ފެނަކައިން 60 މަޝްރޫޢު ހިންގީ އޭރުގެ ވެރިން ބޭނުންވާ ވަކިބަޔަކަށް މަންފާވާގޮތަށް: އޭސީސީ
-
ނުޙައްޤުން މުއްސަނދިކަން ހޯދުމުގެ ތުހުމަތު ފެނަކައިގެ ކުރީގެ ވެރިންނަށް ކުރެވޭ
-
ކުރިން ކުންފުނި ހިންގާފައިވާ ގޮތުން 4.3 ބިލިއަނަށް ދަރަނި އަރާފައިވޭ
މިދިޔަ ސަރުކާރުގައި ފެނަކަ ކޯޕަރޭޝުން 60 މަޝްރޫޢު ހިންގާފައިވަނީ އެ ކޯޕަރޭޝަންގެ އިސްވެރިން ބޭނުންވި ވަކި ބަޔަކަށް މަންފާ ހޯދައިދިނުމަށްކަމަށް އެންޓި ކޮރަޕްޝަން ކޮމިޝަންގެ ރައީސް އާދަމް ޝާމިލް ވިދާޅުވެއްޖެއެވެ. އޭސީސީގެ ރައީސް މިހެން ވިދާޅުވީ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަފުޅުދައްވަމުންނެވެ.
މިދިޔަ ސަރުކާރުގައި ފެނަކަ ކޯޕަރޭޝަނުން ކޮރަޕްޝަނަށް ތުހުމަތުވާފަދަ އެތައް މަޝްރޫޢުއެއް ހިންގާފައިވާކަމަށާއި، ސީދާ ކުންފުންޏަށް ގެއްލުންވާގޮތަށް އެތައް ކަމެއް ކޮށްފައިވާކަމަށް މިހާރުގެ މެނޭޖިން ޑިރެކްޓަރ މުޢާޒް މުޙައްމަދު ރަޝީދު ވިދާޅުވެފައިވެއެވެ.
ފެނަކައިގެ ކުރީގެ މެނޭޖްމަންޓުން އެކުންފުނި މެދުވެރިކޮށް މެނޭޖްމަންޓުން އަމިއްލައަށް 60 މަޝްރޫޢެއް ހިންގާފައިވާކަން މިހާރުގެ މެނޭޖްމަންޓުން ހާމަކުރައްވާފައިވެއެވެ. އަދި މީގެ ތެރެއިން 25 މަޝްރޫޢެއްގެ މަސައްކަތްކޮށްފައިވަނީ ކުންފުންޏަށް އިންތިހާއަށް ގެއްލުންވާގޮތަށް ބީއޯކިއުއެއް އަދި މާކެޓުގައި މި މަސައްކަތްތައް ކުރެވޭނެ އަގަށް ބެލުމެއްނެތިކަމަށް މުޢާޒް ވިދާޅުވެފައިވެއެވެ. މީގެ ސަބަބުން އެތައް ސަޕްލަޔަރުންނަށް ދޭން ޖެހޭ ފައިސާ ނުދެވި ކުންފުނި އެތައް ގުނައަކުން ދަރާފައިވާ ކަމަށް މުޢާޒް މުޙައްމަދު ރަޝީދު ވަނީ ވިދާޅުވެފައެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަދައްކަވަމުން އޭސީސީގެ ރައީސް އާދަމް ޝާމިލް ވިދާޅުވީ ފެނަކައިގެ ކުރީގެ މެނޭޖްމަންޓުން އަމިއްލައަށް ހިންގާފައިވާ 60 މަޝްރޫޢުއެއްގެ ތަފްސީލް ދެނެގަތުމުގެ މަސައްކަތް އޭސީސީން މިހާރު ކުރަމުންދާ ކަމަށެވެ. އަދި މިހާރުވެސް މި މައްސަލަތަކުގައި ކޮރަޕްޝަނަށް ތުހުމަތުވާ ކަންކަން ފާހަގަކުރެވިފައިވާކަމަށާއި، އެންމެ ބޮޑަށް ފާހަގަކުރެވިފައިވަނީ ނުޙައްޤުން މުއްސަނދިކަން ހޯދާފައިވާ މައްސަލަތައް ކަމަށް ޝާމިލް ވިދާޅުވިއެވެ. އެގޮތުން މި މައްސަލަތަކުގައި ހިމެނޭ މީހުން ނުޙައްޤުން މުއްސަނދިކަން ހޯދާފައިވާ ގޮތް ބެލުމަށް އެމީހުންގެ މާލީ ޙާލަތާއި، ބޭންކު ޓްރާންސެކްޝަންތަކުގެ ދިރާސާހެދުމުގެ މަސައްކަތް މިހާރު ކުރަމުންދާކަމަށް ޝާމިލް ވިދާޅުވިއެވެ.
ޝާމިލް ވިދާޅުވީ ފެނަކައިގެ މައްސަލައިގެ ތެރެއިން މިހާރު ފާހަގަކުރެވިފައިވާ ކަންކަމުގެ ތެރޭގައި ވަކި ދުވަސްވަރެއްގެ ތެރޭގައި ވަކި ބަޔަކަށް ފައިދާވާ ގޮތަށް ވަޒީފާތަކެއް ދީގެން މަޝްރޫޢުތަކެއް ހިންގާފައި ހުރިކަން ފެނަން އެބައޮތްކަމަށެވެ.
"ފެނެކައިގެ ތަޙުޤީޤު މިހާރު ބައްޓަންކޮށްފައިވަނީ މަޤާމު ބޭނުންކޮށްގެން މަންފާ ލިބުމާއި ހޯދައިދިނުމާއި ޚިޔާނާތާއި ރިޝްވަތު ލިބިގަނެފައިވޭތޯ ބެލުމާއި ނުޙައްޤުން މުއްސަނދިކަން ހޯދުން، މި 5 ކުށަށް." ޝާމިލް ވިދާޅުވިއެވެ.
ޝާމިލް ވިދާޅުވީ ވޭތުވެދިޔަ އަހަރުތަކުގައި ފެނަކަ ކޯޕަރޭޝަނުން ވަރަށް ގިނަ ފައިސާ ދައުލަތަށް ގެއްލިފައިވާ ކަމަށެވެ. އަދި މި ފައިސާގެ ތެރެއިން ދައުލަތަށް އަނބުރާ ހޯދިފައިވަނީ އޭގެން ވަރަށް ކުޑަ މިންވަރެއް ކަމަށެވެ. އެގޮތުން މިހާތަނަށް ދައުލަތަށް ހޯދިފައިވަނީ 91،332 ރުފިޔާ 38 ލާރިކަމަށް ޝާމިލް ވިދާޅުވިއެވެ. ނަމަވެސް ފެނަކަ ކޯޕަރޭޝަނުން ދައުލަތަށް ގެއްލިފައިވަނީ ޖުމްލަ ކިހާ ފައިސާއެއްކަމެއް ޝާމިލް ވިދާޅުވެފައެއް ނުވެއެވެ.
މިދިޔަ ސަރުކާރުގައި އެންމެ ދޯދިޔާކޮށް ހިންގާފައިވާ އެއް ކުންފުންޏަކީ ފެނަކަ ކޯޕަރޭޝަްކަމަށް ކަމާގުޅުންހުރި އިދާރާތަކުން ބުނެފައިވެއެވެ. އެގޮތުން
ބޮޑެތި އާމްދަނީ ލިބޭ ބޭންކުތަކާއި ކުންފުނިތަކަށްވެސް ފެނަކައިގެ އިޖްތިމާޢީ ޒިންމާގެ ދަށުން ހިލޭ މަޝްރޫޢުތައް ހިންގައިދީ، މަޝްރޫޢާ ނުބައްދަލު ކުޑަ އަގުގައި ސަރުކާރުގެ އެކި ވުޒާރާތަކުންވެސް ފެނަކައާ މަޝްރޫޢުތައް ޙަވާލުކޮށް އެމަސައްކަތް ކުރީގެ މެނޭޖްމަންޓުން ކުރުވާފައިވާކަމަށް ފެނަކައިގެ މިހާރުގެ މެނޭޖްމަންޓުން ބުނެފައިވެއެވެ.
ހަމައެއާއެކު އަތޮޅުތަކުގެ 21 ރަށެއްގައި ހިންގާފައިވާ އިންޖީނުގެ ތަރައްޤީކުރުމުގެ މަޝްރޫޢުގެ ދަށުން އީއައިއޭ ރިޕޯޓުތަކާއި ޚިލާފަށް ތިމާވެށްޓަށް ގެއްލުންވާނެހެން މަސައްކަތްކޮށްފައިވާތީ އީޕީއޭއިންވަނީ 4.2 މިލިއަން ރުފިޔާއިން އެކުންފުނި ޖޫރިމަނާކޮށް އެއްމަސްދުވަހުގެ ތެރޭގައި ފައިސާދައްކާ ޚަލާސްކުރުމަށްވެސް އަންގާފައެވެ.
މިދިޔަ ސަރުކާރުގައި ފެނާއި ނަރުދަމާގެ 80 އަށްވުރެ ގިނަ މަޝްރޫޢުގެ މަސައްކަތްތައް އެކި މަރުހަލާތަކުގައި އެކި ރަށްރަށުގައި ކުރިއަށް ގެންދިއައެވެ. މީގެ ތެރެއިން ގިނަ މަޝްރޫޢުތަކުގެ މަސައްކަތް ހުއްޓިފައިވާއިރު، ހުއްޓިފައިވަނީ ފެނަކަ ކޯޕަރޭޝަނާ ހަވާލުކޮށްފައި ހުރި މަޝްރޫޢުތައްކަމަށް ޢިމާރާތްކުރުމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބު ވަނީ ވިދާޅުވެފައެވެ.
މި ސަރުކާރު ހަވާލުވިއިރު ފެނަކަ ކޯޕަރޭޝަންގެ ދަރަނި 4.3 ބިލިއަން ރުފިޔާއަށްވުރެ ބޮޑެވެ. އޭގެ ތެރެއިން ކޮރަޕްޝަނަށް ތުހުމަތުވާގޮތަށް ފެނަކައިން ހިންގި 60 މަޝްރޫޢަށް ނިމިދިޔަ ސަރުކާރުން 1 ބިލިއަން ރުފިޔާ ޚަރަދުކޮށްފައިވާކަމަށް މެނޭޖިންގ ޑިރެކްޓަރ މުޢާޒް ވަނީ މީގެ ކުރިން ވިދާޅުވެފައެވެ.