވަނީ އަމިއްލަ ވަޒަން ދޫކޮށް އެހެން ސަރަޙައްދުތަކަށް ހިޖުރަ ކުރަން މަޖުބޫރުވެފައެވެ.
ޣައްޒާގެ އުތުރުގައި އޮތް ޣައްޒާ ސިޓީގައި ވެސް ޔަހޫދީ ފައުޖުން ދަނީ ގަތުލުއާންމު ހިންގަމުންނެވެ. އެ ގޮތުން ފާއިތުވި 24 ވަރަކަށް ގަޑިއިރުގެ ތެރޭގައި ޣައްޒާ ސިޓީއަށް ދީފައިވާ ރަޙުމު ކުޑަ ޙަމަލާތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 17އަށް އުފުލިފައެވެ. އެ ރަށުގެ ޒައިތޫން އަވަށުގައި ހިންގަމުންދާ ޢުދުވާނުގައި ޝަހީދު ކޮށްލާފައިވާ މީހުންގެ ތެރޭގައި ގިނައީ އަންހެނުންނާއި މައުސޫމު ކުޑަކުދިންނެވެ.
ޒައިތޫން އަވަށުގައި ގިނަ ޢަދަދެއްގެ ބަޔަކު ޖަމާވެފައިވާ މާރުކޭޓަކަށް ވެސް ޔަހޫދީ ފައުޖުގެ ޙަމަލާތައް އަމާޒު ކޮށްފައިވެއެވެ. އެ ޙަމަލާތަކަށް ފަހު ނަގާފައިވާ ބައެއް މަންޒަރުތައް ޢާންމު ކޮށްފައިވާއިރު ފެންނަނީ ޕާނާއި އެހެނިހެން ކާބޯތަކެތި ވިއްސިވިހާލިވެފައިވާ މަންޒަރެވެ. އަދި, ޝަހީދު ކޮށްލާފައިވާ މީހުންނާއި ޒަޚަމު ކޮށްލާފައިވާ މީހުންގެ ލެއިން ފަސްގަނޑު ތަތްތެޅިފައިވާ މަންޒަރެވެ.
ޔަހޫދީ ފައުޖުން މިހާރު ދަނީ ޣައްޒާގެ ދެކުނުގައި އޮތް ޚާން ޔޫނިސަށް އެއްގަމު މަގުން އަރައި ޢުދުވާންތައް ފުޅާ ކުރަން ވެސް ތައްޔާރުވަމުންނެވެ. އެ ކަމަށް ތައްޔާރުވުމުގެ ގޮތުން ޔަހޫދީ ފައުޖުން ވަނީ އެ ރަށުގެ އިރުމަތީގައިވާ ސަރަޙައްދުތައް ހުސް ކުރަން އެ ސަރަޙައްދުގެ އަހުލުވެރިންނަށް އަންގާފައެވެ. އެއީ, ޚާން ޔޫނިސަށް ޔަހޫދީ ފައުޖުން އެއްގަމު މަގުން އަރާ ދެވަނަ ފަހަރެވެ.
އެ ކަމަށް ބާރު އެޅުމުގެ ގޮތުން ޔަހޫދީ ފައުޖުން ވަނީ އެ ރަށަށް ޙަމަލާތައް އަމާޒު ކުރަން ފަށާފައެވެ. އެ ގޮތުން, ޔަހޫދީ ފައުޖުން ދަނީ ޢާންމުންގެ ގެދޮރާއި, ރެފިއުޖީން ދިރިއުޅޭ ފޭލިގެތަކުގެ އިތުރުން ވަގުތީ ހިޔާތަކާއި, ހަސްފަތާލުތަކާއި, މަދަރުސާތަކާއި މިސްކިތްތަކަށް ބޮން އަޅަމުންނެވެ. ޙަމަލާތައް އަމާޒު ކޮށްފައި ވަނީ ޚާން ޔޫނިސްގެ ކަރާރަތާއި އަބްސާނަށެވެ.
ޔަހޫދީ ފައުޖުން ހުސް ކުރަން އަންގާފައިވާ ސަރަޙައްދުތަކުގެ ތެރޭގައި, ޚާން ޔޫނިސްގައި ހުންނަ ޔޫރަޕިއަން ޣައްޒާ ހަސްފަތާލު ހުންނަ ސަރަޙައްދު ހިމެނެއެވެ. އެއީ, ޚާން ޔޫނިސްގެ އިތުރުން ރަފަޙަށް ޚިދުމަތް ދިނުމަށް ގާއިމު ކޮށްފައިވާ ހަސްފަތާލެކެވެ. ޔަހޫދީންގެ އަމުރާ އެކު, އެ ތަނުގައި ތިބި ބަލި މީހުން ރައްކާތެރި ހިސާބުތަކަށް ބަދަލު ކުރުމުގެ މަސައްކަތް ވަނީ ފަށާފައެވެ.
އެ ޢުދުވާނުން ސަލާމަތް ވާން އެ ސަރަޙައްދުގައި ދިރިއުޅޭ އެތަކެއް ހާސް ރައްޔިތުން މިހާރު ވެސް ވަނީ އެ ރަށުން ފައިބަން ފަށާފައެވެ. ނަމަވެސް, ޔަހޫދީ ފައުޖުގެ އަނިޔާވެރި ސިފައިންގެ ވަކިތަކުން ސަލާމަތް ވެވޭނެ އެެއްވެސް މަގެއް ޣައްޒާއަކު ނެތެވެ. ޔަހޫދީ ފައުޖުން ޚާން ޔޫނިސަށް ޢުދުވާންތައް ފުޅާ ކުރާނެ ކަމުގެ އިންޒާރު ދީފައި ވަނީ, އެ ރަށުގައި ތިބި އިސްލާމިކް ޖިހާދުގެ މުޖާހިދުން ޔަހޫދީންގެ ރަށްތަކަަށް އަމާޒުކޮށް ވަރުގަދަ ރޮކެޓު ޙަމަލާތަކެއް ދިނުމާ ގުޅިގެންނެވެ.
މީގެ އަށް މަސް ކުރިން ޣައްޒާގައި ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 37,925އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމުކޮށްލާފައިވާ މީހުންގެ ޢަދަދު ވަނީ 87,141އަށް އުފުލިފައެވެ. އދން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.