ކައުންސިލްތަކުން ދެން އުޅަނދު ރަޖިސްޓްރީކޮށްދޭނީ އެކައުންސިލް ހިމެނޭ ޒޯނަކަށް

ކައުންސިލްތަކުން ދެ ފުރޮޅުލީ އުޅަނދު ދެން ރަޖިސްޓްރީކޮށްދެވޭނީ އެކައުންސިލް ހިމެނޭ ޒޯނަކަށްކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވިދާޅުވެއްޖެއެވެ.

ދެ ފުރޮޅުލީ އެއްގަމު އުޅަނދު ބޭނުން ޒޯނަކަށް ރަޖިސްޓްރީކުރުމުގެ ހުއްދަ ކައުންސިލްތަކަށް މީގެ ކުރިން ދަތުރުފަތުރާބެހޭ ވުޒާރާއިން ވަނީ ދެއްވާފައެވެ. ނަމަވެސް މިމަހުގެ 8 ވަނަ ދުވަހުން ފެށިގެން އެ ހުއްދަ ވަނީ ނަގާފައެވެ.

ދަތުރުފަތުރާ ބެހޭ ވުޒާރާއިން ވިދާޅުވީ ކައުންސިލްތަކަށް އުޅަނދު މިހާރު ރަޖިސްޓްރީ ކޮށްދެވޭނީ އެ ކައުންސިލެއް ހިމެނޭ ރަށެއް ނުވަތަ ސިޓީއެއް ނުވަތަ އަތޮޅެއް ހިމެނޭ ޒޯނަކަށް ކަމަށެވެ. އިންޖީނުލީ އުޅަނދު ރަޖިސްޓްރީކުރުމުގެ ގަވާއިދުގެ 11 ވަނަ މާއްދާގައި ރާއްޖޭގައި ދުއްވާ އެއްގަމު އުޅަނދު ރަޖިސްޓްރީކޮށްދެވޭނެ ޒޯންތައް ވަނީ ކަނޑައަޅާފައެވެ. އެގޮތުން ޒޯން އޭ، ޒޯން ބީ، އަދި ޒޯން ސީ ހިމެނެއެވެ.

"ޒޯން އޭ"ގައި ހިމެނެނީ މާލެއާއި ހުޅުމާލެއެވެ. އަދި "ޒޯން ބީ"ގައި ހިމެނެނީ ހއ، ހދ، ލ، ގއ، ގދ، ޏ އަދި ސ އަތޮޅުގައި ހިމެނޭ ރަށްތަކެވެ. އަދި "ޒޯން ސީ"ގައި ހިމެނެނީ ށ، ނ، ރ، ބ، ޅ، ކ، އއ، އދ، ވ، މ، ފ، ދ އަދި ތ އަތޮޅުގައި ހިމެނޭ ރަށްތަކެވެ.

އިންޖީނުލީ އުޅަނދު ރަޖިސްޓްރީކުރުމުގެ ގަވާއިދުގައިވާ ގޮތުން އުޅަނދު ރަޖިސްޓްރީ ކޮށްފައިވާ ޒޯން ފިޔަވާ އެހެން ޒޯނެއްގައި ދުއްވޭނީ އެއްގަމު ދަތުރުފަތުރާ ބެހޭ ވުޒާރާއިން ނުވަތަ އެވުޒާރާއިން އިޚްތިޔާރު ދީފައިވާ ފަރާތަކުން ލިޔުމުން ހުއްދަ ހޯދުމަށްފަހުއެވެ. ހުއްދަ ނުހޯދައި ރަޖިސްޓްރީކޮށްފައިނުވާ ޒޯނެއްގައި ދުއްވުމަކީ މިގަވާއިދުގެ ދަށުން މަނާ ކަމެކެވެ.

އެއްގަމު ދަތުރުފަތުރުގެ ޤާނޫނުގައި އޮންނަގޮތުން ދިވެހިރާއްޖޭގެ ވަކި ރަށެއްގައި ނުވަތަ ސިޓީއެއްގައި ނުވަތަ ސަރަހައްދެއްގައި އެއްގަމު އުޅަނދު ރަޖިސްޓްރީކޮށްދޭނެ އަދަދާއި އުޅަނދު ބޭނުންކުރެވޭނެ މުއްދަތު އެރަށެއްގެ ނުވަތަ ސިޓީއެއްގެ ކައުންސިލުން ކަނޑައަޅަންޖެހޭނެއެވެ.

އަދި އެއްގަމު އުޅަނދު ރަޖިސްޓްރީކޮށްދޭނެ އަދަދާއި އުޅަނދު ބޭނުންކުރެވޭނެ މުއްދަތު ކަނޑައެޅުމުގެ ޤަވާއިދަށް އިސްލާހެއް ގެނެސް ރާއްޖޭގެ ރަށްރަށުގައި އެންމެ ގިނަވެގެން އެއްގަމު އުޅަނދު ދުއްވޭނެ އަދަދު ކަނޑައެޅުމުގެ ކަންކަން ކޮންމެ 5 އަހަރަކުން މުރާޖަޢާ ކުރަންޖެހޭ ގޮތަށްވަނީ ހަދާފައެވެ. އެގޮތުން ވެހިކަލް ކެޕޭސީޓިއަށްވުރެ އެރަށެއްގައި ބޭނުންކުރާ އުޅަނދު އިތުރުނުވާކަން ކަށަވަރުކުރުމާއި އުޅަދުތަކުގެ މަޢުލޫމާތު އަދާހަމަކޮށް ބެލެހެއްޓުމަކީ އެރަށެއްގެ ކައުންސިލުގެ ޒިންމާއެކެވެ. ނަމަވެސް ބިމަށް ބަދަލު އައިސްފިނަމަ 5 އަހަރުވުމުގެ ކުރިންވެސް މުރާޖަޢާކުރުމުގެ އިޚުތިޔާރު ކައުންސިލަށް ލިބެއެވެ.