ދެވަނަ ދައުރަކަށް އިންތިޚާބުވެ ވަޑައިގެންނެވުމަށް ކެމްޕޭން ކުރައްވަމުން ގެންދެވި އެމެރިކާގެ ރައީސް ޖޯ ބައިޑަން ރިޔާސީ ރޭހުން ވަކިވެ ވަޑައިގަންނަވައިފިއެވެ. 81 އަހަރުގެ ބައިޑަން ރިޔާސީ ރޭހުން ފެޔަށް ޖެހިވަޑައިގަންނަވާފައި ވަނީ, އޭނާގެ އުމުރު މާ ދޮށިވެއްޖެ ކަމަށް ބުނެ, ވެރިކަން ކުރާ ޑިމޮކްރެޓިކް ޕާޓީގެ ޓިކެޓް އެހެން ބޭފުޅަކަށް ހަވާލު ކުރުމަށް ޕާޓީގެ ގިނަ މެންބަރުންތަކެއް ގޮވައިލަމުންދާ ދަނޑިވަޅެއްގައެވެ.
ބައިޑަންގެ އުމުރާ ގުޅޭ ބަހުސް ފެށިގެން ދިޔައީ ރިޔާސީ ރޭހަށް ތައްޔާރުވުމުގެ ގޮތުން ސީއެންއެނުން އިންތިޒާމު ކޮށްގެން ބޭއްވި ބަހުސެއްގައި އިދިކޮޅު ރިޕަބްލިކަން ޕާޓީގެ ކެނޑިޑޭޓު, ކުރީގެ ރައީސް ޑޮނަލްޑް ޓްރަމްޕުގެ ކުރިމަތީގައި ކުރިމަތިވި ނާކާމިޔާބީއާ ގުޅިގެންނެވެ. އެ ބަހުސްގައި ބައިޑަން ފެނިގެން ގޮސްފައި ވަނީ ވަރަށް ލޮނު މަޑު ކެނޑިޑޭޓެއްގެ ގޮތުގައެވެ. ބަހުސާ ގުޅިގެން ރިޔާސީ ރޭހުން ވަކިވުމަށް ގޮވައިލި ގޮވައިލުންތަކަށް ރައްދު ދެއްވަމުން ބައިޑަން ކުރިން ވަނީ އެ ކަން ނުކުރައްވާނެ ކަން އެތަކެއް ފަހަރު ވިދާޅުވެފައެވެ.
ރިޔާސީ ރޭހުން ފެޔަށް ޖެހިވަޑައިގަންނަވަން ބައިޑަނަށް ބާރު އަޅާފައިވާ ބޭފުޅުންގެ ތެރޭގައި ޑިމޮކްރެޓިކް ޕާޓީގެ ބައެއް އިސް މެންބަރުން ހިމެނެއެވެ. އޭގެ ތެރެއިން ޤާނޫނު ހަދާ މަޖިލިސް, ކޮންގްރެސްގައި އެ ޕާޓީ ތަމްސީލު ކުރައްވާ 30 މެންބަރުން ހިމެނޭ ކަން ފާހަގަ ކުރެވެއެވެ.
އެކްސްގައި ޝާއިޢު ކުރެއްވި ޕޯސްޓެއްގައި ރިޔާސީ ރޭހުން ވަކިވެ ވަޑައިގަންނަވާފައިވާ ކަން ބައިޑަން އިޢުލާނު ކުރެއްވި ނަމަވެސް, މިހާރު ހިނގަމުންދާ ރިޔާސީ ދައުރު ނިމެންދެން ރައީސް ކަމުގެ މަޤާމުގައި ދެމި ހުންނަވާނެ ކަމުގައި އޭނާ ވިދާޅުވިއެވެ. ކޮވިޑް-19 ޖެހިގެން މިހާރު އެކަހެރިވެގެން ހުންނެވި ބައިޑަން ވިދާޅުވީ, އެ ނިންމެވުމާ ގުޅޭ ގޮތުން ކުރިއަށް އޮތް ހަފުތާގައި ޤައުމާ މުޚާޠަބު ކުރައްވައި ވާހަކަފުޅު ދައްކަވާނެ ކަމުގައެވެ.
"ތިޔަ ބޭފުޅުންގެ ރައީސް ކަމުގެ މަޤާމުގައި ޚިދުމަތް ކުރުމަކީ އަޅުގަނޑަށް ލިބުނު ވަރަށް ބޮޑު ޝަރަފެއް. ކުރިއަށް އޮތް އިންތިޚާބުގައި ވާދަކޮށް ދެވަނަ ދައުރެއް ކާމިޔާބު ކުރަން ކިތަންމެ ބޭނުންވި ނަމަވެސް, ޕާޓީއަށާއި ޤައުމަށް މި ވަގުތު އޮތް އެންމެ ހެޔޮ ގޮތަކީ ރިޔާސީ ރޭހުން ވަކިވުން ކަމަށް އަޅުގަނޑު ގަބޫލު ކުރަން. އަދި, ދައުރުގެ ބާކީ އޮތް ދުވަސްތަކުގައި ރައީސް ކަމުގެ ޒިންމާތައް އެންމެ ފުރިހަމައަށް އަދާ ކުރުން ކަމުގައި ދެކެން،" ބައިޑަން ވިދާޅުވިއެވެ.
ރިޔާސީ ރޭހުން ވަކިވެ ވަޑައިގަންނަވާފައިވާ ކަން އިޢުލާނު ކުރެއްވުމަށް ފަހު ބައިޑަން ވަނީ އޭނާގެ ނައިބު ރައީސް ކަމަލާ ހެރިސަށް ތާޢީދު ކުރައްވާ ކަން ވެސް ހާމަ ކުރައްވާފައެވެ. އެއާ އެކު, ބައިޑަންގެ ބަދަލުގައި ޑިމޮކްރެޓިކް ޕާޓީން ރިޔާސީ ރޭހަށް ނިކުމެ ވަޑައިގަންނަވާނީ 59 އަހަރުގެ ހެރިސް ކަމަށް ބެލެވެއެވެ.
ޑިމޮކްރެޓިކް ޕާޓީގެ ޓިކެޓް ހެރިސަށް އަރުވައިފި ނަމަ, އޭނާ ވެވަޑައިގަންނަވާނީ އެމެރިކާގެ ރިޔާސީ އިންތިޚާބެއްގައި ވާދަ ކުރައްވާ ކަޅު ނަސްލަށް ނިސްބަތްވާ ފުރަތަމަ އަންހެން ބޭފުޅާއަށެވެ. ރިޔާސީ އިންތިޚާބުގައި ޑިމޮކްރެޓިކް ޕާޓީ ތަމްސީލު ކުރައްވަން ހެރިސަށް ޕާޓީގެ އެތެރެއިން ގިނަ ހުރަސްތަކެއް ކުރިމަތިވާނެ ކަމަށް ނުބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ދެކެއެވެ.
ބައިޑަން ރިޔާސީ ރޭހުން ވަކިވެ ވަޑައިގަންނަވާފައި ވަނީ, ޑިމޮކްރެޓިކް ނޭޝަނަލް ކޮންވެންޝަން ފެށުމުގެ އެންމެ ފަހުގެ ތައްޔާރީތައް ކުރަމުން ދިޔަ ދަނޑިވަޅެއްގައެވެ. އަދި, ރިޔާސީ ކެމްޕޭންގައި ވެސް މުހިންމު ވަގުތެއްގައެވެ. ފަހަކަށް އައިސް ޓްރަމްޕް ގެންދަވަނީ ބައިޑަން ނޫން ކެނޑިޑޭޓަކު ނެރުމާ ދެކޮޅަށް ވާހަކަފުޅު ދައްކަވަމުންނެވެ. ސަބަބެއް ކަމުގައި މަސްރަޙު ދިރާސާ ކުރާ ފަރާތްތަކުން ބުނީ, އިންތިޚާބުގައި ބައިޑަނާ ވާދަ ކުރައްވަން ޖެހިވަޑައިގަންނަވައިފި ނަމަ, ކާމިޔާބީ ހޯދުމުގެ ފުރުޞަތު ޓްރަމްޕަށް ބޮޑު ވާނެ ކަމަށް އޭނާ ގަބޫލު ކުރެއްވުމެވެ. އެމެރިކާގެ ރިޔާސީ އިންތިޚާބު އޮންނާނީ ނޮވެންބަރު މަހުގެ 5ވަނަ ދުވަހުއެވެ.