ރިޕަބްލިކަން ޕާޓީގެ ރަނިންގ މޭޓަކަށް ޓްރަމްޕަކީ "އެމެރިކާގެ ހިޓްލަރު" ކަމަށް ވިދާޅުވި ޖޭޑީ ވޭންސް

އެމެރިކާގެ ރިޔާސީ އިންތިޚާބުގައި ވާދަ ކުރައްވާ ރިޕަބްލިކަން ޕާޓީގެ ކެނޑިޑޭޓު, ކުރީގެ ރައީސް ޑޮނަލްޑް ޓްރަމްޕްގެ ރަނިންގ މޭޓަކީ ޤާނޫނު ހަދާ މަޖިލީހުގެ މަތިގެ, ސެނެޓުގައި އޮހާޔޯ ތަމްސީލު ކުރައްވާ މެންބަރު ޖޭމްސް ޑޭވިޑް ވޭންސް ކަން އިޢުލާނު ކޮށްފިއެވެ. ޓްރަމްޕްް އޭނާގެ ރަނިންގ މޭޓު އިޢުލާނު ކުރައްވާފައި ވަނީ ވިސްކޮންސިން ސްޓޭޓްގެ މިލްވާކީގައި މިހާރު ކުރިއަށްދާ ރިޕަބްލިކަން ނޭޝަނަލް ކޮންވެންޝަން (އާރްއެންސީ)ގައެވެ.

މަޝްހޫރު ފޮތެއް ކަމުގައިވާ ހިލްބިލީ އެލެޖީ ލިޔުއްވާފައިވާ ވޭންސަކީ ކުރިން ޓްރަމްޕަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވާފައިވާ ބޭފުޅެކެވެ. ނަމަވެސް, ފަހަކަށް އައިސް ވޭންސް ފެނިގެން ގޮސްފައި ވަނީ ޓްރަމްޕްގެ ސިޔާސަތުތަކަށް ތާޢީދު ކުރައްވާ, ޓްރަމްޕް ދިފާޢުކޮށް އެންމެ އަޑުހަރުކޮށް ވާހަކަ ދައްކަވަމުން ގެންދަވާ ބޭފުޅުންގެ ތެރެއިންނެވެ.

"ވަރަށް ގިނަ ދުވަހު ވިސްނުމަށް ފަހު, މަޝްވަރާތަކަށް ފަހު, ގިނަ ބަޔެއްގެ ހުނަރުތައް ދިރާސާ ކުރުމަށްފަހު, އެމެރިކާގެ ނައިބު ރައީސް ކަމުގެ މަޤާމާ ހަވާލު ވާން އެންމެ އެކަށީގެންވާ ބޭފުޅެއްގެ ގޮތުގައި އަޅުގަނޑު ނިންމި ބޭފުޅަކީ އޮހާޔޯ ސްޓޭޓްގެ ސެނެޓަރު ޖޭޑީ ވޭންސް،" ޓްރުތު ސޯޝަލްގައި ކުރެއްވި ޕޯސްޓެއްގައި ޓްރަމްޕް އިޢުލާނު ކުރެއްވިއެވެ.

ޓްރަމްޕްގެ ރަނިންގ މޭޓަކީ ވޭންސް ކަމުގައި ކަނޑައެޅުމުން ނޮވެންބަރު 5ގައި ބާއްވާ އިންތިޚާބު ކާމިޔާބު ކުރުމުގެ ފުރުޞަތު ޓްރަމްޕަށް އިތުރުވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ. ސަބަބަކީ, އެމެރިކާގެ ރަސްޓިކް ބެލްޓްގެ ގޮތުގައި މަޝްހޫރުވެފައިވާ ސްޓޭޓްތަކުގެ ވޯޓުލާ މީހުންނާ ވޭންސް ގާތްވުމެވެ. އަދި, އެ މީހުންގެ ތާޢީދު ވޭންސަށް އޮތުމެވެ. އުމުރުން 39 އަހަރުގެ ވޭންސާ އެކު ޒުވާނުންގެ ވޯޓު ހޯދުމަށް ޓްރަމްޕަށް އިތުރު ކުރިއެރުމެއް ލިބިގެންދާނެ ކަމަށް ވެސް މަސްރަޙު ދިރާސާ ކުރާ ބައެއް ފަރާތްތަކުން ދެކެއެވެ.

ޓްރަމްޕަށް ތާޢީދު ކުރާ މީހުންގެ ޢަދަދު ވޭންސާ އެކު އިތުރުވާނެ ކަމަށް މަސްރަޙު ދިރާސާ ކުރާ ފަރާތްތަކުން އަންދާޒާ ކުރި ނަމަވެސް, ވޭންސަކީ މެދުމިނުގެ ސިޔާސަތުތަކަށް ތާޢީދު ކުރާ ވޯޓުލާ މީހުންގެ މެދުގައި މަޤުބޫލު ސެނެޓަރެއް ނޫނެވެ. އަދި, ރަނިންގ މޭޓެއްގެ ގޮތުގައި އަންހެން ކެނޑިޑޭޓަކު, ނުވަތަ އެހެން ނަސްލެއްގެ ބޭފުޅަކު ޢައްޔަން ކުރުމަށް ރިޕަބްލިކަން ޕާޓީގެ ގިނަ މެންބަރުންތަކެއް ގޮވައިލާފައިވެއެވެ.

ޓްރަމްޕާ ގާތް ބޭފުޅުން ވިދާޅުވީ, ރަނިންގ މޭޓެއް ކަނޑައެޅުމުގައި އޭނާ ވިސްނަވާފައި ވަނީ އޭނާގެ ސިޔާސަތުތަކަށް ތާޢީދު ކުރާ, އަދި އޭނާއަށް އިތުބާރު ކުރެވޭ ބޭފުޅަކު ހޯއްދެވުމަށެވެ. އަދި, އެކުގައި މަސައްކަތް ކުރަން ފަސޭހަ ވާނެ ރަނިންގ މޭޓެއް އިޚުތިޔާރު ކުރުމަށެވެ. ވޭންސަށް ރަނިންގ މޭޓުގެ މަޤާމު އަރުވަން އެންމެ ބޮޑަށް ވަކާލާތު ކުރި މީހުންގެ ތެރޭގައި ޓްރަމްޕްގެ ދަރިކަލުން ޑޮނަލްޑް ޓްރަމްޕް ޖޫނިއަރ އަދި މަޝްހޫރު ސިޔާސީ ކޮމެންޓޭޓަރ ޓަކަރ ކާލްސަން ފާހަގަ ކޮށްލެވެއެވެ.

ވޭންސަށް ރަނިންގ މޭޓު ކަން ހަވާލު ކުރަން ޓްރަމްޕް ނިންމެވުމުން ރިޕަބްލިކަން ޕާޓީއަށް ޚަރަދު ކުރާ ބައެއް ވިޔަފާރިވެރިން ވަނީ އެ ކަމާ ހިތްހަމަނުޖެހިފައެވެ. ވޭންސްގެ އިތުރުން ރަނިންގ މޭޓު ކަމުގެ މަޤާމު އެރުވުމަށް ޓްރަމްޕް ވިސްނަވަމުން ގެންދެވި ބޭފުޅުންގެ ތެރޭގައި ސެނެޓަރުން ކަމުގައިވާ މާކޯ ރޫބިޔޯއާއި ޓިމް ސްކޮޓްގެ އިތުރުން އުތުރު ޑެކޯޓާގެ ގަވަރުނަރު ޑަގް ބަރގަމް ވެސް ހިމެނެއެވެ.

ވޭންސަކީ އޮހާޔޯގެ ފަގީރު ޢާއިލާއަކަށް ނިސްބަތްވާ ބޭފުޅެކެވެ. ޒުވާން އުމުރުގައި އޭނާ ވަނީ އެމެރިކާގެ އަސްކަރިއްޔާގެ މެރިން ކޯގައި ޚިދުމަތް ކުރައްވާފައެވެ. އެއަށްފަހު, ސްކޮލަރޝިޕެއްގެ ދަށުން ޔޭލް ލޯ ސްކޫލްގައި އޭނާ ތަޢުލީމު ހާސިލު ކުރެއްވިއެވެ. ކިޔަވާ ވިދާޅުވުމަށް ފަހު އޭނާ ވަނީ ސެން ފްރެންސިސްކޯގައި ވެންޗަރ ކެޕިޓަލިސްޓެއްގެ މަޤާމުގައި ވަޒީފާ އަދާ ކުރައްވާފައެވެ.

ދުނިޔޭގެ ލޯތަކަށް ވޭންސް ފެނިގެން ދިޔައީ 2016ވަނަ އަހަރު އޭނާ ލިޔެ ޝާއިޢު ކުރެއްވި ހިލްބިލީ އެލެޖީގެ ސަބަބުންނެވެ. އެއީ, އޭނާގެ ރަށް އޮހާޔޯގެ ފަގީރު ޢާއިލާތަކުން ތަޙައްމުލު ކުރަމުންދާ އިޖުތިމާޢީ އަދި އިޤުތިޞާދީ މައްސަލަތަކާ ގުޅޭ ގޮތުން އޭނާ ލިޔުއްވާފައިވާ ފޮތެކެވެ. ފަގީރު ކަމުގައި ދިރިއުޅޭ ދޮން ނަސްލުގެ މީހުން ޓްރަމްޕަށް ތާޢީދު ކުރާ ސަބަބުތައް އެ ފޮތުގައި ބަޔާން ކުރައްވަން އޭނާ މަސައްކަތް ކުރައްވާފައިވެއެވެ.

ކުރިން ވޭންސަކީ ޓްރަމްޕަށް ވަރަށް ބޮޑަށް ފާޑުވިދާޅުވެ ވާހަކަފުޅު ދައްކަވާފައިވާ ބޭފުޅެކެވެ. މި ގޮތުން, 2016ވަނަ އަހަރު ބޭއްވި ރިޔާސީ އިންތިޚާބުގައި ހިލަރީ ކްލިންޓަނާ ވާދަ ކުރައްވައި ޓްރަމްޕަށް ކާމީޔާބީ ލިބިވަޑައިގަތުމުން ވޭންސް ވަނީ ޓްރަމްޕަކީ "ގަމާރެއް"ގެ ގޮތުގައި އަދި "އެމެރިކާގެ ހިޓްލަރު"ގެ ގޮތުގައި ސިފަ ކުރައްވާފައެވެ. އޭނާ ޓްރަމްޕާ މެދު ގެންގުޅުއްވި ބަސްމަގު ބަދަލު ކުރައްވާފައި ވަނި 2022ވަނަ އަހަރު ސެނެޓަށް ކުރިމަތި ލެއްވުމުގެ ކުރިންނެވެ. އެއަށް ފަހު, އޭނާ ފެނިގެން ގޮސްފައި ވަނީ ޓްރަމްޕް އަޅުއްވާ ކޮންމެ ފިޔަވަޅެއް ދިފާޢު ކުރައްވާ ބޭފުޅެއްގެ ގޮތުގައެވެ.