އަތަމާ ޢަބްދުއްލަޠީފް އަވަހާރަވެއްޖެ

މަޝްހޫރު ވިޔަފާރިވެރިޔާ މއ.އަތަމާގެ، އަބްދުއްލަތީފު ހުސައިން މަނިކު (އަތަމާ ޢަބްދުއްލަޠީފް) އަވަހާރަވެއްޖެއެވެ. ޢުމުރުން 94 އަހަރުގައި އަތަމާ ޢަބްދުއްލަތީފް އަވަހާރަވީ އޭޑީކޭ ހޮސްޕިޓަލުގައި ފަރުވާދެއްވަމުންގެންދަވަނިކޮށެވެ.

ރާއްޖޭގައި ގިނަ ބަޔަކު ޙައްޖަށް ގެންގޮސްދެއްވުމުގެ މަސައްކަތް ކޮށްދެއްވާފައިވާތީ ޖަމާޢަތަށް ފައިދާހުރި ޚާއްސަ ޚިދުމަތްކުރުމުގެ ރޮނގުންވަނީ ޢާއްމު ޚިދުމަތުގެ އިނާމު 1991 ވަނަ އަހަރު ލިބިވަޑައިގެންފައެވެ.

ރާއްޖޭގައި ފުޅާ ދާއިރާއެއްގައި ވިޔަފާރިކުރައްވާ ޢަބްދުއްލަޠީފަކީ ޙައްޖަށް މީހުންގެންދިއުމުގެ މަސައްކަތް ގިނަ އަހަރުތަކެއްވަންދެން ކުރެއްވި ޚިދުމަތްތެރިއެކެވެ.

ޢަބްދުލަތީފް ވިދާޅުވެފައިވާގޮތުން އެމަސައްކަތް ފެއްޓެވީ 1976 ވަނަ އަހަރު އަނބިކަނބަލުންނާއެކު ޙައްޖަށް ވަޑައިގެން ފެނިވަޑައިގަތް މަންޒަރުތަކުން ކުރެވުނު އިޙްސާސްތަކަށްފަހުގައިކަމަށެވެ. އެއީ ޙައްޖުގެ އަޅުކަމަކީ ބުރަކަމަކަށްވުމުން އަޅާލާނެ ބަޔަކު ނެތްނަމަ ޙައްޖުގެ އަޅުކަން އެންމެ ރަނގަޅުގޮތުގައި ބައެއް ފަރާތްތަކަށް ނުކުރެވޭކަމަށް ޤަބޫލުކުރެއްވުނުކަމަށާއި، އެކަމުން ރައްޔިތުންނަށް ލުޔެއް ހޯއްދަވައިދެއްވުމަށް ފެއްޓެވިކަމެއްކަމަށް ޢަބްދުއްލަޠީފް ވިދާޅުވެފައިވެއެވެ.

ރާއްޖޭގެ ގިނަ ބަޔަކު އަތަމާ ޙައްޖު ގްރޫޕުގައި ޙައްޖަށްވަނީ ގޮސްފައެވެ. ޢަބްދުއްލަތީފްވަނީ މީހުން ޙައްޖަށް ގެންދިޔުމުގެ އިތުރުން ތަޢުލީމީ ދައިރާއާއި އެނޫންވެސް ދާއިރާތަކުން ވިޔަފާރިފުޅާކުރައްވާ އެކިޚިދުމަތް ޤައުމަށްކޮށްދެއްވާފައެވެ.

ޢަބްދުއްލަޠީފްވަނީ މާލެއާއި އަތޮޅުތަކުގައި މިސްކިތްވެސް ބިނާކޮށްދެއްވާފައެވެ. ޢަބްދުއްލަޠީފްގެ ފަސް ކައިވެންޏަށް 9 ބޭފުޅުން ލިބިވަޑައިގެންފައިވެއެވެ.