ފަަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާންތައް ހުއްޓުވުމާ ގުޅޭ މަޝްވަރާތަކަށް ޔަހޫދީން އަނެއްކާ ވެސް ހުރަސް އަޅަމުންދާ ކަން ޣައްޒާގައި ވެރިކަން ކުރާ ޙަމާސް ޖަމާޢަތުން ބުނެފިއެވެ. ސުލްޙައިގެ މަގުޗާޓުގެ ދަށުން އެކުލަވައިލަން މަސައްކަތް ކުރަމުންދާ އެއްބަސްވުމަށް ޒަޔަނިސްޓު ޔަހޫދީންގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫ އުނިއިތުރު ގެންނަން މަސައްކަތް ކުރަމުންދާ ކަމުގައި ޙަމާސުން ބުންޏެވެ.
ޤަޠަރާއި މިޞްރުން އިސްވެ ވިލަރެސް ކުރަމުންދާ ވާހަކަތަކުގައި މަޝްވަރާ ކުރަމުންދާ މަގުޗާޓަކީ މޭ 31ވަނަ ދުވަހު އެމެރިކާގެ ރައީސް ޖޯ ބައިޑަން ހުށަހަޅުއްވާފައިވާ ސުލްޙައިގެ މަގުޗާޓެކެވެ. އެ މަގުޗާޓުގައިވާ ކަންކަމަށް ޔަހޫދީން ފުރިހަމައަށް އެއްބަސްވެފައިވާ ކަމުގައި އެއިރު ބައިޑަން ވިދާާޅުވެފައިވެއެވެ. ނަމަވެސް, ސުލްޙަ ގާއިމުކޮށް ޢުދުވާންތައް ހުއްޓައިލުމަށް ހުރަސް އެޅުމުގެ ގޮތުން ނިރުބަވެރި ނަތަންޔާހޫ ދަނީ އެއްބަސްވުމުގައިވާ ކަންކަމަށް އުނިއިތުރު ގެންނަމުންނެވެ.
އެންމެ ފަހުން މަޝްވަރާ ބައްދަލުވުންތައް ބާއްވާފައި ވަނީ އިޓަލީވިލާތުގެ ވެރިރަށް ރޯމްގައެވެ. ޙަމާސުން ބުނީ, ރޯމްގައި ބޭއްވި ބައްދަލުވުންތަކުގައި އައު ހުށަހެޅުންތަކެއް ޔަހޫދީން ހުށަހަޅާފައިވާ ކަމުގައެވެ. "ޢުދުވާން ހުއްޓައިލުން ފަސް ކުރަން ނަތަންޔާހޫ މަސައްކަތް ކުރަމުންދާ ކަން [ޔަހޫދީ] ނެގޯޝިއޭޓަރުންގެ ވާހަކަތަކުން ވަރަށް ސާފުކޮށް ހާމަވޭ. އޭނާގެ ބޭނުމަކީ އެއްބަސްވުމެއް އެކުލަވައިލުން ފަސްކުރުމުގެ ގޮތުން އައު ކަންތަންތަކެއް ހުށަހެޅުން،" އަނިޔާވެރި ނަތަންޔާހޫގެ އަމަލުތައް ކުށްވެރިކޮށް ޙަމާސުން ނެރުނު ބަޔާނެއްގައި ބުނެފައިވެއެވެ.
ޙަމާސުން ބުނީ, އެއްބަސްވުމުގެ އެންމެ ފުރަތަމަ ދެލިކޮޕީއަށް ޔަހޫދީން ގިނަ ބަދަލުތަކެއް ގެނެސްފައިވާ ކަމުގައެވެ. އެއީ ޔަހޫދީން އެއްބަސްވެފައިވާ ކަންކަމުގެ މައްޗަށް އެކުލަވައިލާފައިވާ ދެލިކޮޕީއެއް ކަން ވެސް ޙަމާސުން ފާހަގަ ކުރިއެވެ. އެ ގޮތުން, އިތުރު 29 ހުށަހެޅުމެއް ޔަހޫދީން ހުށަހަޅާފައިވާ ކަމުގައި ޙަމާސުން ބުންޏެވެ. ނަމަވެސް, މަޝްވަރާތަކުގައި ކުރިއެރުންތަކެއް ހޯދިފައި ނުވަނީ ޙަމާސްގެ ސަބަބުން ކަމަށް ދެއްކުމަށް ނިރުބަވެރި ނަތަންޔާހޫ ދަނީ ޙަޤީޤަތާ ޚިލާފު ވާހަކަތައް ފަތުރަމުންނެވެ.
އެއްބަސްވުމަށް ޙަމާސުން އުނިއިތުރު ގެންނަން މަސައްކަތް ކުރަމުންދާ ކަމަށް ބުނެ ނަތަންޔާހޫ ފަތުރަމުންދާ ދޮގުތައް ޙަމާސްގެ އިސްވެރިއެއް ކަމުގައިވާ ޢިއްޒަތު އަލް-ރަޝަޤު ދޮގު ކުރެއްވިއެވެ. "މެދުވެރިންގެ ދައުރު އަދާ ކުރަމުންދާ [މިޞްރާއި ޤަޠަރުގެ އޮފިޝަލުންނަށް] އެނގޭނެ ޙަމާސުން އަމަލު ކުރަމުން ދަނީ ހެޔޮ ނިޔަތުގައި ކަން. އަދި, އިސްރާއީލުން ކުރިމަތި ކުރަމުންދާ ހުރަސްތަކުން އަރައިގަންނަން މަސައްކަތް ކުރަމުންދާ ކަން،" އޭނާ ވިދާޅުވިއެވެ.
ޙަމާސްގެ އެހެން ވެރިއެއް ވިދާޅުވި ގޮތުގައި ޣައްޒާގެ އެންމެ ދެކުނުން އޮތް ރަފަޙަށް އަރައިގަނެފައިވާ ޔަހޫދީ ސިފައިން އެ ރަށުން ބޭލުމަށް އަނިޔާވެރި ނަތަންޔާހޫ ދެކޮޅު ހަދަމުންދާ ކަމުގައެވެ. އަދި, ޣައްޒާގެ ރެދިއުޖީންނަށް އެ މީހުންގެ ގެދޮރަށް އެނބުރި ދިޔުމަށް ދެކޮޅު ހެދުމުގެ އިތުރުން ހައްޔަރު ކޮށްފައިވާ ކުށެއް ނެތް ފަލަސްޠީނުގެ މުސްލިމުން މިނިވަން ކުރަން ވެސް ނަތަންޔާހޫ ދެކޮޅު ހަދަމުންދާ ކަމުގައި ވެސް އޭނާ ވިދާޅުވިއެވެ.
އެއްބަސްވުން ޙަޤީޤަތަކަށް ހެދުމަށް ނަމެއްގައި އެހީތެރިކަން ފޯރުކޮށްދެމުންދާ އެމެރިކާއިން ބުނީ, މަޝްވަރާތަކުގައި ކުރިއެރުންތަކެއް ހޯދިފައިވާ ކަމުގައެވެ. އަނެއް ކޮޅުން, ޔަހޫދީންގެ ލާއިންސާނީ ޢުދުވާންތައް މެދުކެނޑުނަ ނުދިނުމަށް ވެސް އެމެރިކާއިން ދަނީ މަސައްކަތް ކުރަމުންނެވެ. ޣައްޒާގެ މުސްލިމުން ޝަހީދު ކުރަން ޔަހޫދީ ފައުޖުން ބޭނުން ކުރަމުންދާ ނުރައްކާތެރި އަދި ފަނާކުރަނިވި ހަތިޔާރު ބައިޑަންގެ އަމުރަށް ޔަހޫދީންނަށް ފޯރުކޮށްދެމުން ދަނީ އެމެރިކާއިންނެވެ.
މީގެ ނުވަ މަސް ކުރިން ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 39,363އަށް އުފުލިފައެވެ. އޭގެ ތެރޭގައި 14,000އަށް ވުރެ ގިނަ ޢަދަދަކަށް މައުސޫމު ކުޑުކުދިން ހިމެނޭއިރު, ވީނުވީއެއް ނޭނގި ގެއްލިފައިވާ ކުޑަކުދިންގެ ޢަދަދު 21,000އަށް އަރައެވެ. އަދި, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމުކޮށްލާފައިވާ މީހުންގެ ޢަދަދު ވަނީ 90,923އަށް އުފުލިފައެވެ. އދން ބުނީ, ޣައްޒާގައި ހައިހޫނުގައި ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.