ޤުރުއާން އުނގަންނައިދޭ ކޯސްތައް އޮންލައިންކޮށް ކިޔަވައިދިނުމުގެ ހުއްދަދީފި

ޤުރުއާނާބެހޭ އެކި މާއްދާތައް އޮންލައިންކޮށް ކިޔެވެމުގެ ހުއްދަ މޯލްޑިވްސް ކޮލިފިކޭޝަން އޮތޯރިޓީ، އެމްކިއުއޭއިން ދީފިއެވެ. އެ އތޯރިޓިން މި ހުއްދަ ދީފައިވަނީ އިސްލާމީ ކަންތައްތަކާބެހޭ ވުޒާރާގެ ލަފާގެމަތިންނެވެ.

މިކަމާގުޅޭގޮތުން ނޫސްވެރިންނަށް މަޢުލޫމާތު ދެއްވަމުން މޯލްޑިވްސް ކޮލިފިކޭޝަންސް އޮތޯރިޓީ، އެމްކިޔުއޭގެ ސީއީއޯ، މަރްޔަމް ފިޒާނާ ރަޝީދު ވިދާޅުވީ ރާއްޖޭގައި ކޯސްތައް އޮންލައިންކޮށް ކިޔަވައިދިނުމުގެ ގައިޑްލައިނެއް ޢާންމުކުރީންސުރެ، އޮންލައިންކޮށް ކިޔަވައިނުދެވޭނެ 8 ދާއިރާއެއް ހިމެނޭ ކަމަށެވެ. އީ-ލަރނިންގ ޑެލިވަރީ މޮޑަލިޓީން ކިޔަވައިނުދެވޭނެ ކަމަށް މިހާތަނަށް ކަނޑައަޅާފައިވާ 8 ދާއިރާގެ ތެރޭގައި ޤުރުއާނުގެ ކޯސްތައްވެސް ހިމެނެއެވެ.

ފިޒާނާ ވިދާޅުވީ ގައިޑްލައިންގައި އޮންލައިންކޮށް ކިޔަވައިނުދެވޭނެ ކަމަށްބުނާ ދާއިރާތަކުގެ ކޯސްތައް، ކަމާބެހޭ ފަރާތްތަކާ ވާހަކަދައްކައިގެން އޮންލައިންކޮށް ކިޔަވައިދެވޭތޯ ބަލަމުންދާ ކަމަށެވެ. މިގޮތުން ޤުރުއާނުގެ ދާއިރާގައި ހިމެނޭ ކޯސްތައް ހިންގުމުގެ ހުއްދައަށް އެދުމުން އެ ހުއްދަ ދީފައިވާކަން ފިޒާނާ ފާހަގަކުރެއްވިއެވެ.

މޯލްޑިވްސް ކޮލިފިކޭޝަން އޮތޯރިޓީ ގެ އީ-ލަރނިންގ ގައިޑްލައިންގައި ބަޔާންކުރާގޮތުގައި އޮންލައިންކޮށް ކޯހެއް ކުރިއަށް ގެންދެވޭނީ އެ ދާއިރާގެ ޤާނޫނީ ބާރުލިބިފައިވާ ކައުންސިލްތަކާއި، ކަމާބެހޭ ރެގިއުލޭޓަރީ އިދާރާ ތަކުން އީ-ލަރނިންގ ޑެލިވަރީ މޮޑަލިޓީން ކިޔަވައިދިނުމަށް ހުއްދަ ދިނުމުންނެވެ

"އޮންލައިންކޮށް ޤުރުއާނާބެހޭ މޮޑިޔުލްތައް އޮންލައިންކޮށް ކިޔަވައިދިނުމަށް ހުއްދަ ދެވިދާނެކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވީ." އެމްކިއުއޭގެ ސީއީއޯ ފިޒާނާ ރަޝީދު ވިދާޅުވިއެވެ.

ފިޒާނާ ވިދާޅުވީ ޤުރުއާނާބެހޭ އެކި ދާއިރާތައް އޮންލައިންކޮށް ކިޔަވައިދިނުމުގެ ހުއްދަ ދިނުމާއި ގުޅިގެން މަޢާނިލް ޤުރުއާނާއި ޢުލޫމުލް ޤުރުއާން ފަދަ މާއްދާތައް އޮންލައިންކޮށް ކިޔަވައި ދެވިދާނެކަމަށެވެ. އަދި ވަކި އުޞޫލެއްގެ ދަށުން އެހެން މާއްދާތައްވެސް އެގޮތަށް ކިޔަވައިިދެވިދާނެކަމަށާއި، އޭގެތެރޭގައިި ޠިލާވާ އަދި ހިފްޡްފަދަ މާއްދާތައް ހިމެނޭކަމަށް ފިޒާނާ ވިދާޅުވިއެވެ.

ހަމައެހެންމެ ޤުރުއާނުގެ ދާއިރާގެ ކޮންމެ ޕްރޮގްރާމެއްވެސް އެ ޕްރޮގްރާމުގައި ކިޔަވައިދެވޭ މާއްދާތަކަށް ރިޔާޢަތްކޮށް ވަކި އުސޫލެއްގެތެރެއިން ޢީލާނިންގ މޮޑަލިޓީގައި ކިޔަވައިދިނުމުގެ ހުއްދަ ދެވިދާނެކަމަށްވެސް ފިޒާނާ ވަނީ ވިދާޅުވެފައެވެ. ވުމާއެކު އެފަދަ ޕްރޮގްރާމްތައް ފަރުމާކުރުމަށްފަހު އެއޮތޯރިޓީއަށް ހުށައެޅުއްވުމަށް ފިޒާނާ ވަނީ އެދިވަޑައިގެންފައެވެ. އަދި އީ-ލާރނިން މޮޑަލިޓީގެ ދަށުން އެ ޕްރޮގްރާމެއް ކުރިއަށް ގެންދަންވާނީ އެ އޮތޯރިޓީން ހުއްދަ ދިނުމުންކަން ފިޒާނާ ފާހަގަކުރެއްވިއެވެ. މިހެން ހަމަޖެއްސިނަމަވެސް ހުރިހާ އިމްތިހާނެއް ކުރިއަށްގެންދަންޖެހޭނީ ފޭސް-ޓު-ފޭސްކޮށްކަމަށްވެސް އެމްކިއުއޭގެ ސީއީއޯ ވިދާޅުވިއެވެ.

ޤުރުއާނާބެހޭ ދާއިރާއިން އޮންލައިންކޮށް ކިޔަވައިދިނުމުގެ ހުއްދަ އިސްލާމީ ކަންތައްތަކާބެހޭ ވުޒާރާގެ ލަފަޔާއެކު އެމްކިއުއޭއިން ދެއްވުމާއެކު، މިހާރު ރާއްޖޭގައި އޮންލައިންކޮށް ކިޔަވައިނުދެވޭނީ 7 ދާއިރާއަކުންނެވެ. މި 7 ދާއިރާއަކީ މެޑިސިން އެންޑް ޑެންޓިސްޓްރީ، ޕްރެކްޓިކަލް ޑިސިޕްލިން އޮފް ހެލްތު ސައިންސަސް، ނާސިން، ޓެކްނިކަލް އެންޑް ވޮކޭޝަނަލް އެޑިޔުކޭޝަން، އިންޖިނިއަރިން، އާކިޓެކްޗަރ އަދި ޓީޗިންއެވެ.