އެމެރިކާގެ ރިޔާސީ އިންތިޚާބަށް ތައްޔާރުވުމުގެ ގޮތުން ބޭއްވި ރިޔާސީ ބަހުސްގައި ދެއްކެވި ހުށަހެޅުމަށް ކުރިމަތިވި ފާޑުކިޔުންތަކަށް ފަހު ނަގާފައިވާ ޚިޔާލު ހޯދުމުގެ ވޯޓަކުން ރައީސް ޖޯ ބައިޑަނަށް އޮތް ތާޢީދު އިތުރުވެފައިވާ ކަން ހާމަވެއްޖެއެވެ. އެ ގޮތުން, ރޮއިޓަރސް އަދި އިޕްސޮސް ގުޅިގެން ނަގާފައިވާ ޚިޔާލު ހޯދުމުގެ ވޯޓުގައި ބައިޑަން ވަނީ ރިޔާސީ އިންތިޚާބުގައި އޭނާއާ ދެކޮޅަށް ނިކުންނަވާފައިވާ ކުރީގެ ރައީސް ޑޮނަލްޑް ޓްރަމްޕާ އެއްހަމަ ކުރައްވާފައެވެ.
އޭގެ ކުރިން ޖޫން 12ގައި ނަގާފައިވާ ޚިޔާލު ހޯދުމުގެ ވޯޓުގައި ޓްރަމްޕް ވަނީ ބައިޑަންގެ މައްޗަށް 2 އިންސައްތައިގެ ކުރިއެރުމެއް ހޯއްދަވާފައެވެ. އެ ފަހަރުގެ ޚިޔާލު ހޯދުމުގެ ވޯޓުގައި ބައިވެރިވި މީހުންގެ ތެރެއިން 41 އިންސައްތަ މީހުން ވަނީ ޓްރަމްޕަށް ތާޢީދު ކުރާ ކަން ހާމަކޮށްފައެވެ. ބައިޑަނަށް ތާޢީދު ކުރާ ކަމަށް ބުނެފައި ވަނީ 39 އިންސައްތަ މީހުންނެވެ.
ނަމަވެސް, ހުސްވި ހަފުތާގެ ބުރާސްފަތި ދުވަހު ބޭއްވި ބަހުސަށް ފަހު ނެގި ޚިޔާލު ހޯދުމުގެ ވޯޓުގެ ނަތީޖާއަށް ބަލައިލާއިރު, ބައިޑަން ވަނީ ޓްރަމްޕާ އެއްހަމަ ކުރައްވާފައެވެ. އެ ގޮތުން, ވޯޓުގައި ބައިވެރިވި މީހުންގެ ތެރެއިން 40 އިންސައްތަ މީހުން ޓްރަމްޕަށް ތާޢީދު ކުރާ ކަން ހާމަ ކޮށްފައިވާއިރު, 40 އިންސައްތަ މީހުން ވަނީ ބައިޑަނަށް ވޯޓު ދޭނެ ކަން ހާމަކޮށްފައެވެ. މި ނަތީޖާއިން ހާމަވެގެން ދިޔައީ, އަންނަ ނޮވެންބަރު މަހު ބާއްވާ އެމެރިކާގެ ރިޔާސީ އިންތިޚާބުގެ ވާދަވެރިކަން އޮތް މިންވަރު ކަމުގައި މަސްރަޙު ދިރާސާ ކުރާ ފަރާތްތަކުން ބުންޏެވެ.
ބަހުސްގައި ބައިޑަން ފެނިގެން ދިޔައީ ވަރަށް "ލޮނުމަޑު," އަދި އެއްވެސް "ފޯރިއެއް ނެތް," "ނެގިމަޑުވެފައި" ހުރި ކެނޑިޑޭޓެއްގެ ގޮތުގައެވެ. އަދި, ބަހުސާ ގުޅިގެން ގިނަ ބަޔެއްގެ ފާޑު ކިޔުންތައް ބައިޑަނަށް އަމާޒުވެގެން ދިޔައެވެ. ރޮއިޓަރސް އަދި އޮޕްސޮސުން އެންމެ ފަހުން ނެގި ޚިޔާލު ހޯދުމުގެ ވޯޓުގެ ނަތީޖާއިން ފެންނަ ގޮތުގައި, ބައިޑަންގެ ޑިމޮކްރެޓިކް ޕާޓީގެ ގިނަ ޢަދަދެއްގެ މެންބަރުންގެ ތާޢީދު އޭނާއަށް ވަނީ ގެއްލިފައެވެ.
އެ ގޮތުން, ވޯޓުގައި ބައިވެރިވި ޑިމޮކްރެޓިކް ޕާޓީގެ ކޮންމެ ތިން މެންބަރެއްގެ ތެރެއިން އެކަކު, އޭނާގެ ކެނޑިޑެސީއާ ދެކޮޅެވެ. އެ މީހުން އެދެނީ ރިޔާސީ ރޭހުން ބައިޑަން ވަކިވެވަޑައިގަންނަވައި, އޭނާއަށްވުރެ ޒުވާން, އަދި ވާދަވެރި އެހެން ކެނޑިޑޭޓަކަށް ފުރުޞަދު ދިނުމަށެވެ. ނަމަވެސް, ރިޔާސީ ރޭހުން ވަކިވެވަޑައިގެންނެވުމުގެ ވިސްނުންފުޅު ނުގެންގުޅުއްވާ ކަމުގައި ބައިޑަން ވަނީ ވިދާޅުވެފައެވެ.
ރޮއިޓަރސް އަދި އިޕްސޮސުން ނަގާފައިވާ ޚިޔާލު ހޯދުމުގެ ވޯޓުގައި, ރިޔާސީ އިންތިޚާބުގައި ވޯޓުލުމުގެ ޙައްޤު ލިބިގެންވާ 1,070 މީހަކާ ސުވާލު ކޮށްފައިވެއެވެ. އޭގެ ތެރެއިން ކޮންމެ ފަސް މީހަކުން އެކަކު ބުނީ, ނޮވެންބަރު މަހުގެ 5ވަނަ ދުވަހު ބާއްވާ އިންތިޚާބުގައި ވޯޓުލާނެ ވަކި ކެނޑިޑޭޓެއް އަދި ނިންމާފައި ނުވާ ކަމުގައެވެ. ނުވަތަ, ބައިޑަނާއި ޓްރަމްޕް ނޫން އެހެން ކެނޑިޑޭޓަކަށް ވޯޓުލާން ބޭނުންވާ ކަމުގައެވެ. ނުވަތަ, އިންތިޚާބުގައި ބައިވެރިވާން ބޭނުން ނުވާ ކަމުގައެވެ.
81 އަހަރުގެ ބައިޑަނަށް މި ވަގުތު ކުރިމަތިވެފައި އޮތް އެންމެ ބޮޑު އެއް ގޮންޖެހުމަކީ އޭނާގެ އުމުރު ދޮށިވުމެވެ. ޚިޔާލު ހޯދުމުގެ ވޯޓުގައި ބައިވެރިވި ޑިމޮކްރެޓިކް ޕާޓީގެ މެންބަރުންގެ ތެރެއިން 83 އިންސައްތަ, އަދި އިދިކޮޅު ރިޕަބްލިކަން ޕާޓީގެ 97 އިންސައްތަ މީހުން ގަބޫލު ކުރާ ގޮތުގައި, ބަހުސްގައި ބައިޑަނަށް ނާކާމިޔާބީއާ ކުރިމަތިލައްވަން ޖެހިވަޑައިގަތީ އޭނާ އުމުރު ދޮށިވެ, ލޯބޯކޮށިވުމުގެ ސަބަބުންނެވެ. ނަމަވެސް, ޓްރަމްޕަކީ ވެސް 78 އަހަރުގެ ބޭފުޅެއް ކަން ފާހަގަ ކޮށްލަން ޖެހެއެވެ.