ޔޫކްރެއިންގެ ވެރިރަށް ކީވް ކައިރީގައި އޮންނަ ސަރަޙައްދުތަކަށް ރަޝިޔާއިން ދިން ޑްރޯން ޙަމަލާތަކެއްގައި ބޮޑު ސަރަޙައްދަކުން ކަރަންޓުގެ ޚިދުމަތް ކެނޑިއްޖެއެވެ. ރަޝިޔާގެ ޙަމަލާތައް އަމާޒު ކޮށްފައި ވަނީ ކީވާއި ރަޝިޔާގެ ސަރަޙައްދީ ރޮނގާ ދެމެދުގައި އޮންނަ ރަށްތަކުގައި ހުރި އިންޖީނުގެތަކާއި, އެ ޚިދުމަތް ދިނުމަށް ބޭނުން ކުރާ ވަަސީލަތްތަކަށެވެ. މި ޙަމަލާތަކާ ގުޅިގެން, އެތަކެއް ހާސް ބަޔަކު ކަރަންޓުގެ ޚިދުމަތުން މަހުރޫމުވެފައިވާ ކަމުގައި ޔޫކްރެއިނުން ބުންޏެވެ.
ރަޝިޔާގެ ޙަމަލާތައް އަމާޒު ކޮށްފައިވާ އެއް ރަށަކީ ޗެރްނިހިވްއެވެ. އެ ސަރަޙައްދުގެ ގަވަރުނަރު ވިދާޅުވީ ރަޝިޔާގެ ޙަމަލާތަކާ ގުޅިގެން 15 މީހުން ޒަޚަމުވެ, ޢުމްރާނީ ވަސީލަތްތަކާއި ދަރިވަރުން ދިރިއުޅޭ ޑޯމިޓަރީތަކަކަށް ބޮޑެތި ގެއްލުންތަކެއް ލިބުނު ކަމުގައެވެ. ވެރިރަށް ކީވާއި ޜިތޯމިރުގެ 68,000 ގޭބީސީއަކުން ކަރަންޓުގެ ޚިދުމަތް ކެނޑިފައިވާ ކަމުގައި, އެ ޚިދުމަތް ފޯރުކޮށްދޭ އެންމެ ބޮޑު ކުންފުނި, އުކްރެނެރްހޯން ބުންޏެވެ.
ޔޫކްރެއިންގެ ވައިގެ ސިފައިން ބުނީ, ޙަމަލާތަކުގައި ރަޝިޔާއިން ބޭނުން ކޮށްފައިވާ 22 ޑްރޯންގެ ތެރެއިން 20 ޑްރޯނެއް ދިފާޢުކޮށް ވައްޓައިލާފައިވާނެ ކަމުގައެވެ. އެންމެ ގިނަ ޑްރޯންތައް ދިފާޢުކޮށް ވައްޓައިލާފައި ވަނީ ދެކުނުގައި އޮތް ޚަރްސަނާއި އިރުއުތުރު ސޫމީން ކަމުގައި ވެސް ޔޫކްރެއިންގެ ވައިގެ ސިފައިން ބުންޏެވެ. ޚަރްސަނަށް ދީފައިވާ ޙަމަލާތަކުގައި ޢާންމުން ދިރިއުޅޭ ހަ އިމާރާތަކަށް ބޮޑެތި ގެއްލުންތަކެއް ލިބުނު ކަމުގައި އެ ރަށުގެ އޮފިޝަލުން ބުންޏެވެ.
ރަޝިޔާގެ ޙަމަލާތައް ދީފައި ވަނީ, ޔޫކްރެއިނުން ވެސް ރަޝިޔާގެ ރަށްތަކަށް އަމާޒުކޮށް ޑްރޯން ޙަމަލާތަކެއް ދެމުން ދިޔަ ދަނޑިވަޅެއްގައެވެ. ރަޝިޔާގެ ދެކުނުގައި ޔޫކްރެއިންގެ ސަރަޙައްދީ ރޮނގު ކައިރީގައި އޮންނަ ބްރިޔަންސްކުގެ ގަވަރުނަރު އަލެގްޒާންދަރް ބަގާމާސް ވިދާޅުވީ އެ ސަރަޙައްދަށް ޙަމަލާ ދޭން ޔޫކްރެއިނުން ބޭނުން ކޮށްފައިވާ 12 ޑްރޯން, ރަޝިޔާގެ ވައިގެ ސިފައިން ދިފާޢު ކޮށްފައިވާ ކަމުގައެވެ. އެ ޙަމަލާތަކުގައި އެެއްވެސް މީހެއްގެ ފުރާނައަށް ނުރައްކާވެފައެއް ނުވެއެވެ.
ރަޝިޔާގެ އިރުދެކުނުން އޮތް ބިޔެލްގޮރޮދަށް ވެސް ޔޫކްރެއިނުން ވަނީ ޑްރޯން ޙަމަލާތަކެއް އަމާޒު ކޮށްފައެވެ. އެ ސަރަޙައްދުގެ ގަވަރުނަރު ވިޗިސްލާވް ގްލަޑްކޯފް ވިދާޅުވީ ޙަމަލާތަކުގައި ޔޫކްރެއިނުން ތިން ޑްރޯން ބޭނުން ކޮށްފައިވާ ކަމުގައެވެ. އޭގެ ތެރެއިން އެއް ޙަމަލާގައި ޢާންމުން ދިރިއުޅޭ ގެއަކަށް ބޮޑެތި ގެއްލުންތަކެއް ލިބުނު ކަމުގައި ވެސް އޭނާ ވިދާޅުވިއެވެ. މިއީ, ޔޫކްރެއިންގެ ސަރަޙައްދީ ރޮނގު ކައިރީގައި އޮންނަ ބިޔެލްގޮރޮދަށް ޔޫކްރެއިނުން ޙަމަލާތައް އަމާޒު ކޮށްފައިވާ ފުރަތަމަ ފަހަރެއް ނޫނެވެ.
ބިޔެލްގޮރޮދަށް ޔޫކްރެއިނުން ޙަމަލާތައް އަމާޒު ކުރަން ފެށުމުން, މި އަހަރުގެ މޭ މަހުގެ ތެރޭގައި ރަޝިޔާގެ ފައުޖުތަކުން ވަނީ އެއްގަމު މަގުން ބިޔެލްގޮރޮދާ އިންވެގެން އޮތް ޔޫކްރެއިންގެ ރަށްތަކަށް އަރާފައެވެ. އަދި, އެ ސަރަޙައްދުގައި އޮންނަ ބައެއް ރަށްތަކާއި އަވަށްތަކަށް އަތްގަދަ ކޮށްފައެވެ. ބިޔެލްގޮރޮދަށް ޔޫކްރެއިނުން އެންމެ ފަހުން ދިން ޙަމަލާތަކާ ގުޅިގެން, ބައެއް ސަރަޙައްދުތައް ބަންދު ކޮށްފައިވާ ކަމުގައި ގްލަޑްކޯފް ވިދާޅުވިއެވެ.
ރަޝިޔާ-ޔޫކްރެއިން ހަނގުރާމަ ފަށާފައި ވަނީ 2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހުއެވެ. މި ހަނގުރާމައިގައި ރަޝިޔާ ސިފައިން އަތްގަދަ ކޮށްފައިވާ ޔޫކްރެއިންގެ ސަރަޙަައްދުތަކުގެ ތެރޭގައި އިރުމަތީ ދޮންބާސްގެ ލުހާންސްކާއި ދޮންޏެސްކުގެ އިތުރުން ދެކުނުގައި އޮތް ޒަޕޮރީޜިޔާގެ ބައެއް ސަރަޙައްދުތައް ހިމެނެއެވެ. މީގެ އިތުރުން, ޔޫކްރެއިންގެ އެންމެ ދެކުނުން އޮތް ކްރައިމިޔާއަކީ 2014ވަނަ އަހަރު ރަޝިޔާއިން އަތްގަދަ ކޮށްފައިވާ ސަރަޙައްދެކެވެ.