ޕެނަލްޓީ ގައި ކުރި ހޯދައިގެން ކްއާޓާ ފައިނަލަށް ދަތުރުކުރި ޕޯޗްގަލް ޕެނަލްޓީގައި ބަލިކޮށް، ޔޫރޯ ފުޓްބޯޅަ މުބާރާތުގެ ސެމީފައިނަލުން ފްރާންސް ޖާގަ ހޯދައިފި އެވެ.
ފްރާންސް ސެމީފައިނަލުން ޖާގަ ހޯދީ ކްއާޓާ ފައިނަލް މެޗުގެ 90 މިނިޓާއި، ނަތީޖާ ނެރުމަށް ކުޅުނު 15 މިނިޓްގެ ދެހާފްގައި ވެސް ދެޓީމް ކުރެ ޓީމަކަށް ލަނޑެއް ނުޖެހި މެޗު އެއްވަރުވުމުން ނަތީޖާ ނެރުމަށް ޖެހި ޕެނަލްޓީގައި ކުރި ހޯދައިގެންނެވެ. ޕެނަލްޓީގައި ފްރާންސް ކުރިހޯދީ 5-3 ނެވެ. ފްރާންސުން ޖެހި 5 ޕެނަލްޓީ ވެސް ކާމިޔާބުކުރި އެވެ. ޕޯޗްގަލް އިން ޖެހި ހަތަރު ޕެނަލްޓީގެ ތެރެއިން ނާކާމިޔާބުވީ ޔާއޯ ފެލިކްސް ޖެހި ޕެނަލްޓީ އެވެ. އޭނާ ޖެހި ޕޯޗްގަލްގެ ތިންވަނަ ޕެނަލްޓީ އަމާޒުވީ އަރިމަތީ ދަނޑި އަށެވެ.
ފްރާންސުން ޕެނަލްޓީ ޖެހީ ޑެމްބެލޭ، ފޮފާނާ، ކޫންޑޭ، ބާކޯލާ އަދި ތިއޯ ހެނާންޑޭޒް އެވެ. ޕޯޗްގަލް އިން ޕެނަލްޓީ ކާމިޔާބުކުރީ ރޮނަލްޑޯ، ބާނާޑޯ ސިލްވާ އަދި ނޫނޯ މެންޑޭޒް އެވެ. ޕޯޗްގަލް ކްއާޓާ ފައިނަލަށް ގެންދަން ކީޕަރު ޑިއޯގޯ ކޮސްޓާ ތިން ޕެނަލްޓީ މަތަކުރި ނަމަވެސް ފްރާންސްގެ ޕެނަލްޓީ މަތަކުރުމުގައި ރަނގަޅު ފަޅިއަށް ޑައިވްވެސް ނުކުރެވުނެވެ.
ޕެނަލްޓީގައި ބަލިވި ނަމަވެސް މެޗުގައި ލަނޑު ޖަހަން ގިނަ ފުރުޞަތުތައް ތަނަވަސްކުރީވެސް ބޯޅަ ގިނައިރު ހިފަހައްޓައިގެން ކުޅުނީވެސް ޕޯޗްގަލް އެވެ. މުޅި މެޗުގައިވެސް ނަތީޖާ ނެރެން އެންމެ ރަނގަޅު ފުރުޞަތެއް ލިބުނީ ކެޕްޓަން ރޮނަލްޑޯ އަށެވެ. ނަތީޖާ ނެރުމަށް ކުޅުނު އިތުރު ވަގުތުގެ ދެހާފްގެ ތެރެއިން ފުރަތަމަ ހާފް ފަށައިގެން ދެވަނަ މިނިޓްގައި ގޯލް އޭރިޔާ ތެރޭގައި ހުހަށް ހުރެ ފޮނުވާލެވުނީ ހުރަސް ދަނޑި މަތިން ބޭރަށެވެ. އޭގެ ފަހުން ޔައޯ ފެލިކްސް އަރިމަތިން ބޮލުން ފޮނުވާލި ބޯޅަ އަމާޒުވީ އަރިމަތީ ދާގަނޑަށެވެ. ފަހު މިނިޓްގައި ބާނާޑޯ ސިލްވާއަށް ލިބުނު ފުރުޞަތުގައި ހުހަށްހުރެ ލަސްކޮށް, ބޯޅަ ނޫނޯ މެންޑޭޒް އަށް ދިނުމުން ފޮނުވާލި ނަމަވެސް ކީޕަރު ދިފާއު ކުރިއެވެ.
މެޗުގެ 90 މިނިޓްގެ ތެރޭގަައިވެސް އެންމެ ރަނގަޅު ފުރުޞަތު ލިބުނީ ޕޯޗްގަލް އަށެވެ. މެޗު ފަށައިގެން 15 ވަނަ މިނިޓްގައި ޑީއޭރިޔާ ބޭރުން ބުރޫނޯ ފެނާންޑޭޒް ފޮނުވާލި ބޯޅަ ކޯނަރަކަށް ބޭރުވީ ފްރާންސް ޑިފެންޑަރެއް ގައިގަ ޖެހިފަ އެވެ. އޭގެ ތިން މިނިޓް ފަހުން ފްރާންސުން ރަނގަޅު ބޯޅައެއް ފޮނުވާލިއެވެ. އެކަމަކު އޭރިޔާ ބޭރުން ކަމަވިންގާ ފޮނުވާލި ބާރުބޯޅަ ކީޕަރު ޑިއޯގޯ ކޮސްޓާ އަތުން ޖައްސާ ކުޅުމުގެ ތެރެއަށް ފޮނުވާލި އެވެ. 21 ވަނަ މިނިޓްގައި އޭރިޔާ ތެރެއަށް ވަދެ އެމްބާޕޭ ތިރިން ނަގައިދިން ހުރަސް ވެސް ކީޕަރު ވަނީ އަތުން ޖައްސާ ކުޅުމުގެ ތެރެއަށް ފޮނުވާލާފައެވެ.
ދެވަނަ ހާފް ފަށައިގެން މެޗުގެ 58 ވަނަ މިނިޓްގައި ރަފެއަލް ލެއޯ އަރިމަތިން ބޯޅައާއެކު ގޯލް އޭރިޔާ ރޮނގާ ހަމައަށް ވަންފަހުން ކަމަވިންގާ ޓެކްލޮކޮށް ކޯނަރަށް ބޯޅަ ބޭރުކޮށްލިއެވެ. އޭގެ ދެ މިނިޓް ފަހުން ކަންސޭލޯ ގޯލް އޭރިޔާ ކަނާ ދިމާލުގައި ހުހަށްހުރި, ބުރޫނޯ ފެނާންޑޭޒް އަށް ދިނުމުން ތިރިން ގޯލްގެ ދުރު ކަނަށް ފޮނުވާލި ނަމަވެސް ކީޕަރު ދިފާއުކުރި އެވެ. އޭގެ އިރުކޮޅެއް ފަހުން ލެއޯ އޭރިޔާ ތެރެއަށް ތިރިން ނަގައިދިން ބޯޅަ ވިޓީނިއާ ފޮނުވާލުމުންވެސް ކީޕަރު ދިފާއުކުރި އެވެ. ކުޅުމުގެ ތެރެއަށް ބޯޅަ އައިވަގުތު ރޮނަލްޑޯ ފުންނާބުން ފަހަތަށް ފޮނުވާލި ނަމަވެސް އެބޯޅަވެސް ކީޕަރު ގައިގަ ޖެހިފަ ކޯނަރަކަށް ބޭރުވީ އެވެ.
ދެވަނަ ހާފްގައި އޭރިޔާ ތެރެއިން ކޯލޯ މުއާނީ ފޮނުވާލި ބޯޅަ ކޯނަރަކަށް ބޭރުވީ ޕޯޗްގަލް ޑިފެންޑަރު ރުބެން ޑިއާޒް ފައިގަ ޖެހިފަ އެވެ. 69 ވަނަ މިނިޓްގައި ގޯލް އޭރިޔާ ކަނުން ކަމަވިންގާ ފޮނުވާލި ބޯޅަ ދިޔައީ އަރިމަތި ދަނޑި ކައިރިން ބޭރަށެވެ. ދެވަނަ ހާފްގައި ކުޅެން ނިކުއިން ޑެމްބެލޭ އޭރިޔާ ބޭރުން ފޮނުވާލި ބޯޅަ ވެސް ގޯލާ އަމާޒެއް ނުވިއެވެ. އެބޯޅަ ދިޔައީ ގޯލްގެ ކަނާ ދިމާލުން މަތިން ބޭރަށެވެ. ފުރިހަމަ ވަގުތު ހަމަވާން ތިން މިނިޓަށް ވެފައި ވަނިކޮށް ޑީއޭރިޔާ ބޭރުން ތިރިތިރިން ކާންޓޭ ފޮނުވާލި ބޯޅަ ދިފާއުކުރީ ޕޯޗްގަލް ކީޕަރެވެ. އިތުރު ވަގުތުގެ ފަހު މިނިޓްގައި ޑީއޭރިޔާ ތެރެއިން އެމްބާޕޭ ފޮނުވާލި ބޯޅަވެސް ކީޕަރު އަތަށް ނެގިއެވެ.
މުބާރާތުގެ ސެމީފައިނަލްގައި ފްރާންސް ވާދަކުރަން ޖެހޭނީ ސްޕެއިންއާއެވެ.