މެލޭޝިޔާގެ ކުރީގެ ބޮޑުވަޒީރު ނަޖީބް ރައްޒާޤްގެ މައްޗަށް އިއްވާފައިވާ ޖަލު ހުކުމުގެ ބާކީ އޮތް މުއްދަތު ގޭބަންދަށް ބަދަލު ކުރަން އޭނާ ކުރެއްވި މަސައްކަތްތައް ނާކާމިޔާބުވެއްޖެއެވެ. ދަޢުލަތުގެ ފައިސާއަށް ޚިޔާނާތްތެރިވުމާއި މަނީ ލޯންޑްރިންގ ކުށް ސާބިތުވެ ނަޖީބްގެ މައްޗަށް އިއްވާފައި ވަނީ 12 އަހަރު ދުވަހުގެ ޖަލު ހުކުމެކެވެ. ނަމަވެސް, މެލޭޝިޔާގެ ކުށްތަކަށް މަޢާފު ދިނުމާ ބެހޭ ޕާޑަންސް ބޯޑުން ފެބުރުވަރީ މަހުގެ ތެރޭގައި އެ މުއްދަތުން ބަޔެއް މަޢާފުކޮށްދީ, އޭނާގެ ޖަލު ހުކުމުގެ މުއްދަތު 6 އަހަރަށް ކުރު ކޮށްދީފައިވެއެވެ.
ނަޖީބްގެ މައްޗަށް އިއްވާފައިވާ ޖަލު ހުކުމް ތަންފީޒު ކުރަން ފަށާފައި ވަނީ 2022ވަނަ އަހަރުގެ އޮގަސްޓު މަހުއެވެ. އޭޕްރިލް 1ވަނަ ދުވަހު ނަޖީބްގެ ފަރާތުން ޖުޑީޝަލް ރިވިއު އެޕްލިކޭޝަނެއް ކޯޓަށް ހުށަހަޅާފައިވެއެވެ. އޭގައި ބުނެފައި ވަނީ, އޭނާގެ މައްޗަށް އިއްވާފައިވާ ޖަލު ހުކުމުން ބަޔެއް މަޢާފު ކޮށްދޭން މެލޭޝިޔާގެ ކުރީގެ ރަސްގެފާނު ސުލްޠާން ޢަބްދުالله އަޙްމަދު ޝާހު ނިންމަވާފައިވާ ނިންމެވުމާ ގުޅޭ ޝާހީ ފަތްކޮޅަށް ޖަވާބު ދޭން, ނުވަތަ އެ ފަތްކޮޅުގެ ސައްޙަކަން ކަށަވަރު ކޮށްދޭން ސަރުކާރަށް ބާރުއަޅައި ދިނުމަށް އެދޭ ކަމުގައެވެ. އަދި, އޭނާގެ މައްޗަށް އިއްވާފައިވާ ޖަލު ހުކުމް ގޭބަންދަށް ބަދަލު ކުރުމުގެ ފުރުޞަތު އެ ފަތްކޮޅާ އެކު އޭނާއަށް ލިބިދީފައިވާ ކަމުގައެވެ.
ނަމަވެސް އެ ކަމާ ގުޅޭ ގޮތުން ކުއަލަ ލުމްޕޫރުގެ ހައި ކޯޓުން ނެރުނު ހުކުމުގައި ބުނެފައި ވަނީ, ނަޖީބްގެ މައްޗަށް އިއްވާފައިވާ ޖަލު ހުކުމް މުރާޖަޢާ ކުރުމަށް ބާރުދޭ އެއްވެސް ހުއްޖަތެއް ނެތް ކަމުގައެވެ. ހުކުމުގައި ފަނޑިޔާރު އަމަރްޖީތު ސިންހ ވިދާޅުވީ, މެލޭޝިޔާގެ ބޮޑުވަޒީރުގެ ނައިބު އަޙްމަދު ޒާހިދު ޙަމީދީއާއި ނަޖީބުގެ ޕާޓީގެ އިސް އޮފިޝަލެއް ހުށަހަޅުއްވާފައިވާ ލިޔެކިޔުންތަކުން ނަޖީބް ވަކާލާތު ކުރައްވާ ފަދަ އެއްވެސް ފަތްކޮޅެއް ކުރީގެ ރަސްގެފާނު ނެރުއްވާފައިވާ ކަން ސާބިތު ނުވާ ކަމުގައެވެ. އަދި, ސަރުކާރުން އެ ކަމަށް ޖަވާބުދާރީ ވާން ޖެހޭ ކަމަށް ގަބޫލު ނުކުރައްވާ ކަމުގައި ވެސް ފަނޑިޔާރު ވިދާޅުވިއެވެ.
ނަޖީބްގެ ޤާނޫނީ ވަކީލު މުޙައްމަދު ޝާފިޢީ ޢަބްދުالله ވިދާޅުވީ, ހައި ކޯޓުގެ ހުކުމް އިސްތިޢުނާފު ކުރުމަށް ތައްޔާރުވަމުންދާ ކަމުގައެވެ. "މި ކަމަށް ސަރުކާރުން ޖަވާބުދާރީ ވާން ޖެހޭނެ،" ޢަބްދުالله ވިދާާޅުވިއެވެ.
ނަޖީބާ ދެކޮޅަށް 12 އަހަރު ދުވަހުގެ ޖަލު ހުކުމެއް އިއްވާފައި ވަނީ މެލޭޝިޔާގެ ދައުލަތުގެ ފަންޑެއް ކަމުގައިވާ ވަން-މެލޭޝިޔާ ޑިވެލޮޕްމަންޓް ބަރްހާދް (ވަން-އެމްޑީބީ)ގެ ފައިސާގެ ތެރެއިން 4.5 ބިލިޔަން އެމެރިކާ ޑޮލަރަށް ޚިޔާނާތްތެރިވުމާއި މަނީ ލޯންޑްރިންގގެ ދަޢުވާގައެވެ. އެ ފައިސާގެ ތެރެއިން 1 ބިލިޔަން ޑޮލަރު އޭނާގެ އަމިއްލަ އެކައުންޓަށް ވެސް ޖަމާކޮށްފައިވެއެވެ.
އެ ފަންޑަކީ ނަޖީބުގެ ސަރުކާރުން 2009 ވަނަ އަހަރު އުފައްދާފައިވާ ފަންޑެކެވެ. ވެރިކަމުގައި ހުންނެވި އިރު ނަޖީބު ވަނީ، ވަން-އެމްޑީބީއާ ގުޅޭ ކޮރަޕްޝަންގެ ތުހުމަތުތައް ތަހުޤީޤު ކުރުމަށް ވެސް ހުރަސް އަޅުއްވާފައެވެ. އެއީ، މެލޭޝިޔާގެ ބޮޑުވަޒީރު ކަމުގެ މަޤާމު އޭނާ ފުރުއްވި ފުރަތަމަ އަހަރެވެ. ވަން-އެމްޑީބީން ގެއްލިފައިވާ ފައިސާއަކީ ސަޢޫދީ ޢަރަބިއްޔާގެ ޝާހީ ޢާއިލާއިން ހަދިޔާކޮށްފައިވާ ފައިސާއެއް ކަމަށް ބެލެވެއެވެ. ދަޢުލަތުގެ ފައިސާއަށް ޚިޔާނާތްތެރިވެފައިވާ ކަމުގެ ތުހުމަތުތަކަށް ނަޖީބް އިންކާރުކުރައްވައެވެ. އަދި, ވަން-އެމްޑީބީގެ ފައިސާއަށް ޚިޔާނާތްތެރިވެފައި ވަނީ އެ ކުންފުނީގެ އިސް މުވައްޒަފުންތަކެއް ކަމަށް އޭނާ ތުހުމަތު ކުރައްވައެވެ.