އިނގިރޭސިވިލާތުގެ ޢާންމު އިންތިޚާބުގައި އިދިކޮޅު ލޭބަރ ޕާޓީން ބޮޑު އަޣުލަބިއްޔަތެއް ކާމިޔާބު ކޮށްފިއެވެ. އެއާއެކު، ވެރިކަން ކުރާ ކޮންޒަރވެޓިވް ޕާޓީގެ ވެރިކަން 14 އަހަރަށް ފަހު ވަނީ ނިމުމަކަށް އައިސްފައެވެ. އަދި، ބޮޑުވަޒީރު ކަމުގެ މަޤާމާ ދެން ހަވާލުވެ ވަޑައިގަންނަވާނީ ލޭބަރ ޕާޓީގެ އިސްވެރިޔާ ކީރް ސްޓާމަރއެވެ.
އެއީ 650 މެންބަރުން ހިމެނޭ ޤާނޫނު ހަދާ މަޖިލީހަށް މެންބަރުން އިންތިޚާބު ކުރުމަށް ބޭއްވި ޢާންމު އިންތިޚާބެއްގައި ބޮޑުވަޒީރު ރިޝީ ސުނާކްގެ ކޮންޒަރވެޓުންނަށް މިހާތަނަށް ކުރިމަތިލާން ޖެހުނު އެންމެ ބޮޑު ނާކާމިޔާބީއެވެ. ސަބަބެއް ކަމަށް ބެލެވެނީ، ކޮންޒަރވެޓުންގެ 14 އަހަރުގެ ވެރިކަމުގައި ތަކެއްޗާއި ދިރިއުޅުމުގެ ޚަރަދުތައް އިންތިހާއަށް އުފުލުމާއި ޚިދުމަތްތަކުގެ ފެންވަރު ވެއްޓުމާއި ޕާޓީގެ ތެރޭގައި ބޮޑެތި ދެބަސްވުންތަކާއި ޚިޔާލު ތަފާތުވުންތައް އުފެދުމެވެ.
''އެ ކަން ކުރެވިއްޖެ. މިއަދަކީ ބަދަލުގެ ފެށުން. މި ހަމަނުޖެހުމަށް ނިމުމެއް ގެންނާނަމޭ އަޅުގަނޑުމެން ބުނިން، އެ ކަން ކުރާނަން، މިއަދު އައު ޞަފުހާއެއް ފެށުނީ. މިއަދު އަޅުގަނޑުމެން މި ފަށަނީ ހެޔޮ ބަދަލުތަކެއް ގެނައުމުގެ މަސައްކަތް، ޤައުމު އަލުން އާރާސްތު ކުރުމުގެ މަސައްކަތް،“ އިންތިޚާބުގައި ލޭބަރއަށް ލިބުނު ކާމިޔާބީ ފާހަގަ ކުރައްވައި ސްޓާމަރ ވިދާޅުވިއެވެ.
މިހާތަނަށް އިޢުލާނު ކޮށްފައިވާ ނަތީޖާއިން ފެންނަ ގޮތުގައި ލޭބަރއިން ވަނީ މަޖިލީހުގެ 410އަކަށް ވުރެ ގިނަ ދާއިރާއިން ކާމިޔާބީ ހޯދާފައެވެ. ކޮންޒަރވެޓުންނަށް ލިބުނީ 112 ވަރަކަށް ގޮނޑިއެވެ. ލިބަރަލް ޑިމޮކްރެޓުން ވެސް ވަނީ 70އެއްހާ ދާއިރާއިން ކާމިޔާބީ ހޯދާފައެވެ.
މަޖިލީހުގައި ކޮންޒަރވެޓުން ތަމްސީލު ކުރައްވަމުން ގެންދެވި އިސް ވަޒީރުން ހިމެނޭ ގޮތަށް، ޕާޓީގެ އިސް 250އެއްހާ މެންބަރުންނަށް ނާކާމިޔާބީއާ ކުރިމަތިލައްވަން ޖެހިވަޑައިގެންނެވިއެވެ. އޭގެ ތެރޭގައި ކުރީގެ ބޮޑުޗަޒީރު ލިޒް ޓްރަސް ވެސް ހިމެނި ވަޑައިގަންނަވައެވެ. ލޭބަރއަށް ކާމިޔާބީ ލިބުމާ އެކު ސުނާކް ވަނީ ބަލި ގަބޫލު ކުރައްވައި ސްޓާމަރއަށް މަރުޙަބާ ދަންނަވާފައެވެ.
”ވެރިކަން ބަދަލުވުމުގެ ކަންކަން ކުރިއަށް ދާނީ އޮމާން ކަމާއި ސުލްޙަވެރި ކަމާ އެކު. މި ލިބުނު ނާކާބިޔާބީން ދަސްކުރަން ޖެހޭ ގިނަ ފިލާވަޅުތަކެއް ލިބިއްޖެ ކަން ގަބޫލުކޮށް، އެ ކަމުގެ ޒިންމާ ފުރިހަމައަށް އުފުލަން. އަދި، ގޮނޑި ގެއްލިގެން ދިޔަ ބުރަ މަސައްކަތްތަކެއް ކުރެއްވި ކޮންޒަރވެޓުންގެ މެންބަރުންގެ ކިބައިން މަޢާފަށް އެދެން،“ ސުނާކް ވިދާޅުވިއެވެ.
އިންތިޚާބުގައި ލޭބަރއަށް ކާމިޔާބީ ލިބުނު ނަމަވެސް ކުރިމަތީގައި އޮތީ ބުރަ އަދި ބޮޑު މަސައްކަތްތަކެކެވެ. ޓެކުހުގެ ބުރަ އޮތީ ދެވަނަ ބޮޑު ހަނގުރާމައަށް ފަހު އުފުލިފައިވާ އެންމެ މައްޗަށް އުފުލިފައެވެ. ދަރަންޏާއި އިޤްތިޞާދީ އުފެއްދުންތެރިކަން ވަނީ ގާތްގަނޑަކަށް އެއްހަމަވެފައެވެ. ޚަރަދު ބޮޑުވެ ދިރިއުޅުމުގެ ފެންވަރު ވަނީ ދަށްވެފައެވެ. އާންމު ޚިދުމަތްތަކުގެ ފެންވަރު ވެއްޓިފައިވާއިރު، އެންމެ ބޮޑަށް ފެންވަރު ދަށްވެފައިވާ ދާއިރާތަކުގެ ތެރޭގައި ޞިއްޙީ ޚިދުމަތްތަކުގެ ދާއިރާ ހިމެނެއެވެ.
”ކުރިއަށް އޮތީ ފަސޭހަ ދުވަސްތަކެކޭ ދެންނެވޭކަށް ނެތް. ސުވިޗަކަށް އޮއްބައިލާހާ ފަށެހައިން ޤައުމަށް ހެޔޮ ބަދަލުތަކެއް ނުގެނެވޭނެ. ނަމަވެސް، އެ ކަން ހާސިލު ކުރަން ބުރަ މަސައްކަތްތަކެއް ކުރަން އަޅުގަނޑު ވަޢުދުވަން. ހިތްވަރާއި، ކެތްތެރިކަމާ އެކު ބުރަ މަސައްކަތްތަކެއް ކުރާނެ ކަމުގެ ޔަގީން ކަން އަރުވަން،“ ސްޓާމަރ ވިދާޅުވިއެވެ.