ސަރުކާރު ވަޒީފާތަކަށް މީހުން ޢައްޔަން ކުރުމުގައި ބަންގްލަދޭޝް ސަރުކާރުން އަމަލު ކުރަމުން ދިޔަ ކޯޓާ ނިޒާމާ ދެކޮޅަށް ފެށި ބޮޑެތި މުޒާހަރާތަކަށް ހުރަސް އެޅުމުގެ ގޮތުން ކަނޑައިލި އިންޓަނެޓުގެ ޚިދުމަތްްތައް އަލުން ގުޅައިދީފިއެވެ. ބޮޑުވަޒީރު ޝައިޚް ޙަސީނާގެ ސަރުކާރުން އިންޓަނެޓުގެ ޚިދުމަތް އަލުން ގުޅައިދީފައި މި ވަނީ, މުޒާހަރާތައް އިތުރަށް ކުރިއަށް ނުގެންދާނެ ކަން, އެ ކަމުގައި އިސްކޮށް ހަރަކާތްތެރިވި ދަރިވަރުން އިޢުލާނު ކޮށްފައިވާ ދަނޑިވަޅެއްގައެވެ.
ކޯޓާ ނިޒާމާ ދެކޮޅަށް ކުރި މުޒާހަރާތައް އިންތިޒާމު ކޮށްފައި ވަނީ ކޮލެޖުތަކާއި ޔުނިވަރސިޓީތަކުގެ ދަރިވަރުންނެވެ. ބަންގްލަދޭޝްގެ ވެރިރަށް ދާކާގެ އިތުރުން އެކި ކަންކޮޅުތަކަށް ފެތުރިގެން ދިޔަ މުޒާހަރާތައް ހުއްޓުވަން ފުލުހުން ބާރުގެ ބޭނުން ކުރުމާ ގުޅިގެން މަރުވި މީހުންގެ ޢަދަދު ވަނީ 150އަށް އުފުލިފައެވެ. އަދި, އެތަކެއް ހާސް ބަޔަކު ޒަޚަމުވިއެވެ. އަދި, ފުލުހުން ވަނީ މުޒާހަރާތަކުގެ ބައިވެރިންގެ ތެރެއިން 1,600އެއްހާ މީހުން ހައްޔަރު ކޮށްފައެވެ. މުޒާހަރާތައް ކޮންޓްރޯލް ކުރެވިފައި ވަނީ, ކަރފިޔު އިޢުލާނުކޮށް, މަގުތަކުގައި އަމަން ބެލެހެއްޓުމަށް ހަތިޔާރު އެޅި ސިފައިން ނެރުމުންނެވެ.
"ބްރޯޑްބޭންޑާއި މޮބައިލް އިންޓަރނެޓުގެ ޚިދުމަތް މިހާރު ވާނީ ގުޅައިދީފައި. މުވާސަލާތީ އެހެން ޚިދުމަތްތައް ވެސް މިހާރު ލިބޭނެ. އެ ޚިދުމަތްތައް މެދުކަނޑައިލަން މަޖުބޫރުވީ ހަމަނުޖެހުންތަކާ ގުޅިގެން. ޤައުމުގެ ހާލަތު މިހާރު ރަނގަޅުވެފައިވާ ކަމުގެ ޔަގީން ކަން ބައިނަލްއަޤުވާމީ ޕާޓްނަރުންނަށް އަރުވަން. އެ ކަން ކުރެވުނީ ސަރުކާރުން އަޅާފައިވާ ހަރުދަނާ ފިޔަވަޅުތަކުގެ ސަބަބުން،" ބަންގްލަދޭޝްގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވެއެވެ.
ނަމަވެސް, ބަންގްލަދޭޝްގެ ސަރުކާރާ ދެކޮޅަށް މުޒާހަރާ ކުރި ދަރިވަރުން ހުއްޓުވަން ފުލުހުން ބާރުގެ ބޭނުން ކޮށްފައިވާތީ, ޙަސީނާގެ ސަރުކާރަށް ވަނީ ބައިނަލްއަޤުވާމީ މުޖުތަމަޢުގެ ފާޑު ކިޔުންތައް އަމާޒުވެފައެވެ. އެ ޤައުމަށް ފާޑުކިޔުންތައް އަމާޒު ކޮށްފައިވާ އިދާރާތަކުގެ ތެރޭގައި އދއާއި އިންސާނީ ޙައްޤުތަކަށް ވަކާލާތު ކުރާ ބައިނަލްއަޤުވާމީ ޖަމުޢިއްޔާތަކުގެ އިތުރުން އެމެރިކާއާއި އިނގިރޭސިވިލާތް ހިމެނެއެވެ.
އިންސާނީ ޙައްޤުތަކަށް ވަކާލާތު ކުރާ ޖަމުޢިއްޔާތަކުން ތުހުމަތު ކުރާ ގޮތުގައި, ފާއިތުވި 15 އަހަރު ވެރިކަން ކޮށްފައިވާ ޙަސީނާގެ ސަރުކާރުން މިހާރު ފެންނަމުން ދަނީ ޚުދުމުހްތާރު ކަމުގެ އަމަލުތަކެވެ. އޭގެ ތެރޭގައި, ސަރުކާރާ ދެކޮޅަށް ޚިޔާލު ފާޅު ކުރުމުގެ ކުށުގައި ގިނަ ޢަދަދެއްގެ ބަޔަކު ހައްޔަރު ކުރުމާއި, އިދިކޮޅު ޕާޓީތަކުގެ އިސް މީހުން ހައްޔަރު ކުރުމުގެ އިތުރުން, ގަދަ ބާރުން މީހުން ގެއްލުވައިލުމުގެ ތުހުމަތު ހިމެނެއެވެ. ނަމަވެސް, ޙަސީނާ ގެންދަވަނީ އެ ތުހުމަތުތައް ދޮގު ކުރައްވަމުންނެވެ.
މުޒާހަރާތައް ހުއްޓުވުމުގެ ގޮތުން އިޢުލާނު ކޮށްފައިވާ ކަރފިއުއަށް ވެސް ސަރުކާރުން ވަނީ ލުއި ދޭން ފަށާފައެވެ. މެދުކަނޑައިލާފައިވާ ގިނަ ޚިދުމަތްތަކެއް ވެސް މިހާރު ވަނީ ގުޅައިދޭން ފަށާފައެވެ. މުޒާހަރާތަކަށް ނިމުމެއް އައިސް ހަމަޖެހުން ގާއިމުވެފައި ވަނީ, ކޯޓާ ނިޒާމަށް ބޮޑެތި ބަދަލުތަކެއް ގެންނަން ސުޕްރީމް ކޯޓުން ސަރުކާރަށް އަމުރު ކުރުމާ ގުޅިގެންނެވެ.
މައްސަލަ ގޯސްވި ކޯޓާ ނިޒާމުގެ ދަށުން ސަރުކާރު ވަޒީފާތަކުގެ 56 އިންސައްތައަކީ ވަކި ފަރާތްތަކަށް ޚާއްޞަ ކޮށްފައިވާ ވަޒީފާތަކެކެވެ. ނަމަވެސް, ސުޕްރީމް ކޯޓުން އަމުރު ކޮށްފައި ވަނީ އެކި ފަރާތްތަކަށް ޚާއްޞަ ކޮށްފައިވާ ކޯޓާތައް 7 އިންސައްތައަށް ދަށް ކުރުމަށެވެ. ސަރުކާރުން ވަނީ ސުޕްރީމް ކޯޓުގެ އަމުރާ އެއްގޮތަށް ކޯޓާ ނިޒާމަށް ބަދަލު ގެންނަން އެއްބަސްވެފައެވެ.
ބަންގްލަދޭޝްގެ އާބާދީ 170 މިލިޔަނަށް އަރާއިރު, އޭގެ ތެރެއިން ބޮޑު އިންސައްތައެއް ޒުވާނުން ހިއްސާ ކުރެއެވެ. ނަމަވެސް, ޒުވާން އުމުރުފުރައިގެ އާބާދީގެ ތެރެއިން 32 މިލިޔަން މީހުންނަކީ މަތީ ތަޢުލީމު ހާސިލު ކުރާނެ ފުރުޞަތާއި ވަޒީފާ ނެތް މީހުންނެވެ. ކޯޓާ ނިޒާމުގެ ބައެއް ބައިތައް ސުޕްރީމް ކޯޓުން ބާޠިލު ކުރުމާ އެކު, ސަރުކާރުގެ ވަޒީފާތަކުގެ ތެރެއިން 93 އިންސައްތަ ވަޒީފާއަށް މީހުން ޢައްޔަން ކުރުމުގައި ދެން އިސްކަން ދޭން ޖެހޭނީ ވަޒީފާއަށް އެދި ކުރިމަތިލާ މީހުންގެ ތަޢުލީމީ ފެންވަރާއި މަސައްކަތުގެ ތަޖުރިބާއަށެވެ.