ލިޔުންތެރިންގެ ދުވަހާ ގުޅުވައިގެން ފޮތް މައުރަޒެއް ހުޅުވައިފި

މިއަހަރުގެ ލިޔުންތެރިންގެ ދުވަހާ ގުޅުވައިގެން ދިވެހިބަހުގެ އެކެޑަމީން ފޮތް މައުރަޒެއް ހުޅުވައިފިއެވެ.

މި ފޮތް މައުރަޒު ހުޅުވައިދެއްވީ ނިޝާން ޢިއްޒުއްދީންގެ ޢިއްޒަތުގެ ވެރިޔާ ޢައްބާސް އިބްރާހިމެވެ. "ފެންޑާ މައުރަޒު 2024" ގެ ނަމުގައި ކުރިއަށްދާ މި ފޮތް މައުރަޒު އޮންނާނީ މިމަހުގެ 14 އިން 15 އަށް ކޮންމެ ދުވަހަކު ހެނދުނު 10 އިން އިރުއޮއްސި 6 ޖެހުމާ ހަމައަށް ދިވެހިބަހުގެ އެކެޑަމީގައެވެ.

މި ފޮތް މައުރަޒު ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ދިވެހިބަހުގެ އެކެޑަމީގެ ރައީސް ޑރ.އަޝްރަފް ޢަބްދުއްރަޙީމް ވިދާޅުވީ، މި މައުރަޒުގައި ދިވެހިބަހުގެ އެކެޑެމީއާއި ދިވެހި ލިޔުންތެރިން ޝާއިޢުކޮށްފައިވާ ފޮތް ހުންނާނެ ކަމަށެވެ. އަދި މިކަމުގެ ސަބަބުން ދިވެހި ލިޔުންތެރިންނަށް ފޮތް ލިޔުމަށް އިތުރު ހިތްވަރެއްލިބޭނެކަން ޑރ.އަޝްރަފް ފާހަގަކުރެއްވިއެވެ.

"މިއީ ދިވެހިބަހުގެ އެކެޑެމީން ލިޔުންތެރިންގެ ދުވަހާ ގުޅުވައިގެން ނެރުނު މައުރަޒެއް. ފޮތް ލިޔާ މީހުންނާއި އެކެޑެމީން ނެރެފައި ހުރި ފޮތްތައް މިތަނުގައި ގަންނަން ލިބެން ހުންނާނެ." ޑރ. އަޝްރަފް ވިދާޅުވިއެވެ.

މި މައުރަޒުން ކުޑަކުދިންނާގުޅޭ އެކި ކަހަލަ ފޮތްތަކާއި، ތާރީޚީ ފޮތްތަކާއި، އަދަބީ ފޮތްތައް ލިބެން ހުންނާނެކަމަށް ދިވެހިބަހުގެ އެކެޑަމީން ވިދާޅުވެއެވެ. އަދި ވާހަކަ، ނާވިލު، އަދި އެކި ކަހަލަ މަޢުލޫމާތު ފޮތްތަކާއި ފަތްތޫރައިގެ އަދަދުތައްވެސް ލިބެން ހުންނާނެކަމަށް އެ އެކެޑަމީން ވިދާޅުވެއެވެ.

ދިވެހިބަހުގެ އެކެޑަމީން ވިދާޅުވާ ގޮތުގައި މުސްތަޤުބަލުގައި އެ އެކެޑަމީން ބާއްވާ މުބާރާތްތަކުގައި ބައިވެރިވާ ދަރިވަރުންނަށް ބޭނުންވާ ވަރަށް ގިނަ މަޢުލޫމާތު ހިމެނޭ ފޮތްތައް މައުރަޒުގައި ހުންނާނެވެ. އަދި މި މައުރަޒު، މަޢުލޫމާތު އެއްކުރަން ބޭނުންވާ ދަރިވަރުންނަށް ލިބޭ ރަނގަޅު ފުރުޞަތެއްގެ ގޮތުގައި ދިވެހިބަހުގެ އެކެޑެމީން ސިފަކުރެއެވެ.