އެމްޑީޕީއަށް ވެރިކަން ލިބުމުން ބަހާއި ޢަމަލު ދިމާނުވި: ރައީސް ޔާމީން

ވެރިކަމަށް އައުމުގެ ކުރިން ރައްޔިތުންގެ ޙައްޤުތައް ހިމާޔަތްކުރަން އެންމެ ބޮޑަށް ވަކާލާތުކުރި އެއް ޕާޓީއަކީ ދިވެހި ރައްޔިތުންގެ ޑިމޮކްރެޓިކް ޕާޓީ، އެމްޑީޕީ ކަމަށާއި އެހެންނަމަވެސް އެ ޕާޓީއަށް ވެރިކަން ލިބުމުން ވާކާލާތު ކުރަމުންދިޔަ ޙައްޤުތައް ރައްޔިތުންނަށް ކަށަވަރުވެގެންދިޔަތަން ނުފެނުނުކަމަށް ކުރީގެ ރައީސް، ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.

ރައީސް ޔާމީން މިހެން ވިދާޅުވީ ރޭ ޕީޕަލްސް ނެޝަނަލް ފްރޮންޓް، ޕީއެންއެފުން ބޭއްވި ހަރުގެ ޖަލްސާއެއްގައި ވާހަކަދައްކަވަމުންނެވެ.

މި ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ އެންމެ ވަރުގަދަ ޕާޓީކަމަށްބުނެ، ރައްޔިތުންގެ ޙައްޤުތަކާއި އެއްވެ އުޅުމުގެ މިނިވަންކަމާއި ޑިމޮކްރަސީގެ ހުރިހާ ޙައްޤުތަކަށް އެންމެ ވަރުގަދައަށް ވަކާލާތުކުރާ ޕާޓީއަކީ އެމްޑީޕީ ކަމަށެވެ. އެހެންނަމަވެސް އެޕާޓީއަށް ރާއްޖޭގެ ވެރިކަން ލިބުނު ކޮންމެ ފަހަރަކުވެސް، ކުރިން ދެއްކި ވާހަކަތަކުގެ މަތިން ހަނދާންނެތިފައިވާ ކަމަށް ރައީސް ޔާމީން ވިދާޅުވިއެވެ. އެގޮތުން އެމްޑީޕީގެ ވެރިކަންތަކުގައި ރައްޔިތުންގެ ޙައްޤުތައް އެންމެ ފުރިހަމައަށް ކަށަވަރުވި މަންޒަރު ނުފެނުކަމަށް ރައީސް ޔާމީން ވަނީ ވިދާޅުވެފައެވެ.

"ޑިމޮކްރެޓިކް ހުރިހާ ޙައްޤުތަކެއްގެ ވާހަކަދައްކަނީ އެމްޑީޕީން. އެކަމަކު ވެރިކަން ލިބުނީމަ ބަހާއި ޢަމަލާ ސީދާ ނުވޭ. މިހާރު އެޕާޓީ އޮތީ އުރަތްޕެއްނެތް ފޯސްއެއްގެ ގޮތުގައި." ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ މިފަހަކަށްއައިސް އެމްޑީޕީގެ ސިޔާސީ ހަރަކާތްތައްވެސް މަދުވެފައިވާ ކަމަށެވެ.

ޕީއެންއެފަކީ މިހާރު ވެރިކަންކުރާ ޕްރޮގްރެސިވް ކޮންގްރެސް ކޯލިޝަނުން ރައީސް ޔާމީން ވަކިވެވަޑައިގެން އެމަނިކުފާނު އިސްވެ އުފެއްދެވި ސިޔާސީ ޕާޓީއެކެވެ. ޕީއެންއެފުން ސަރުކާރުގެ ސިޔާސަތުތަކަށާއި ސަރުކާރާ އިދިކޮޅު ޕާޓީތަކަށް ފާޑުކިޔުމަށް ހަރުގެ ޖަލްސާތައް ސިލްސިލާ ގޮތެއްގައި މިފަހަކަށް އައިސް ބާއްވައެވެ.