ފަލަސްޠީނުގެ ޣައްޒާގެ މަދަރުސާއަކަށް ބޮން އަޅައި 30 މީހުން ޝަހީދު ކޮށްލައިފިއެވެ. ޣައްޒާގެ ޞިއްޙަތާ ބެހޭ ވުޒާރާއިން ބުނީ, އެ ޙަމަލާގައި ޝަހީދު ކޮށްލާފައިވާ މީހުންގެ ތެރޭގައި 15 ކުޑަކުދިންނާއި އަށް އަންހެނުން ހިމެނޭ ކަމުގައެވެ. އަދި, 100އަށްވުރެ ގިނަ މީހުން ޒަޚަމު ކޮށްލާފައިވާ ކަމުގައެވެ. އެ މީހުންނަށް ފަރުވާ ދޭން ގެންގޮސްފައި ވަނީ ދަޔިރް އަލް-ބަލަޙުގައި ހުންނަ އަލް-އަޤްޞާ ހަސްފަތާލަށެވެ. ޙަމަލާގައި މަދަރުސާގެ އިމާރާތަށް ވަނީ ބޮޑެތި ގެއްލުންތަކެއް ލިބިފައެވެ.
ޔަހޫދީ ފައުޖުން މަދަރުސާއަށް ވައިގެ ޙަމަލާތައް ދީފައި ވަނީ އެއްވެސް އިންޒާރަކާ ނުލާ ކަމުގައި, އެ ތަނުގައި ވަގުތީ ގޮތުން ދިރުއުޅެމުން ދިޔަ މީހެއް ކަމުގައިވާ އުންމު ޙަސަން ޢަލީ ބުންޏެވެ. ޔަހޫދީންގެ ޙަމަލާގައި އޭނާގެ އަންހެން ދަރިފުޅު ވަނީ ޒަޚަމުވެފައެވެ. "ޙަމަލާތައް ދޭން ފެށުމާ އެކު އަހަރެން ދުވަން ފެށިން. އަހަރެންގެ އަންހެން ދަރިފުޅު ހުރީ އެހެން ދިމާލެއްގައި. ޚަދީޖާ މަދަރުސާގައި ހިޔާވަހިކަން ހޯދަމުން ދިޔަ ގިނަ ޢަދަދެއްގެ ކުށެއް ނެތް ބަޔަކު ވަނީ ޒަޚަމު ކޮށްލާފައި،" އެ ތަނުގައި ދިރިއުޅޭ އެހެން ރެފިއުޖީއެއް ކަމުގައިވާ އިބްތިހާލް އަޙްމަދު ބުންޏެވެ.
ޣައްޒާގެ ދެކުނުގައި އޮތް ޚާން ޔޫނިސް ހުސް ކުރަން ވެސް ޔަހޫދީ ފައުޖުން ދާދި ފަހުން ވަނީ އަންގާފައެވެ. އަދި, އެ އެންގުމަށް ފަހު ޔަހޫދީ ފައުޖުން ވަނީ އެ ރަށުގައި ޢާންމުން ދިރިއުޅޭ ގެދޮރާއި, ރެފިއުޖީން ވަގުތީ ހިޔާގެ ގޮތުގައި ބޭނުން ކުރަމުންދާ އިމާރާތްތަކަށް ޙަމަލާ ދޭން ފަށާފައެވެ. އެ ޙަމަލާތަކުން ސަލާމަތްވުމަށް, ޚާން ޔޫނިސުން އެތަކެއް ހާސް ބަޔަކު ވަނީ ފައިބާފައެވެ. ނަމަވެސް, ޔަހޫދީ ފައުޖުގެ ހައްދުފަހަނަ އެޅި ސިފައިންގެ ޙަމަލާތަކުން ސަލާމަތް ކަން ހޯދޭނެ އެއްވެސް ތަނެއް ޣައްޒާގައި ނެތް ކަމަށް ބުނެ, އދން ވަނީ އިންޒާރު ކޮށްފައެވެ.
ޔަހޫދީ ފައުޖުގެ ނިރުބަވެރި ސިފަައިން ދަޔިރް އަލް-ބަލަޙުގެ މަދަރުސާއަކަށް ބޮން އަޅާފައި ވަނީ, 2023 އޮކްޓޫބަރު 7ން ފެށިގެން ހިންގަމުންދާ ލާއިންސާނީ ޢުދުވާން ހުއްޓުމަކަށް ގެނައުމާ މެދު ކުރަމުންދާ މަޝްވަރާތަކުގެ އައު ބުރެއް ފެށުމަށް ތައްޔާރުވަމުން ދިޔަ ދަނޑިވަޅެއްގައެވެ. މިޞްރާއި ޤަޠަރުން ވިލަރެސް ކުރާ މަޝްވަރާތަކުގައި ބައިވެރިވުމަށް އެމެރިކާގެ ޖާސޫސީ އިދާރާގެ ވެރިޔާ ވިލިޔަމް ބަރންސް ވަނީ އިޓަލީވިލާތުގެ ވެރިރަށް ރޯމަށް ވަޑައިގަންނަވާފައެވެ.
މިިހާރު މަޝްވަރާ ކުރަމުން ދަނީ މޭ 31ވަނަ ދުވަހު އެމެރިކާގެ ރައީސް ޖޯ ބައިޑަން ހުށަހަޅުއްވާފައިވާ ސުލްޙައިގެ މަގުޗާޓު ކުރިއެރުވުމަށެވެ. ޔަހޫދީން ބުނީ, އެ މަގުޗާޓުގެ ދަށުން އެކުލަވައިލުމަށް މަސައްކަތް ކުރަމުންދާ އެއްބަސްވުމަށް އައު ހުށަހެޅުންތަކެއް ހުށަހަޅާފައިވާނެ ކަމުގައެވެ. ނަމަވެސް, ޔަހޫދީން ދަނީ މަޝްވަރާތައް ފޭލުކޮށްލައި ހުރަސް އަޅަން ވެސް ގިނަ މަސައްކަތްތަކެއް ކުރަމުންނެވެ. ސުލްޙަ ގާއިމު ކުރުމުގެ އެއްވެސް ނިޔަތެއް ޔަހޫދީންގެ ކިބައިގައި ނެތް ކަމުގައި ޣައްޒާގައި ވެރިކަން ކުރާ ޙަމާސް ޖަމާޢަތުގެ އިތުރު މިޞްރުން ވެސް ވަނީ ހާމަ ކޮށްފައެވެ.
މީގެ ނުވަ މަސް ކުރިން ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 39,258އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމުކޮށްލާފައިވާ މީހުންގެ ޢަދަދު ވަނީ 90,589އަށް އުފުލިފައެވެ. އދން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.