މިޔަންމާގެ ސަރުކާރާ ދެކޮޅަށް ހަނގުރާމަ ކުރަމުންދާ ހަތިޔާރު އެޅި ޖަމާޢަތްތަކުން, އެ ޤައުމުގެ އަސްކަރިއްޔާގެ ސަރަޙައްދީ މައި މަރުކަޒަކަށް އަތްގަދަ ކޮށްފިއެވެ. އަސްކަރީ މަރުކަޒަށް އަތްގަދަ ކޮށްފައި ވަނީ މިޔަންމާ ނޭޝަނަލް ޑިމޮކްރެޓިކް އެލަޔަންސް އާމީ (އެމްއެންޑީއޭއޭ)ގެ ހަތިޔާރު އެޅި ސިފައިންނެވެ. އެ މީހުން އަތްގަދަ ކޮށްފައި ވަނީ މިޔަންމާގެ އުތުރުގައި އޮންނަ ޝާ ސްޓޭޓްގެ ލާޝިޔޯގައި އޮންނަ އަސްކަރީ މަރުކަޒެކެވެ.
ޗައިނާގެ ސަރަޙައްދީ ރޮނގު ކައިރީގައި އޮންނަ އަސްކަރީ މަރުކަޒަށް އެމްއެންޑީއޭއޭގެ ސިފައިން އަތްގަދަ ކުރުމަކީ މިޔަންމާގައި ވެރިކަން ކުރާ އަސްކަރީ ސަރުކާރަށް ކުރިމަތިވި ބޮޑު ނާކާމިޔާބީއެކެވެ. އެމްއެންޑީއޭއޭގެ ސިފައިން, އަސްކަރިއްޔާގެ މަރުކަޒަށް އަތްގަދަ ކޮށްފައި ވަނީ 23 ދުވަހަަށް ދެމިގެން ދިޔަ ވަރުގަދަ ހަނގުރާމައަކަށް ފަހުއެވެ.
މި ކަމާ ގުޅޭ ގޮތުން އެމްއެންޑީއޭއޭން ބުނީ, މިޔަންމާގެ އަސްކަރީ ސަރުކާރުގެ އަތްދަށުން ލާޝިޔޯއާއި އެ ރަށުގެ ރައްޔިތުން މިނިވަން ކުރެވިފައިވާ ކަމުގައެވެ. އަދި, އެ ރަށުގައި އެ ޖަމާޢަތުގެ ވެރިކަމެއް ގާއިމު ކުރާނެ ކަން ހާމަކޮށް, އެ ޖަމާޢަތުން ވަނީ އަމަން އަމާން ކަން ދެމެހެއްޓުމަށް އެ ރަށުގެ ރައްޔިތުންގެ ކިބައިން އެދިފައެވެ. ލާޝިޔޯގައި ހުންނަ އަސްކަރީ މަރުކަޒު އެމްއެންޑީއޭއޭގެ އަތްދަށަށް ވެއްޓިފައިވާ ކަން މިޔަންމާގެ އަސްކަރީ ސަރުކާރުން ކަށަވަރު ކޮށްދީފައެއް ނުވެއެވެ.
އެމްއެންޑީއޭއޭއަކީ މިޔަންމާގެ އެކި ގަބީލާތަކުގެ ހަތިޔާރު އެޅި ގުރޫޕުތަކުގެ މައްޗަށް އެކުލެވިގެންވާ ކޯލިޝަނެކެވެ. އެ ޖަމާޢަތުން ބުނީ, މިޔަންމާގެ އަސްކަރިއްޔާއާ ދެކޮޅަށް ހަނގުރާމަ ކުރަމުން ދަނީ, އަސްކަރިއްޔާއިން އަތްގަދަ ކޮށްފައިވާ އެ މީހުންގެ ބިންތަކާއި, އަޅުވެތި ކޮށްފައިވާ ރައްޔިތުންނަށް މިނިވަން ކަން ހޯދައިދިނުމަށް ކަމުގައެވެ. މިޔަންމާގެ އަސްކަރިއްޔާއާއި އެމްއެންޑީއޭއޭއާ ދެމެދު ހިނގަމުންދާ ހަމަނުޖެހުންތައް ދާޚިލީ ހަނގުރާމައަކަށް ބަދަލު ވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.
މިޔަންމާގެ އަސްކަރިއްޔާއަކީ ހަތިޔާރުގެ ގާބިލު ކަމުގެ ގޮތުން ބަލާއިރު ވަރަށް ބާރުގަދަ އަސްކަރިއްޔާއެކެވެ. އަސްކަރިއްޔާއާއި އެމްއެންޑީއޭއޭއާ ދެމެދު ކުރަމުންދާ ހަނގުރާމައާ ގުޅިގެން ގެދޮރު ގެއްލިފައިވާ ޢާންމު ރައްޔިތުންގެ ޢަދަދު 2.6 މިލިޔަނަށް އުފުލިފައިވާ ކަމުގައި އދއިން ބުނެއެވެ. މިޔަންމާގެ އަސްކަރިއްޔާއިން އެ ޤައުމުގެ ޑިމޮކްރެޓިކް ސަރުކާރު ވައްޓައިލުމަށް ފަހު ވެރިކަން ފޭރިގަނެފައި ވަނީ 2021ވަނަ އަހަރުއެވެ.
މިޔަންމާގެ އަސްކަރީ ސަރުކާރާއި އެމްއެންޑީއޭއޭއާ ދެމެދު ޙަމަލާ ބަދަލު ކުރުން ހުއްޓުވައި, ސުލްޙައިގެ މަޝްވަރާތައް ބޭއްވުމަށް ޗައިނާއިން ދަނީ މަސައްކަތް ކުރަމުންނެވެ. މިޔަންމާގެ ދާޚިލީ ހަމަނުޖެހުމުގެ ނުރައްކާތެރި ކަން ޗައިނާއަށް ފޯރަމުންދާ ކަމުގައި އެ ޤައުމުން ގަބޫލު ކުރެއެވެ. އަދި, ހަމަނުޖެހުންތަކާ ގުޅިގެން ދެ ޤައުމުގެ ދެމެދުގައި ކުރާ ވިޔަފާރިއަށް ވެސް ވަނީ ހިޔަނި އެޅިފައެވެ.
ހަމަލާ ބަދަލު ކުރުން މެދުކަނޑައިލަން ޗައިނާގެ ޚާރިޖީ ވުޒާރާއިން ވަނީ ދެ ފަރާތަށް ވެސް ގޮވައިލާފައެވެ. "ޙަމަލާ ބަދަލު ކުރުންތައް މެދުކަނޑައިލައި ސުލްޙަ އިސް ކުރަން ބާރު އެޅުމުގައި ޗައިނާއިން ދެމި އޮންނާނެ،" ޗައިނާގެ ޚާރިޖީ ވުޒާރާގެ ތަރުޖަމާނު މައޮ ނިންގ ވިދާޅުވިއެވެ. 53 މިލިޔަން މީހުންގެ އާބާދީއެއް އޮތް މިޔަންމާގައި މީހުން ދިރިއުޅޭ ސަރަޙައްދުތަކުގެ ތެރެއިން 86 އިންސައްތަ ސަރަޙައްދުގެ ކޮންޓްރޯލް އަސްކަރިއްޔާއަށް ގެއްލިފައިވާ ކަމުގައި ދިރާސާތަކުން ހާމަވެއެވެ.