އިންޑިޔާގެ އުތުރުގެ ރަށެއްގައި ގިނަ ޢަދަދެއްގެ ބަޔަކު ބައިވެރިވި ދީނީ އަޅުކަމެއްގެ ތެރެއިން ބަޔަކު ފިތި އޭގެ ތެރެއިން 121 މީހުން މަރުވެއްޖެއެވެ. އުއްތަރު ޕްރަދޭޝް ސްޓޭޓްގެ ހަތުރާސްގައި ހިނގި ހާދިސާގައި މަރުވި މީހުންގެ ތެރޭގައި ގިނައީ އަންހެނުންނެވެ.
ހަތުރާސްގެ ފުލުހުން ބުނީ އެ ހާދިސާގައި ގިނަ ޢަދަދެއްގެ ބަޔަކު މަރުވީ ހިންދޫންގެ އަޅުކަން ބާއްވާފައިވާ ތަނަށް ވަދެވޭ ޢަދަދަށް ވުރެ ތިން ގުނަ އިތުރަށް މީހުން ވަނުމުގެ ފުރުޞަތު ދިނުމުން ކަމުގައެވެ. 80,000 މީހުންގެ ޖާގައިގެ ތަނަށް 250,000އެއްހާ މީހުން ޖަމާވި ކަމުގައި ފުލުހުން ބުންޏެވެ. ގިނަ ޢަދަދެއްގެ ބަޔަކު އެއްވެ ފިތުމުގެ ސަބަބުން 121 މަރުވުމުގެ އިތުރުން 28 މީހުން ޒަޚަމުވެފައިވާ ކަމުގައި ވެސް ފުލުހުން ބުންޏެވެ.
އުއްތަރު ޕްރަދޭޝްގެ ޗީފް ސެކްރެޓަރީ މަނޯޖް ކުމާރް ސިންހު ވިދާޅުވީ މަރުވި މީހުންގެ ތެރޭގައި 108 އަންހެނުންނާއި ހަތް ކުޑަކުދިން ހިމެނޭ ކަމުގައެވެ. ގިނަ ޢަދަދެއްގެ ބަޔަކު ފިތިފައި ވަނީ އަޅުކަން ނިމުމުން އެ ކަމުގައި އިސްކޮށް ޙަރަކާތްތެރިވި ފާދިރީއާ ބައްދަލު ކުރަން އެއްފަހަރާ ގިނަ ޢަދަދެއްގެ ބަޔަކު މަސައްކަތް ކުރުމުންނެވެ. އެ ފާދިރީ ހޯދުމަށް ފުލުހުން ދަނީ މަސައްކަތް ކުރަމުންނެވެ.