ޔޫކްރެއިންގެ އިރުމަތީގައި އޮންނަ ދޮންޏެސްކުގެ ރަށަކަށް ރަޝިޔާގެ ފައުޖުތަކުން އަތްގަދަ ކޮށްފިއެވެ. އެ ކަން ކަށަވަރު ކޮށްދެމުން ޔޫކްރެއިނުން ބުނީ, ދޮންޏެސްކުގެ ރަށެއް ކަމުގައިވާ ޗަސިވް ޔަރްގެ ދިފާޢުގައި ހަނގުރާމަ ކުރަމުން ދިޔަ އެ ޤައުމުގެ ސިފައިން އެ ރަށް ދޫކޮށް ފައިބާފައިވާ ކަމުގައެވެ. އަދި, ރަޝިޔާއިން އެ ރަށަށް އަތްގަދަ ކޮށްފައިވާ ކަމުގައެވެ. ދޮންޏެސްކަކީ ދޮންބާސްގެ ދެ ސަރަޙައްދުގެ ތެރެއިން އެއް ސަރަޙައްދެވެ.
ޗަސިވް ޔަރަކީ ބިިން އުސް ސަރަޙައްދެކެވެ. އެ ރަށަށް ރަޝިޔާގެ ފައުޖުތަކުން އަތްގަދަ ކުރުމާ އެކު, އަސްކަރީ ގޮތުން ކުރިއެރުންތަކެއް ލިބިގެން ގޮސްފައިވާ ކަމަށް މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ. އެއާ އެކު, ޗަސިވް ޔަރްގެ ހުޅަނގުން އޮތް ކްރަމަތޮރްސްކާއި ސްލޮވިއަންސްކް ދިފާޢު ކުރަމުންދާ ޔޫކްރެއިންގެ ފައުޖުތަކަށް ޙަމަލާތައް އަމާޒު ކުރަން ރަޝިޔާގެ ސިފައިންނަަށް ފަހި ވެގެންދާނެއެވެ.
ޗަސިވް ޔަރްގެ އިތުރުން އެ ސަރަޙައްދުގައި އޮންނަ ނޮވީ ޑިސްޓްރިކްޓަށް ވެސް އަތްގަދަ ކޮށްފައިވާނެ ކަމުގައި ރަޝިޔާގެ ދިފާޢީ ވުޒާރާއިން ބުންޏެވެ. އެއީ, ސިވަރްސްކީ ދޮނައިޓްސް-ދޮންބާސް ޗެނަލްގެ އިރުމަތިން އޮންނަ ސަރަޙައްދެކެވެ. ޔޫކްރެއިންގެ އަސްކަރިއްޔާގެ ތަރުޖަމާނު ނަޒަރް ވޮލޯޝިން ވަނީ އެ ކަން ކަށަވަރު ކޮށްދެއްވާފައެވެ. އޭނާ ވިދާޅުވީ, ޗަސިވް ޔަރަށް ރަޝިޔާ ސިފައިން އެރުމުން, ނޮވީ ޑިސްޓްރިކްޓް ދިފާޢު ކުރަން މަސައްކަތް ކުރުމުގެ ބޭނުންތެރިކަން ކެނޑިފައިވާ ކަމުގައެވެ.
ރަޝިޔާ-ޔޫކްރެއިން ހަނގުރާމައިގައި ރަޝިޔާގެ މިހާރުގެ އެންމެ ބޮޑު އަމާޒަކީ ޔޫކްރެއިންގެ ދޮންޏެސްކުގެ ވީހާ ވެސް ބޮޑު ސަރަޙައްދެއް ރަޝިޔާގެ ބާރުގެ ދަށަށް ގެންދިޔުމެވެ. މީގެ އިތުރުން, ޔޫކްރެއިންގެ ދެވަނަ އެންމެ އާބާދީ ބޮޑު ރަށް, ހަރްކިވަށް ދެމުންދާ ޙަމަލާތައް ވެސް ރަޝިޔާއިން ވަނީ އިތުރުކޮށް, ވަރުގަދަ ކޮށްފައެވެ. ނަމަވެސް, ހަރްކިވް ދިފާޢު ކުރުމަށް ޔޫކްރެއިންގެ ފައުޖުތަކަށް ބޮޑެތި ގޮންޖެހުންތަކެއް ހުރި ކަން އެ ޤައުމުން ވެސް ގަބޫލު ކުރެއެވެ.
އެ ކަމާ ގުޅޭ ގޮތުން ވާހަކަފުޅު ދައްކަވަމުން ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވީ, އެކަށީގެންވާ މިންވަރަށް ހަތިޔާރާއި އަސްކަރީ ސާމާނު ނެތި 14 ވަރަކަށް ބްރިގޭޑުގެ ސިފައިން ހަނގުރާމައިގެ މައިދާނުގައި ހަރަކާތްތެރިވަމުންދާ ކަމުގައެވެ. މި އަހަރުގެ ތެރޭގައި ޔޫކްރެއިންގެ ފައުޖުތަކަށް ބޮޑެތި ގޮންޖެހުންތަކެއް ކުރިމަތިވެފައިވާ ކަން އޭނާ ގަބޫލު ކުރައްވައެވެ. ނަމަަވެސް, ހުޅަނގުން ވަޢުދުވެފައިވާ ހަތިޔާރު ލިބެން ފެށުމުން ޔޫކްރެއިންގެ ފައުޖުގެ ދިފާޢީ އޮޕަރޭޝަން އިތުރަށް ހަރުދަނާ ކުރާނެ ކަމުގައި އޭނާ ވިދާޅުވިއެވެ.
"ހުޅަނގުން ވަޢުދުވެފައިވާ [ހަތިޔާރުގެ] ޝިޕްމަންޓުތައް ލިބެމުން ދަނީ ވަރަށް މަދުމަދުން،" ބްލޫމްބަރގަށް ދެއްވި ބަސްދީގަތުމެއްގައި ޒެލެންސްކީ ވިދާޅުވިއެވެ.
ރަޝިޔާ-ޔޫކްރެއިން ހަނގުރާމަ ފެށީ 2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހުއެވެ. މި ހަނގުރާމައިގެ ތެރެއިން ރަޝިޔާއިން އަތްގަދަ ކޮށްފައިވާ ޔޫކްރެއިންގެ ސަރަޙައްދުތަކުގެ ތެރޭގައި ދޮންބާސްގައި އޮންނަ ދޮންޏެސްކާއި ލުހާންސްކްގެ އިތުރުން ދެކުނުގައި އޮންނަ ޒަޕޮރީޜިޔާގެ ބައެއް ސަރަޙައްދުތައް ހިމެނެއެވެ. މީގެ އިތުރުން, ޔޫކްރެއިންގެ އެންމެ ދެކުނުން އޮންނަ ކްރައިމިޔާއަކީ ރަޝިޔާއިން 2014ވަނަ އަހަރު އަތްގަދަ ކޮށްފައިވާ ސަރަޙައްދެކެވެ.