ޔަހޫދީން ވެރިވެގަނެފައިވާ ސޫރިޔާގެ އަލް-ޖޫލާންގެ އުސް ބިންތަކަށް ދިން ރޮކެޓްު ޙަމަލާއެއްގައި ޔަހޫދީންގެ 10 މީހުން މަރުވެއްޖެއެވެ. މިޖްދަލް ޝަމްސްގައި އޮންނަ ދްރޫޒީ އަވަށަށް ދީފައިވާ ޙަމަލާތަކުގެ ފަހަތުގައި އޮތީ ލުބްނާންގައި ހަރަކާތްތެރިވާ ޙިޒްބުالله ޖަމާޢަތް ކަމަށް ޔަހޫދީން ތުހުމަތު ކުރި ނަމަވެސް, އެ ޖަމާޢަތުން ވަނީ އެ ތުހުމަތުތައް ދޮގު ކޮށްފައެވެ.
ހައްދުފަހަނަ އެޅި ޔަހޫދީ ފައުޖުން ބުނީ, ފުޓުބޯޅަ ދަނޑަށް އަމާޒުކޮށް ދިން ރޮކެޓު ޙަމަލާގެ ބަދަލު ހިފާނެ ކަމުގައެވެ. އެއީ, 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހު ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ލާއިންސާނީ ޢުދުވާނެއް ފެށި ފަހުން ޔަހޫދީން އަތްގަދަ ކޮށްފައިވާ ބިމަކަށް ދީފައިވާ އެންމެ ނުރައްކާތެރި ޙަމަލާއެވެ. އެ ޙަމަލާގައި އިތުރު 13 މީހުން ޒަޚަމުވި ކަމުގައި ޔަހޫދީންގެ އެމްބިޔުލާންސް ޚިދުމަތްދޭ އިދާރާއިން ބުންޏެވެ.
ޙިޒްބުاللهން ޔަހޫދީންގެ ރަށްތަކާއި ޔަހޫދީ ފައުޖުގެ ނިރުބަވެރި ސިފައިންނަށް އަމާޒުކޮށް ޙަމަލާ ދޭން ފަށާފައި ވަނީ, ޣައްޒާ ޢުދުވާނާ ގުޅިގެންނެވެ. މިނިވަން ކަމަށް ޖިހާދު ކުރަމުންދާ ޣައްޒާގެ ރައްޔިތުންނަށް އެއްބާރުލުން ދިނުމުގެ ގޮތުންނެވެ. އަދި, ޔަހޫދީންގެ ގަތުލުއާންމުތަކަށް ހުއްޓުމެއް ގެންނަން ބާރު އެޅުމުގެ ގޮތުންނެވެ.
ޖޫލާންގެ ދްރޫޒީ އަވަށަށް ރޮކެޓް ޙަމަލާތަކެއް ދީފައި ވަނީ, ޔަހޫދީ ފައުޖުގެ ހައްދުފަހަނަ އެޅި ސިފައިން ލުބްނާންގެ ރަށަކަށް ރަޙުމު ކުޑަ ޙަމަލާތަކެއް ދިންތާ ގަޑިއިރުތަކެއް ފަހުންނެވެ. ލުބްނާންގެ ދެކުނުގައި އޮންނަ ކަފްރަކްލާއަށް ދީފައިވާ ޙަމަލާތަކުގައި ޔަހޫދީ ފައުޖުން ވަނީ ހަތަރު މުޖާހިދުން ޝަހީދު ކޮށްލާފައެވެ. އޭގެ ތެރެއިން އެކަކަކީ ޙިޒްބުاللهއަށް ނިސްބަތްވާ މުޖާހިދެކެވެ.
ޖޫލާންގެ އުސް ބިންތަކަށް ޙަމަލާ ދޭން 30 ރޮކެޓް ބޭނުން ކޮށްފައިވާ ކަމުގައި ޔަހޫދީ ފައުޖުން ބުންޏެވެ. "އެ ހާދިސާއާ އިސްލާމިކް ރެސިސްޓެންސާ [ޔަހޫދީންނާ ދެކޮޅަށް ހަތިޔާރު އުފުލާފައިވާ ޖަމާޢަތްތަކުގެ] އެއްވެސް ގުޅުމެއް ނެތް. އެ ކަމާ މެދު [ޔަހޫދީން] ކުރަމުންދާ ތުހުމަތުތައް ދޮގު ކުރަން،" ޙިޒްބުاللهން ނެރުނު ބަޔާނެއްގައި ހާމަކޮށްފައިވެއެވެ. ޔަހޫދީ ސިފައިންނަށް ޙަމަލާ ދޭން ހަތަރު ރޮކެޓް ޙަމަލާ ދީފައިވާނެ ކަމަށް އެ ޖަމާޢަތުން އެއްބަސްވި ނަމަވެސް, މިޖްދަލް ޝަމްސަށް ޙަމަލާތައް އަމާޒު ކޮށްފައިވާ ނުވާނެ ކަމުގައި އެ ޖަމާޢަތުން ބުންޏެވެ.
ސޫރިޔާގެ ބިމެއް ކަމުގައިވާ ޖޫލާންގެ އުސް ބިންތަކަށް ޔަހޫދީން އަތްގަދަ ކޮށްފައި ވަނީ 1967ވަނަ އަހަރުގެ ހަ ދުވަހުގެ ހަނގުރާމައިގައެވެ. އަދި, 1981ވަނަ އަހަރު ޔަހޫދީން ވަނީ އެ ސަރަޙައްދަށް ވެރިވެގަނެ, އެއީ ޔަހޫދީންގެ ބިމެއްގެ ގޮތުގައި ކަނޑައަޅާފައެވެ. އެއީ, ބައިނަލްއަޤުވާމީ ޤާނޫނުތަކާ ޚިލާފަށް ޔަހޫދީން ހިންގާފައިވާ އަމަލެކެވެ.