އިންޑިޔާއަށް ކުރަމުންދާ ވިއްސާރާގައި އެ ޤައުމުގެ އުތުރުގެ ސަރަޙައްދުތަކުގައި ފެންބޮޑުވެ ބިންގަނޑު ކަނޑައިގެން ދިއުމުގެ ހާދިސާތަކެއް ހިނގައި ބޮޑެތި ގެއްލުންތަކެއް ލިބިއްޖެއެވެ.
ވިއްސާރާގެ ސަބަބުން ފާއިތުވި 24 ގަޑިއިރުގެ ތެރޭގައި އެންމެ ބޮޑު ގެއްލުމެއް ލިބިފައި ވަނީ އިންޑިއާގެ އެންމެ ބޮޑު އާބާދީއެއް އޮންނަ އުއްތަރު ޕްރަދޭޝަށެވެ. އެ ސްޓޭޓުން ނުވަ މީހުން މަރުވެ އެތައް ހާސް ބައެއްގެ ގެދޮރު ގެއްލިފައިވެއެވެ. އޭގެ އިތުރުން އައްސާމުގައި ފެން ބޮޑުވެ ދެ މީހުން މަރުވެ 8،000 މީހުންގެ ގެދޮރު ގެއްލިފައިވެއެވެ. އެ ސްޓޭޓަށް ކުރަމުންދާ ވިއްސާރައިގެ އަސަރު ޖުމްލަ 600،000 މީހުންނަށް ކޮށްފައިވެއެވެ. އަދި އަރުންނަޗަލް ޕްރަދޭޝްސަށް ކުރަމުންދާ ވިއްސާރައިގެ ސަބަބުން އެ ސްޓޭޓުގެ މަދަރުސާތައް ވަނީ ހަފުތާ ނިމެންދެން ބަންދުކޮށްފައެވެ.
އިންޑިޔާގެ އިތުރުން އަވަށްޓެރި ބަންގްލަދޭޝަށް ވެސް ވަނީ ވިއްސާރައިގެ ސަބަބުން ބޮޑެތި ގެއްލުންތަކެއް ލިބި އެތައް ހާސް ބައެއްގެ ގެދޮރު ގެއްލިފައެވެ. ފާއިތުވި ދެ މަސް ދުވަހުގެ ތެރޭގައި އެ ދެ ޤައުމަށް ކުރި ވިއްސާރާގައި އެތައް މިލިއަން މީހުންނެއް ވަނީ ޙާލުގައި ޖެހިފައެވެ.
އިންޑިޔާގެ މޫސުމީ އިދާރާއިން ލަފާކޮށްފައިވާ ގޮތުގައި އެ ޤައުމުގެ ހުޅަނގާއި އުތުރާއި އިރުއުތުރުގެ ސްޓޭޓުތަކަށް ކުރިއަށް އޮތް ތިން ދުވަހު ބޯކޮށް ވާރޭވެހޭނެއެވެ.