ޖަޕާނުން ހަދިޔާކުރި ގިނަ ޢަދަދެއްގެ އުޅަނދާއެކު ފުލުހުންގެ މަސައްކަތްތައް ފުޅާވެގެންދާނެ: ސީޕީ

ޖަޕާނު ސަރުކާރުން ދިވެހި ފުލުހުންގެ ޚިދުމަތަށް ހަދިޔާކުރި އުޅަނދުތަކާއެކު މަގުމަތީގެ އަމާންކަމާއި ހަމަޖެހުން ޤާއިމްކުރުމަށްކުރާ މަސައްކަތްތައް އިތުރަށް ފުޅާވެގެންދާނެކަމަށް ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވެއްޖެއެވެ.

ކޮމިޝަނަރ އޮފް ޕޮލިސް މިހެން ވިދާޅުވީ ޖަޕާނު ސަރުކާރުން ފުލުހުންގެ ޚިދުމަތަށް އުޅަނދުތަކެއް ހަދިޔާކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ޖަޕާނު ސަރުކާރުން ވަނީ ދިވެހި ފުލުހުންގެ ޚިދުމަތަށް 54 ޕޮލިސް ކާރާއި، 4 ޓޮޔޯޓާ ވޭން ހަދިޔާކޮށްފައެވެ. އެތަކެތީގެ އަގު 4 މިލިއަން އެމެރިކާ ޑޮލަރު ނުވަތަ 61.7 މިލިއަން ރުފިޔާއަށް އަރައެވެ.

މިތަކެތި ދިވެހި ފުލުހުންގެ ޚިދުމަތާ ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ މުޖުތަމަޢުގައި ކުށްކުރުން އިތުރުވަމުންދާއިރު، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރަން ކުރަންޖެހޭ މަސައްކަތްތައްވެސް އިތުކުރަންޖެހިފައިވާކަމަށެވެ. އެކަންކުރެވޭނީ ރަނގަޅު ވަޞީލަތްތައް ފުލުހުންގެ ޚިދުމަތުގައި ޤާއިމްކޮށްގެންކަމަށް ކޮމިޝަނަރ އޮފް ޕޮލިސް ވިދާޅުވިއެވެ.

ޝުޖާޢު ވިދާޅުވީ ޖަޕާނު ސަރުކާރުން ހަދިޔާކުރި އުޅަނދުތަކާއެކު ފުލުހުންގެ މަސައްކަތްތަކަށް އިތުރު ކުރިއެރުމެއް ލިބޭނެ ކަމަށެވެ. އަދި ރައްކާތެރިކަމާއި ހަމަޖެހުން ޤާއިމްކުރުމަށްޓަކައި ފުލުހުންގެ ޤާބިލިއްޔަތު ވަރަށް ބޮޑަށް އިތުރުވެގެންދާނެކަމަށް ޝުޖާޢު ވިދާޅުވިއެވެ.

"އަތޮޅުތެރެއާއި މާލޭގައި ކުށްކުރުން އިތުރު ވަމުން އަންނައިރު، އޮޕަރޭޝަންތައް ހިންގުމަށް ފުލުހުންގެ ޤާބިލްކަން އިތުރުކުރުން މުހިންމު. ފުލުހުންނަށް ރަނގަޅު ވަޞީލަތްތައް ފޯރުކޮށްދެވިގެން ދިއުމުން، ސަލާމަތާއި ރައްކާތެރިކަން ކަށަވަރުކުރުމުގެ މަސައްކަތަށް އިތުބަރާއި ޔަޤީންކަން ލިބިގެންދާނެ." ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވިއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ޖަޕާނު ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗީ މިޑޯރީ ވިދާޅުވީ ކުރިއަށް އޮތްތަނުގައި އުޅަނދުތަކުގެ އިތުރުންވެސް އެހެނިހެން ވަޞީލަތްތައްވެސް ޖަޕާނު ސަރުކާރުން ފުލުހުންނަށް ފޯރުކޮށްދޭނެ ކަމަށެވެ. އެގޮތުން މެޓަލް ޑިޓެކްޓަރާއި، ލޭސަރާއި، ޕެސެންޖަރ ކްރާފްޓާއި، ރަބަރ ބޯޓު ކުރިއަށް އޮތް ތަނުގައި ހަދިޔާކުރެވޭނެކަމަށް ސަފީރު ވިދާޅުވިއެވެ.

"މިއީ ޖަޕާނު ސަރުކާރުން ލޯ އެންފޯސްމެންޓަށް ސަޕޯޓްދޭން ބޭނުންވާކަމުގެ ހެއްކެއް. މިކަމުގެ ސަބަބުން ފުލުހުންނަށް އެމީހުންގެ މަސްޢޫލިއްޔަތު އެންމެ ފުރިހަމަ ގޮތުގައި އަދާކުރަން ފަސޭހަވާނެ. އެގޮތުން ފުލުހުން ހިންގާ ޓްރެފިކް އޮޕަރޭޝަންތަކަށް އިތުރު ކުރިއެރުމެއް ލިބޭނެކަމަށް އުންމީދުކުރަން." ސަފީރު ވިދާޅުވިއެވެ.

ޖަޕާނު ސަރުކާރުން ގެންދަނީ ރާއްޖޭގެ އެކި ދާއިރާތަކަށް މާލީ ގޮތުންނާއި ވަޞީލަތުގެ ގޮތުންވެސް ގިނަ އެހީތަކެއް ފޯރުކޮށްދެމުންނެވެ. އެކި އިދާރާތަކަށް ބޭނުންވާ އުލަނދުތައް ހަދިޔާކުރުމާއި، މެރިޓައިމް ސޭފްޓީއާއި ސެކިއުރިޓީގެ ދާއިރާ ކުރިއެރުވުމަށާއި، ގުދުރަތީ ކާރިސާތަކުން ރައްކާތެރިވުމާގުޅޭ މަސައްކަތްކަށް 6 މިލިއަން ޑޮލަރަށް ވުރެ ގިނަ ފައިސާ އެހީގެ ގޮތުގައި ޖަޕާނުން މިއަހަރުގެ މިހާތަނަށް ދީފައިވެއެވެ.